Englishहिन्दीമലയാളംதமிழ்తెలుగు

ಹದಿನಾಲ್ಕು ವರ್ಷಗಳ ಕರ್ನಾಟಕ ರಣಜಿ ಕನಸು ನನಸು

Posted by:
Updated: Sunday, February 2, 2014, 16:30 [IST]
 

ಹೈದರಾಬಾದ್, ಫೆ. 2 : ಹದಿನಾಲ್ಕು ವರ್ಷಗಳ ಆಸೆ ಕಡೆಗೂ ಕೈಗೂಡಿದೆ. ಹೈದರಾಬಾದ್ ನ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಮಹಾರಾಷ್ಟ್ರವನ್ನು 7 ವಿಕೆಟ್ ಗಳಿಂದ ಸದೆಬಡಿದಿರುವ ಕರ್ನಾಟಕ ಏಳನೇ ಬಾರಿ ರಣಜಿ ಟ್ರೋಫಿಯನ್ನು ಎತ್ತಿಹಿಡಿದಿದೆ.

ದಾವಣಗೆರೆ ಎಕ್ಸ್ ಪ್ರೆಸ್ ವಿನಯ್ ಕುಮಾರ್ ನಾಯಕತ್ವದ ಕರ್ನಾಟಕ ಕ್ರಿಕೆಟ್ ತಂಡ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಇತಿಹಾಸ ನಿರ್ಮಿಸಿದೆ. ಐದನೇ ದಿನ ಭಾನುವಾರ 64 ಓವರುಗಳಲ್ಲಿ 157 ರನ್ ಗಳ ಗುರಿ ಬೆನ್ನತ್ತಿದ ಕರ್ನಾಟಕ 40.5 ಓವರುಗಳಲ್ಲಿ, ಕರುಣ್ ನಾಯರ್ ಸಿಕ್ಸರ್ ಎತ್ತುವುದರೊಂದಿಗೆ ಗುರಿ ಮುಟ್ಟಿತು.

ಎಲ್ಲ ವಿಭಾಗಗಳಲ್ಲಿ ಅತ್ಯದ್ಭುತ ಆಟ ಪ್ರದರ್ಶಿಸಿದ ಕರ್ನಾಟಕದ ಯುವ ಆಟಗಾರರ ತಂಡ ಐದು ದಿನಗಳ ಆಟ ಆರಂಭವಾಗುವ ಮುನ್ನವೇ ಫೆಪರಿಟ್ ತಂಡವಾಗಿತ್ತು. ಟೂರ್ನಿಯುದ್ದಕ್ಕೂ ಎಲ್ಲ ತಂಡಗಳನ್ನು ಅಧಿಕಾರಯುತವಾಗಿ ಸೋಲಿಸಿ ಫೈನಲ್ ತಲುಪಿತ್ತು. ಮೊದಲ ಇನ್ನಿಂಗ್ಸ್ ನಲ್ಲಿ ಶತಕ ಬಾರಿಸಿದ್ದ ಕೆಎಲ್ ರಾಹುಲ್ ಅವರು ಪಂದ್ಯದ ಪುರುಷೋತ್ತಮರಾದರು.

ಹದಿನಾಲ್ಕು ವರ್ಷಗಳ ಕರ್ನಾಟಕ ರಣಜಿ ಕನಸು ನನಸು

ವಿಜಯದ ರನ್ ಬಾರಿಸುತ್ತಿದ್ದಂತೆ ಎಲ್ಲ ಆಟಗಾರರು, ಬೆಂಬಲಿಗರು ಮೈದಾನಕ್ಕೆ ನುಗ್ಗಿದರು. ಹಳದಿ ಕೆಂಪು ಬಣ್ಣದ ಕನ್ನಡ ಧ್ವಜ ಮೈದಾನದೆಲ್ಲೆಡೆ ಹಾರಾಡುತ್ತಿದ್ದವು. ಜಯದ ಕೇಕೆ ಮುಗಿಲು ಮುಟ್ಟಿತ್ತು. ಹಲವಾರು ಆಟಗಾರರಲ್ಲಿ ಆನಂದಭಾಷ್ಪ ತುಳುಕುತ್ತಿತ್ತು. ಇದಕ್ಕೂ ಮೊದಲು ಎಂಟು ಬಾರಿ ಕರ್ನಾಟಕ ರಣಜಿ ಫೈನಲ್ ನಲ್ಲಿ ಸೋಲುಂಡಿತ್ತು.

ಸುನೀಲ್ ಜೋಶಿ ನಾಯಕತ್ವದಲ್ಲಿ 1998-99 ಸೀಸನ್ ನಲ್ಲಿ ಗೆದ್ದ ನಂತರ ರಣಜಿ ಟ್ರೋಫಿ ಕರ್ನಾಟಕಕ್ಕೆ ಒಲಿದಿರಲಿಲ್ಲ. ರಣಜಿ ಟ್ರೋಫಿ ಗೆದ್ದ ಕರ್ನಾಟಕದ ಆರನೇ ನಾಯಕರಾಗಿದ್ದಾರೆ ವಿನಯ್ ಕುಮಾರ್. ಇಎಎಸ್ ಪ್ರಸನ್ನ (ಎರಡು ಬಾರಿ), ಬ್ರಿಜೇಶ್ ಪಟೇಲ್, ಅನಿಲ್ ಕುಂಬ್ಳೆ, ರಾಹುಲ್ ದ್ರಾವಿಡ್ ಮತ್ತು ಸುನೀಲ್ ಜೋಶಿ ನಾಯಕತ್ವದಲ್ಲಿ ಕರ್ನಾಟಕ ರಣಜಿ ವಿಜಯಿಯಾಗಿದೆ.

ಅಚ್ಚರಿಯ ಸಂಗತಿಯೆಂದರೆ, ಈ ಬಾರಿ ಬ್ಯಾಟಿಂಗ್ ಕೋಚ್ ಆಗಿರುವ ಜೆ ಅರುಣ್ ಕುಮಾರ್ ಮತ್ತು ಬೌಲಿಂಗ್ ಕೋಚ್ ಆಗಿರುವ ಮನ್ಸೂರ್ ಅಲಿ ಖಾನ್ ಅವರು ಆರನೇ ಬಾರಿ ಗೆದ್ದ ತಂಡದಲ್ಲಿ ಆಡಿದ್ದರು. ಜಾಕ್ ಮತ್ತು ಮ್ಯಾಕ್ ಎಂಬ ನಿಕ್ ಹೆಸರಿನಿಂದ ಖ್ಯಾತರಾಗಿರುವ ಇವರಿಬ್ಬರಿಗೂ ಇದು ಡಬಲ್ ಡಿಲೈಟ್. 1999ರಲ್ಲಿ ನಡೆದ ಪಂದ್ಯದಲ್ಲಿ ಅರುಣ್ ಸೆಂಚುರಿ ಬಾರಿಸಿದ್ದರು ಮತ್ತು ಬೆಂಗಳೂರಿನಲ್ಲಿ ನಡೆದ ಪಂದ್ಯದಲ್ಲಿ ಕರ್ನಾಟಕ ಮಧ್ಯಪ್ರದೇಶದ ವಿರುದ್ಧ 96 ರನ್ ಜಯ ಸಾಧಿಸಿತ್ತು.

ಸಂಕ್ಷಿಪ್ತ ಸ್ಕೋರ್ ವಿವರ

ಕರ್ನಾಟಕ 157/3, 40.5 ಓವರುಗಳಲ್ಲಿ (ರಾಬಿನ್ ಉತ್ತಪ್ಪ 36, ಕೆಎಲ್ ರಾಹುಲ್ 29, ಅಮಿತ್ ವರ್ಮಾ 38, ಮನೀಷ್ ಪಾಂಡೆ 28 ಅಜೇಯ, ಕರುಣ್ ನಾಯರ್ 20 ಅಜೇಯ) ಮತ್ತು 515 (ಮೊದಲ ಇನ್ನಿಂಗ್ಸ್)

ಮಹಾರಾಷ್ಟ್ರ 366 ಆಲೌಟ್ 91.2 ಓವರುಗಳಲ್ಲಿ (ಕೇದಾರ್ ಜಾಧವ್ 112, ಅಂಕಿತ್ ಬಾವ್ನೆ 61, ಶ್ರೀಕಾಂತ್ ಮುಂಡೆ 42, ಆರ್ ವಿನಯ್ ಕುಮಾರ್ 4/116, ಶ್ರೇಯಸ್ ಗೋಪಾಲ್ 4/47) ಮತ್ತು 305 (ಮೊದಲ ಇನ್ನಿಂಗ್ಸ್)

ಕರ್ನಾಟಕದ ಆಟಗಾರರು : ಆರ್ ವಿನಯ್ ಕುಮಾರ್ (ನಾಯಕ), ಕೆಎಲ್ ರಾಹುಲ್, ರಾಬಿನ್ ಉತ್ತಪ್ಪ, ಗಣೇಶ್ ಸತೀಶ್, ಅಮಿತ್ ವರ್ಮಾ, ಮನೀಷ್ ಪಾಂಡೆ, ಕರುಣ್ ನಾಯರ್, ಶ್ರೇಯಸ್ ಗೋಪಾಲ್, ಸಿಎಂ ಗೌತಮ್ (ಉಪನಾಯಕ, ವಿಕೆಟ್ ಕೀಪರ್), ಅಭಿಮನ್ಯು ಮಿಥುನ್, ಎಸ್ ಅರವಿಂದ್

Story first published:  Sunday, February 2, 2014, 15:43 [IST]
English summary
Karnataka defeated Maharashtra by seven wickets to win the 2013-14 season's Ranji Trophy here on Sunday at the Rajiv Gandhi International Stadium.
ಅಭಿಪ್ರಾಯ ಬರೆಯಿರಿ