Englishहिन्दीമലയാളംதமிழ்తెలుగు

ಕ್ರಿಕೆಟ್ ದೇವರ ಮೇಲೆ ಗುಲಾಬಿ ಹೂ ಮಳೆ

Posted by:
Published: Tuesday, October 29, 2013, 13:01 [IST]
 

ಕೋಲ್ಕತ್ತಾ, ಅ.29: ಕ್ರಿಕೆಟ್ ಅಭಿಮಾನಿಗಳ ಸಚಿನ್ ತೆಂಡೂಲ್ಕರ್ ಅವರ 199ನೇ ಟೆಸ್ಟ್ ಪಂದ್ಯದ ಆತಿಥ್ಯ ವಹಿಸಿಕೊಂಡಿರುವ ಪಶ್ಚಿಮ ಬಂಗಾಳ ಕ್ರಿಕೆಟ್ ಸಂಸ್ಥೆ (ಸಿಎಬಿ) ವೆಸ್ಟ್ ಇಂಡೀಸ್ ವಿರುದ್ಧ ಪಂದ್ಯವನ್ನು ಅವಿಸ್ಮರಣೀಯಗೊಳಿಸಲು ಸಜ್ಜಾಗಿದೆ.

ಟೆಸ್ಟ್ ಪಂದ್ಯದ ಮೊದಲ ದಿನ ಸೇರುವ 65,000 ಕ್ರಿಕೆಟ್ ಅಭಿಮಾನಿಗಳಿಗೆ ಸಚಿನ್ ಮುಖವಾಡ ಧರಿಸುವ ಅವಕಾಶ, ನಂತರ ಮಾಸ್ಟರ್ ಬ್ಲಾಸ್ಟರ್ ಭಾವಚಿತ್ರ ಹಾಗೂ ಅವರ ಕುರಿತಾಗಿ ಇರುವ ಘೋಷಣೆಗಳಿಂದ ಕೂಡಿದ ಪ್ರದರ್ಶನ ಫಲಕ ಹಿಡಿಯುವುದು, ಮೂರನೇ ದಿನ ಲಿಟಲ್ ಚಾಂಪಿಯನ್ ಭಾವಚಿತ್ರ ಹಾಗೂ ಅವರ ಕುರಿತಾದ ಘೋಷಣೆಗಳಿಂದ ಕೂಡಿರುವ ಬಲೂನ್ ಹಾರಾಟ, ನಾಲ್ಕನೇ ದಿನ ತೆಂಡೂಲ್ಕರ್ ಕುರಿತ ಕೃತಿ ಬಿಡುಗಡೆ, ಐದನೇ ದಿನ ಆಗಸದಿಂದ ಹೆಲಿಕಾಪ್ಟರ್ ನಲ್ಲಿ ಸಚಿನ್ ಗಾಗಿ ಹೂ ಮಳೆ. ಈ ರೀತಿಯಲ್ಲಿ ಸಿಎಬಿ ತೆಂಡೂಲ್ಕರ್ ಅವರಿಗೆ ಅರ್ಥಪೂರ್ಣ ವಿದಾಯ ಹೇಳಲು ಯತ್ನಿಸಿದೆ.

"ಪಂದ್ಯದ ಮೊದಲ ಹಾಗೂ ಎರಡನೇ ದಿನದಲ್ಲಿ ಸೇರುವ 65,000 ಪ್ರೇಕ್ಷಕರಲ್ಲಿ ಪ್ರತಿಯೊಬ್ಬರೂ ಸಚಿನ್ ಮುಖವಾಡ ಧರಿಸಲಿದ್ದಾರೆ. ಮೊದಲ ದಿನ ಮುಖವಾಡ ವಿಶೇಷ ಆಕರ್ಷಣೆಯಾದರೆ, ಎರಡನೇ ದಿನ ಪ್ರತಿಯೊಬ್ಬರೂ ಸಚಿನ್ ಕುರಿತ ಹೇಳಿಕೆ, ಮೆಚ್ಚುಗೆಯ ಮಾತುಗಳು, ವಿದಾಯದ ನುಡಿಗಳಿಂದ ಕೂಡಿದ ಪ್ರದರ್ಶನ ಫಲಕವನ್ನು ಹಿಡಿದು ಕ್ರೀಡಾಂಗಣದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ." ಎಂದು ಸಿಎಬಿ ಖಜಾಂಚಿ ವಿಶ್ವರೂಪ್ ಡೇ ಹೇಳಿದ್ದಾರೆ.

ಕ್ರಿಕೆಟ್ ದೇವರ ಮೇಲೆ ಗುಲಾಬಿ ಹೂ ಮಳೆ

ಈಗಾಗಲೇ ಏಕದಿನ ಹಾಗೂ ಅಂತಾರಾಷ್ಟ್ರೀಯ ಟಿ-20ಯಿಂದ ನಿವೃತ್ತಿ ಹೊಂದಿರುವ ತೆಂಡೂಲ್ಕರ್ ನವೆಂಬರ್ 6-10 ರ ತನಕ 199ನೇ ಟೆಸ್ಟ್ ಪಂದ್ಯವನ್ನು ನವೆಂಬರ್ 14ರಿಂದ 18ವರೆಗೆ ಮುಂಬಯಿಯಲ್ಲಿ 200ನೇ ಟೆಸ್ಟ್ ಪಂದ್ಯವನ್ನಾಡಿ ಟೆಸ್ಟ್ ಕ್ರಿಕೆಟ್ ಗೂ ವಿದಾಯ ಹೇಳಲಿದ್ದಾರೆ.

"199ನೇ ಟೆಸ್ಟ್ ಪಂದ್ಯದ ಮೂರನೇ ದಿನ 199 ಬಲೂನ್ ಗಳ ಗುಚ್ಛವನ್ನು ಕ್ರೀಡಾಂಗಣದಿಂದ ಹಾರಿ ಬಿಡಲಾಗುವುದು. ಈ ಬಲೂನ್‌ನಲ್ಲಿ ಸಚಿನ್ ಅವರ ಭಾವಚಿತ್ರ ಹಾಗೂ ಅವರನ್ನು ಹಾರೈಸುವ ಬರಹಗಳಿರುತ್ತವೆ." ಎಂದು ಡೇ ಹೇಳಿದ್ದಾರೆ.

199ನೇ ಪಂದ್ಯದ ಟಿಕೆಟ್‌ನಲ್ಲೂ ತೆಂಡೂಲ್ಕರ್ ಅವರ ಭಾವಚಿತ್ರ ಹಾಗೂ ಸಹಿಯನ್ನೊಳಗೊಂಡಿದೆ. ಪ್ರತಿಯೊಂದು ದಿನದ ಟಿಕೆಟ್ ಕೂಡ ವಿಭಿನ್ನವಾಗಿರುತ್ತದೆ. ಮೊದಲ ದಿನದ ಟಿಕೆಟ್‌ನಲ್ಲಿ ಅವರ ಬಾಲ್ಯದ ಚಿತ್ರ, ಎರಡನೇ ದಿನದ ಟಿಕೆಟ್‌ನಲ್ಲಿ ಮೈಲಿಗಲ್ಲೊಂದನ್ನು ದಾಟಿ ಸಚಿನ್ ಸಂಭ್ರಮ, ನಂತರದ ಮೂರು ದಿನಗಳ ಟಿಕೆಟ್‌ನಲ್ಲಿ ಮುಂಬಯಿ ಬ್ಯಾಟ್ಸ್‌ಮನ್ ಪ್ರಯೋಗಿಸಿದ ವಿಭಿನ್ನ ಸ್ಟ್ರೋಕ್ ಕಾಣಬಹುದು.

200ನೇ ಟೆಸ್ಟ್ ಪಂದ್ಯದ ಆತಿಥ್ಯ ವಹಿಸುವ ಮುಂಬಯಿ ಕ್ರಿಕೆಟ್ ಸಂಸ್ಥೆಯೂ ಟಿಕೆಟ್‌ನಲ್ಲಿ ತೆಂಡೂಲ್ಕರ್ ಚಿತ್ರವನ್ನು ಛಾಪಿಸಿದೆ. 1500ರಿಂದ 10,000 ರೂ. ಮೌಲ್ಯದ ಟಿಕೆಟ್ ಖರೀದಿಸಿ ಪಂದ್ಯ ವೀಕ್ಷಿಸುವವರಿಗೆ ಚಹಾ ಮತ್ತು ತಿನಿಸು ನೀಡಲಾಗುವುದು. ಟಿಕೆಟ್‌ಗಳನ್ನು ಕೌಂಟರ್‌ನಲ್ಲಿ ಮಾರಾಟ ಮಾಡಲಾಗುವುದಿಲ್ಲ, ಎಲ್ಲವೂ ಆನ್‌ಲೈನ್‌ನಲ್ಲಿ ಲಭ್ಯ. ತೆಂಡೂಲ್ಕರ್ ಸಲಹೆ ಮೇರೆಗೆ ಶಾಲಾ ಮಕ್ಕಳಿಗೆ ವಿಶೇಷ ಆಹ್ವಾನವಿರುತ್ತದೆ. ಪ್ರದರ್ಶನ ಫಲಕದಲ್ಲಿ ಸಚಿನ್ ಕುರಿತಾಗಿ ಉತ್ತಮ ಘೋಷಣೆಗಳನ್ನು ಬರೆದವರಿಗೆ ಪಂದ್ಯ ಮುಗಿದ ನಂತರ ಸಚಿನ್ ಅವರನ್ನು ಭೇಟಿಯಾಗುವ ಅವಕಾಶವಿರುತ್ತದೆ.

200ನೇ ಪಂದ್ಯದ ಟಾಸ್ ಗಾಗಿ ವಿಶೇಷ ನಾಣ್ಯವನ್ನು ಸಿದ್ಧಪಡಿಸಲಾಗುವುದು ಎಂದು ಮುಂಬಯಿ ಕ್ರಿಕೆಟ್ ಸಂಸ್ಥೆಯ ಹಿರಿಯ ಅಧಿಕಾರಿ ಪ್ರೊ.ರತ್ನಾಕರ ಶೆಟ್ಟಿ ಹೇಳಿದ್ದಾರೆ. ನಾಣ್ಯದ ಒಂದು ಭಾಗದಲ್ಲಿ ಸಚಿನ್ ಭಾವಚಿತ್ರವಿದ್ದರೆ, ಇನ್ನೊಂದೆಡೆ ಬಿಸಿಸಿಐ ಅಥವಾ ಎಂಸಿಎ ಲಾಂಛನವಿರುತ್ತದೆ. ಪಂದ್ಯ ಆರಂಭವಾಗುವುದಕ್ಕೆ ಮುನ್ನ ಬಿಸಿಸಿಐ ಅಧ್ಯಕ್ಷ ಎನ್. ಶ್ರೀನಿವಾಸನ್ ಕ್ರಿಕೆಟ್ ದಿಗ್ಗಜ ತೆಂಡೂಲ್ಕರ್ ಅವರನ್ನು ಸನ್ಮಾನಿಸಲಿದ್ದಾರೆ.

English summary
One hundred and ninety-nine kg of rose petals will be showered from the skies, while 199 bunches of balloons will be floating in the air to greet batting great Sachin Tendulkar at the Eden Gardens, as he plays the 199th and penultimate Test match of his career at the iconic ground November 6-10.
ಅಭಿಪ್ರಾಯ ಬರೆಯಿರಿ