Englishहिन्दीമലയാളംதமிழ்తెలుగు

'ದೇವರ' ಕಣ್ಣಂಚಿನಲ್ಲಿಯೂ ನೀರು ಜಿನುಗಿದಾಗ

Posted by:
Updated: Saturday, November 16, 2013, 17:45 [IST]
 

ಮುಂಬೈ, ನ. 16 : ಕ್ರಿಕೆಟ್ ಅಂಗಳದ 'ದೇವರು' ಸಚಿನ್ ರಮೇಶ್ ತೆಂಡೂಲ್ಕರ್ ಅವರ ಕಣ್ಣಂಚಿನಲ್ಲಿ ಬಳಬಳನೆ ಜಿನುಗಿದ ಆ ಘಳಿಗೆಯಲ್ಲಿ ಅದೆಷ್ಟು ಅಭಿಮಾನಿಗಳ ಕಣ್ಣಲ್ಲಿಯೂ ಅಶ್ರುಧಾರೆ ಹರಿದಿತ್ತೋ, ಬಲ್ಲವರಾರು? ಸತತ 24 ವರ್ಷಗಳ ಕಾಲ ಕೈಯಲ್ಲಿ ಬ್ಯಾಟ್ ಹಿಡಿದು ಕೋಟ್ಯಾನುಕೋಟಿ ಕ್ರಿಕೆಟ್ ಪ್ರೇಮಿಗಳನ್ನು ರಂಜಿಸಿದ ಸಚಿನ್ ಕೊನೆಯ ಬಾರಿ ಮೈದಾನದಿಂದ ಹೊರನಡೆದಿದ್ದಾರೆ.

ನೂರು ಸೆಂಚುರಿಗಳನ್ನು ಬಾರಿಸಿದ, ಇನ್ನೂ ಅತ್ಯುತ್ತಮ ಫಾರಂನಲ್ಲಿ ಇರುವ ಸಚಿನ್ ತೆಂಡೂಲ್ಕರ್ ಅವರಿಗೆ ಉಕ್ಕಿಬಂದ ಭಾವುಕತೆಯನ್ನು ತಡೆಹಿಡಿಯಲಾಗಲೇ ಇಲ್ಲ. ವೆಸ್ಟ್ ಇಂಡೀಸ್ ನ ಎಸ್ ಟಿ ಗ್ಯಾಬ್ರಿಯೆಲ್ ಅವರು ಶಾಮಿ ಅಹ್ಮದ್ ಅವರ ಬೌಲಿಂಗಲ್ಲಿ ಕ್ಲೀನ್ ಬೌಲ್ಡ್ ಆದಾಗ ಸಚಿನ್ ಸುದೀರ್ಘ ಪರ್ವಕ್ಕೆ ತೆರೆಬಿದ್ದಿತು. [ಸಚಿನ್ ವಿದಾಯದ ಮಾತುಗಳು]

ಆ ಕ್ಷಣ ಅವರಲ್ಲಿ ಮಾತ್ರವಲ್ಲ, ಕ್ರಿಕೆಟ್ ಆಟಗಾರರು ಮಾತ್ರವಲ್ಲ, ಅವರ ಕುಟುಂಬದವರು ಮಾತ್ರವಲ್ಲ ಇಡೀ ಕ್ರೀಡಾಂಗಣದಲ್ಲಿ ಯಾರ ಬಳಿಯೂ ಮಾತಿರಲಿಲ್ಲ. ಮೌನದ ಕಣ್ಣೀರೇ ಎಲ್ಲ ಕಥೆಯನ್ನು ಬಿಡಿಸಿ ಹೇಳುತ್ತಿತ್ತು. ಬಿಳಿ ಹ್ಯಾಟ್ ಅಡಿಯಲ್ಲಿ ಒಸರುತ್ತಿದ್ದ ಅಶ್ರುಧಾರೆಯನ್ನು ಎಡಗೈನಿಂದ ಒರೆಸಿಕೊಳ್ಳುತ್ತಲೇ ಸಚಿನ್ ಕೈಯಲ್ಲಿ ಸ್ಟಂಪ್ ಹಿಡಿದು ಎಲ್ಲರಿಗೂ ಧನ್ಯವಾದ ಹೇಳುತ್ತ ಹೊರನಡೆದರು.

'ದೇವರ' ಕಣ್ಣಂಚಿನಲ್ಲಿಯೂ ನೀರು ಜಿನುಗಿದಾಗ

ನಂತರ ಇಡೀ ವಾಂಖೆಡೆ ಕ್ರೀಡಾಂಗಣವೇ ಎದ್ದು ನಿಂತು ಕ್ರಿಕೆಟ್ ದೇವರಿಗೆ ಗೌರವ ಸಲ್ಲಿಸಿತು. ಪ್ರೇಕ್ಷಕರು, ಅಭಿಮಾನಿಗಳು ಒಕ್ಕೊರಲಿನಿಂದ ಮುಗಿಲು ಮುಟ್ಟುವಂತೆ 'ಸಚಿನ್, ಸಚಿನ್' ಎಂದು ಘೋಷ ಕೂಗುತ್ತಲೇ ಇದ್ದರು.

ಇಷ್ಟೊಂದು ಸುದೀರ್ಘವಾಗಿ ಆಡಿದ ಮತ್ತೊಬ್ಬ ಆಟಗಾರ ಹುಟ್ಟಿಲ್ಲ, ಮತ್ತೆ ಹುಟ್ಟಿಬರಲಿಕ್ಕಿಲ್ಲ. The Legend Never Retires ಎಂಬ ಬರಹ ಡಿಜಿಟಲ್ ಬೋರ್ಡ್ ಮೇಲೆ ಮಿನುಗುತ್ತಿತ್ತು. ಹೌದು, ಸಚಿನ್ ತೆಂಡೂಲ್ಕರ್ ನಿವೃತ್ತಿ ಆಗಿಲ್ಲ, ಆಗುವುದೂ ಇಲ್ಲ. ಅವರು ಮಾಡಿರುವ ಅಸಂಖ್ಯಾತ ದಾಖಲೆಗಳೇ ಅವರ ಆಟದ ನೆನಪನ್ನು ತರುತ್ತಲೇ ಇರುತ್ತವೆ.

ವೆಸ್ಟ್ ಇಂಡೀಸ್ ವಿರುದ್ಧ ಕೋಲ್ಕತಾ ಮತ್ತು ಮುಂಬೈ ಟೆಸ್ಟ್ ಗಳೆರಡನ್ನೂ ಗೆಲ್ಲುವ ಮುಖಾಂತರ ಭಾರತ ಕ್ರಿಕೆಟ್ ತಂಡ ಅವರಿಗೆ ಗೆಲುವಿನ ವಿದಾಯ ಹೇಳಿದ್ದಾರೆ. ಮುಂಬೈ ಟೆಸ್ಟ್ ನ ಮೊದಲ ಇನ್ನಿಂಗ್ಸ್ ನಲ್ಲಿ ಕೂಡ 74 ರನ್ ಗಳಿಸಿ, ತಾವು ಇನ್ನೂ ಉತ್ತಮ ಫಾರಂನಲ್ಲಿ ಇದ್ದಿರುವುದನ್ನು ಅವರು ಸಾಬೀತುಪಡಿಸಿದ್ದರು.

ಸಚಿನ್ ತೆಂಡೂಲ್ಕರ್ ಅಂತಾರಾಷ್ಟ್ರೀಯ ದಾಖಲೆ

ಪಂದ್ಯಗಳು : 664
ರನ್ : 34357
ಐವತ್ತು : 164
ಸೆಂಚುರಿ : 100
ಸರಾಸರಿ : 48.53
ಸ್ಟ್ರೈಕ್ ದರ : 86.1
ಗರಿಷ್ಠ : 248*

Story first published:  Saturday, November 16, 2013, 12:13 [IST]
English summary
Sachin Tendulkar, The Legend Never Retires. Though Sachin may have played his last match in the international level, he has huge responsibility to play and serve the country off the cricket field.
ಅಭಿಪ್ರಾಯ ಬರೆಯಿರಿ