Englishहिन्दीമലയാളംதமிழ்తెలుగు

ಮೂರು ದೇಶಗಳಲ್ಲಿ ಐಪಿಎಲ್ 7 ಆಟೋಟ

Posted by:
Published: Thursday, March 13, 2014, 13:29 [IST]
 

ಬೆಂಗಳೂರು, ಮಾ.13: ಏಳನೆ ಆವೃತ್ತಿಯ ಐಪಿಎಲ್ ನಡೆಯುವ ಮೈದಾನಗಳನ್ನು ಬಿಸಿಸಿಐ ಕೊನೆಗೂ ಖಚಿತಪಡಿಸಿದೆ. ಏಪ್ರಿಲ್ 16 ರಿಂದ ಜೂ.1ರ ತನಕ ನಡೆಯಲಿರುವ ಐಪಿಎಲ್ 7 ಮೂರು ದೇಶಗಳಲ್ಲಿ ನಡೆಯಲಿದೆ. ಮೊದಲ ಹಂತದ ಐಪಿಎಲ್ ಪಂದ್ಯಗಳನ್ನು ಯುಎಇಯಲ್ಲಿ ನಡೆಸಲು ಉದ್ದೇಶಿಸಿದ್ದು, ಬಾಂಗ್ಲಾದೇಶವನ್ನು ಮೀಸಲು ತಾಣವನ್ನಾಗಿ ಆಯ್ಕೆ ಮಾಡಿದೆ.ಅಂತಿಮ ಹಂತದ ಪಂದ್ಯಗಳು ಭಾರತದಲ್ಲಿ ನಡೆಯಲಿದೆ. ಭಾರತದಲ್ಲಿ ಲೋಕಸಭೆ ಚುನಾವಣೆ ಕಾರಣ ಈ ಬದಲಾವಣೆ ಮಾಡಲಾಗಿದೆ ಎಂದು ಬಿಸಿಸಿಐ ಪ್ರಕಟಿಸಿದೆ.

ಈ ವರ್ಷ ದೇಶದಲ್ಲಿ ಸಾರ್ವತ್ರಿಕ ಚುನಾವಣೆ ನಡೆಯುತ್ತಿರುವ ಕಾರಣ ಐಪಿಎಲ್‌ನ ಅರ್ಧಾಂಶ ಪಂದ್ಯಗಳು ಬೇರೆ ದೇಶದಲ್ಲಿ ನಡೆಯಲಿದ್ದು, ಅಂತಿಮ ಹಂತದ ಪಂದ್ಯಗಳು ಭಾರತದಲ್ಲಿ ನಡೆಯುವ ಸಾಧ್ಯತೆಯಿದೆ. ಕೇಂದ್ರ ಸರಕಾರ ಅನುಮತಿ ನೀಡಿದರೆ ಮೇ 13 ರಿಂದ ಕೊನೆಯ ಹಂತದ ಐಪಿಎಲ್ ಪಂದ್ಯಗಳು ಭಾರತದಲ್ಲೇ ನಡೆಯುವುದು.

'ಏಪ್ರಿಲ್ 16, 2014ರಂದು ಆರಂಭವಾಗಿ ಜೂನ್ 1,2014ರಂದು ಕೊನೆಗೊಳ್ಳಲಿರುವ ಏಳನೆ ಆವೃತ್ತಿಯ ಪೆಪ್ಸಿ ಐಪಿಎಲ್‌ನ ವೇಳಾಪಟ್ಟಿಯನ್ನು ಪ್ರಕಟಿಸಲು ಸಂತೋಷವಾಗುತ್ತಿದೆ ಎಂದು ಬಿಸಿಸಿಐ ಕಾರ್ಯದರ್ಶಿ ಸಂಜಯ್ ಪಾಟೀಲ್ ತಿಳಿಸಿದ್ದಾರೆ. ಐಪಿಎಲ್ ಟೂರ್ನಿಯ ಮೊದಲ ಹಂತದ ಪಂದ್ಯಗಳು ಎಪ್ರಿಲ್ 16 ರಿಂದ 30ರ ತನಕ ಯುಎಇಯ ಮೂರು ತಾಣಗಳಾದ ಅಬುಧಾಬಿ, ದುಬೈ ಹಾಗೂ ಶಾರ್ಜಾದಲ್ಲಿ ನಡೆಯಲಿದೆ.

ಮೂರು ದೇಶಗಳಲ್ಲಿ ಐಪಿಎಲ್ 7 ಆಟೋಟ

ಏ. 16 ರಿಂದ 30ರ ತನಕ ಕನಿಷ್ಠ 16 ಪಂದ್ಯಗಳು ಯುಎಇನಲ್ಲಿ ನಡೆಯಲಿರುವುದು. ಈ ಅವಧಿಯಲ್ಲಿ ಐಪಿಎಲ್ ‌ನ್ನು ಆಯೋಜಿಸಲು ಸಹಕರಿಸಿದ ಯುಎಇ ಕ್ರಿಕೆಟ್ ಮಂಡಳಿ, ಮಂಡಳಿಯ ಅಧ್ಯಕ್ಷರು ಹಾಗೂ ಯುಎಇ ಸರಕಾರಕ್ಕೆ ಕೃತಜ್ಞತೆ ಸಲ್ಲಿಸುವುದಾಗಿ ಬಿಸಿಸಿಐ ಹೇಳಿದೆ.

ಐಪಿಎಲ್ ‌ನ ದ್ವಿತೀಯಾರ್ಧದ ಪಂದ್ಯಗಳು ಬಾಂಗ್ಲಾದೇಶದಲ್ಲಿ ನಡೆಯುವ ಸಾಧ್ಯತೆಯಿದೆ. ಬಿಸಿಸಿಐ ಕೇಂದ್ರ ಸರಕಾರದಿಂದ ಅನುಮತಿ ಪಡೆಯಲು ಯಶಸ್ವಿಯಾದರೆ ಐಪಿಎಲ್ ‌ನ ಕೊನೆಯ ಹಂತದ ಪಂದ್ಯಗಳು ಬಾಂಗ್ಲಾದ ಬದಲಿಗೆ ಭಾರತದಲ್ಲಿ ನಡೆಯುವ ಸಾಧ್ಯತೆಯೂ ಇದೆ. ಚುನಾವಣೆ ಕೊನೆಗೊಳ್ಳುವ ರಾಜ್ಯಗಳಲ್ಲಿ ಐಪಿಎಲ್‌ನ್ನು ನಡೆಸಲು ಅನುಮತಿ ನೀಡುವಂತೆ ಕೇಂದ್ರ ಸರಕಾರವನ್ನು ಬಿಸಿಸಿಐ ವಿನಂತಿಸಿಕೊಳ್ಳಲಿದೆ. ಒಂದು ವೇಳೆ ಭಾರತದಲ್ಲಿ ಐಪಿಎಲ್ ಸಾಧ್ಯವಾಗದಿದ್ದರೆ ಬಾಂಗ್ಲಾದೇಶದಲ್ಲಿ ನಡೆಯಲಿರುವುದು. ಬಾಂಗ್ಲಾ ಕ್ರಿಕೆಟ್ ಮಂಡಳಿ ಹಾಗೂ ಬಾಂಗ್ಲಾ ಸರಕಾರಕ್ಕೆ ಬಿಸಿಸಿಐ ಆಭಾರಿಯಾಗಿದೆ ಎಂದು ಸಂಜಯ್ ಪಾಟೀಲ್ ಹೇಳಿದ್ದಾರೆ.

ಸಾರ್ವತ್ರಿಕ ಚುನಾವಣೆ ಏ.7 ರಿಂದ ಮೇ 12ರ ತನಕ 9 ಹಂತದಲ್ಲಿ ನಡೆಯಲಿದೆ. ಈ ಹಿನ್ನೆಲೆಯಲ್ಲಿ ಸರಕಾರ ಐಪಿಎಲ್ ‌ಗೆ ಭದ್ರತೆ ನೀಡಲು ನಿರಾಕರಿಸಿದೆ. ಚುನಾವಣೆಯ ಕಾರಣಕ್ಕೆ ಐಪಿಎಲ್ ಟೂರ್ನಿಯು ಎರಡನೆ ಬಾರಿ ದೇಶದಿಂದ ಹೊರಗೆ ನಡೆಯುತ್ತಿದೆ. 2009ರಲ್ಲಿ ಲೋಕಸಭೆ ಚುನಾವಣೆಯ ಹಿನ್ನೆಲೆಯಲ್ಲಿ ಇಡೀ ಟೂರ್ನಿಯು ದಕ್ಷಿಣ ಆಫ್ರಿಕಕ್ಕೆ ಸ್ಥಳಾಂತರಗೊಂಡಿತ್ತು.

80 ಹಾಗೂ 90ರ ದಶಕದಲ್ಲಿ ಭಾರತೀಯ ಕ್ರಿಕೆಟ್‌ಗೆ ಯುಎಇ ಜನಪ್ರಿಯ ತಾಣವಾಗಿತ್ತು. 2000ರಲ್ಲಿ ಮ್ಯಾಚ್ ಫಿಕ್ಸಿಂಗ್ ಹಗರಣ ಬೆಳಕಿಗೆ ಬಂದ ನಂತರ ಭಾರತೀಯ ರಾಷ್ಟ್ರೀಯ ತಂಡವನ್ನು ಯುಎಇಗೆ ಕಳುಹಿಸಲಾಗಿಲ್ಲ. ಕಳೆದ ದಶಕದಲ್ಲಿ ಭಾರತ ಕೇವಲ ಎರಡು ಏಕದಿನ ಪಂದ್ಯಗಳನ್ನು ಮಾತ್ರ ಆಡಿದೆ. (ಪಿಟಿಐ)

English summary
United Arab Emirates will stage the initial phase of the IPL while Bangladesh was kept on standby for some of the matches by the BCCI, ending weeks of speculation over the venues of the high-profile event which was today scheduled from April 16 to June 1.
ಅಭಿಪ್ರಾಯ ಬರೆಯಿರಿ