Englishहिन्दीമലയാളംதமிழ்తెలుగు

ಕ್ರಿಕೆಟರ್ಸ್ ಗೆ ದಾವೂದ್ ಕಾರು ಗಿಫ್ಟ್ ಆಮಿಷ: ದಿಲೀಪ್

Posted by:
Published: Monday, October 28, 2013, 17:13 [IST]
 

ಕ್ರಿಕೆಟರ್ಸ್ ಗೆ ದಾವೂದ್ ಕಾರು ಗಿಫ್ಟ್ ಆಮಿಷ: ದಿಲೀಪ್
 

ನವದೆಹಲಿ, ಅ.28: 1987ರ ಶಾರ್ಜಾಕಪ್ ಸರಣಿಯಲ್ಲಿ ಪಾಕಿಸ್ತಾನ ತಂಡವನ್ನು ಸೋಲಿಸಿದರೆ ಭಾರತ ತಂಡದ ಪ್ರತಿಯೊಬ್ಬ ಆಟಗಾರನಿಗೂ ಕಾರು ಗಿಫ್ಟ್ ನೀಡುತ್ತೇನೆ ಎಂದು ಭೂಗತ ಪಾತಕಿ ದಾವೂದ್ ಇಬ್ರಾಹಿಂ ಆಮಿಷ ಒಡ್ಡಿದ್ದ ಎಂದು ಮಾಜಿ ನಾಯಕ ದಿಲೀಪ್ ವೆಂಗ್ ಸರ್ಕಾರ್ ಹೇಳಿದ್ದಾರೆ.

ಖಾಸಗಿ ಸುದ್ದಿವಾಹಿನಿಯೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ ಮಾತನಾಡಿರುವ ವೆಂಗ್ ಸರ್ಕಾರ್, 1987ರಲ್ಲಿ ಶಾರ್ಜಾದಲ್ಲಿ ನಡೆದ ಏಷ್ಯಾಕಪ್ ಸರಣಿಯ ಫೈನಲ್ ಪಂದ್ಯಕ್ಕೂ ಮುನ್ನ ನಮ್ಮ ಡ್ರೆಸಿಂಗ್ ಕೊಠಡಿಗೆ ಆಗಮಿಸಿದ್ದ ದಾವೂದ್, ತನ್ನನ್ನು ಉದ್ಯಮಿ ಎಂದು ಪರಿಚಯಿಸಿಕೊಂಡಿದ್ದ. ಅಂದು ನಮಗೆ ದಾವೂದ್ ಮುಖ ಪರಿಚಯವಿಲ್ಲದ ಕಾರಣ, ಅವನು ಉದ್ಯಮಿಯೆಂದೇ ಎಲ್ಲರೂ ಭಾವಿಸಿದ್ದೆವು. ಅಂದು ಆತ ಫೈನಲ್ ಪಂದ್ಯದಲ್ಲಿ ನೀವು ಪಾಕಿಸ್ತಾನ ತಂಡವನ್ನು ಸೋಲಿಸಿದರೆ ನಿಮ್ಮ ತಂಡದ ಎಲ್ಲ ಆಟಗಾರರಿಗೂ ಟೊಯೋಟಾ ಕರೋಲಾ ಕಾರನ್ನು ಉಡುಗೊರೆಯಾಗಿ ನೀಡುವುದಾಗಿ ಹೇಳಿದ್ದ.

ಅದೇ ವೇಳೆಗೆ ಕೊಠಡಿಗೆ ಆಗಮಿಸಿದ ಕಪಿಲ್ ದೇವ್, ದಾವೂದ್ ಯಾರೆಂದು ವಿಚಾರಿಸಿ ಹೀಗೆಲ್ಲಾ ಅಪ್ಪಣೆ ಇಲ್ಲದೆ ಡ್ರೆಸಿಂಗ್ ಕೊಠಡಿಗೆ ಬರಬಾರದು ಎಂದು ಕೂಡಲೇ ಆತನನ್ನು ಹೊರಗೆ ಕಳುಹಿಸಿದ್ದರು. ಅಲ್ಲದೆ ಆತನ ಪ್ರಸ್ತಾಪದ ಕುರಿತು ಕೋಪಗೊಂಡು ಅವನ ಪ್ರಸ್ತಾಪವವನ್ನು ಖಾರವಾಗಿಯೇ ತಿರಸ್ಕರಿಸಿದ್ದರು. ಕಪಿಲ್ ಕೋಪವನ್ನು ಕಂಡ ದಾವೂದ್ ಕೂಡಲೇ ಹೊರಗೆ ತೆರಳಿದ ಎಂದು ವೆಂಗ್ ಸರ್ಕರ್ ಹೇಳಿದ್ದಾರೆ. ಸಂದರ್ಶನದಲ್ಲಿ ವೆಂಗ್ ಸರ್ಕಾರ್ ಅವರ ಮಾತಿಗೆ ಧ್ವನಿಗೂಡಿಸಿರುವ ಕಪಿಲ್ ದೇವ್ ಅವರು, ಅಂದಿನ ಮಟ್ಟಿಗೆ ನಮಗೆ ದಾವೂದ್ ಯಾರೆಂದು ತಿಳಿದಿರಲಿಲ್ಲ ಎಂದು ಹೇಳಿದ್ದಾರೆ.

ದಾವೂದ್ ಇಬ್ರಾಹಿಂ ಆಟಗಾರರಿದ್ದ ಕೊಠಡಿಗೆ ಬಂದಿದ್ದು ನಿಜ. ಆದರೆ ಆತ ಯಾರೆಂದು ತಿಳಿದಿರಲಿಲ್ಲ. ಆತ ಕಾರು ನೀಡುವ ಆಫರ್ ನೀಡಿದ್ದಾನೆ ಎಂಬುದು ಗೊತ್ತಿಲ್ಲ. ದಿಲೀಪ್ ಅವರನ್ನೇ ಈ ಬಗ್ಗೆ ಕೇಳಬೇಕು. ನಾನು ಬಂದು ಆತನನ್ನು ಹೊರಕ್ಕೆ ಕಳಿಸಿದೆ ಬಾಂಬೆ(ಇಂದಿನ ಮುಂಬೈ) ಮೂಲಕ ಸ್ಮಗ್ಲರ್ ಎಂದು ನಂತರ ನಮಗೆ ತಿಳಿಯಿತು ಎಂದು ಕಪಿಲ್ ಪ್ರತಿಕ್ರಿಯಿಸಿದ್ದಾರೆ.

1987ರಲ್ಲಿ ಭಾರತ, ಪಾಕಿಸ್ತಾನ, ಆಸ್ಟ್ರೇಲಿಯಾ ಹಾಗೂ ಇಂಗ್ಲೆಂಡ್ ತಂಡಗಳು ನಾಲ್ಕು ರಾಷ್ಟ್ರಗಳ ಕ್ರಿಕೆಟ್ ಟೂರ್ನಿಯಲ್ಲಿ ಪಾಲ್ಗೊಂಡಿದ್ದವು. ಭಾರತ ತಂಡ ರನ್ ಸರಾಸರಿಯಲ್ಲಿ ಹಿಂದೆ ಬಿದ್ದು ಆಸ್ಟ್ರೇಲಿಯಾಗೆ ಕಪ್ ಬಿಟ್ಟುಕೊಟ್ಟಿತ್ತು.

ಬಿಸಿಸಿಐ ಕಾರ್ಯದರ್ಶಿಯಾಗಿದ್ದ ದಿವಂಗತ ಜಯವಂತ್ ಲೆಲೆ ಬರೆದಿರುವ ಪುಸ್ತಕ 'I was There - Memoirs of a Cricket Administrator'ದಲ್ಲೂ ದಾವೂದ್ ಅವರ ಕಾರು ಆಫರ್ ಬಗ್ಗೆ ಪ್ರಸ್ತಾಪಿಸಲಾಗಿರುವುದನ್ನು ಇಲ್ಲಿ ಸ್ಮರಿಸಬಹುದು.

1993ರಲ್ಲಿ ಮುಂಬೈನಲ್ಲಿ ಬಾಂಬ್ ಸ್ಫೋಟದ ನಂತರ 1987ರಲ್ಲಿ ಆಟಗಾರರ ಕೊಠಡಿಗೆ ಬಂದಿದ್ದವ ಇದೇ ದಾವೂದ್ ಇಬ್ರಾಹಿಂ ಎಂದು ತಿಳಿಯಿತು ಎಂದು ಲೆಲೆ ತಮ್ಮ ಪುಸ್ತಕದಲ್ಲಿ ಹೇಳಿಕೊಂಡಿದ್ದಾರೆ. ಒಟ್ಟಾರೆ ಖಾಸಗಿ ಸುದ್ದಿವಾಹಿನಿಯ ಸಂದರ್ಶನದಲ್ಲಿ ಮಾಜಿ ಹಿರಿಯ ಕ್ರಿಕೆಟಿಗ ವೆಂಗ್ ಸರ್ಕರ್ ಅವರು ಸ್ಫೋಟಕ ಮಾಹಿತಿಯನ್ನು ಹೊರಹಾಕಿದ್ದು ಮತ್ತೊಮ್ಮೆ ಕ್ರಿಕೆಟ್ ಹಾಗೂ ಭೂಗತ ಜಗತ್ತಿನ ನಂಟಿನ ಬಗ್ಗೆ ಚರ್ಚೆ ಆರಂಭವಾಗಿದೆ.

English summary
In a sensational revelation, former India captain Dilip Vengsarkar has claimed that underworld don Dawood Ibrahim had offered the players cars if they won a tri-series tournament in Sharjah in 1987.
ಅಭಿಪ್ರಾಯ ಬರೆಯಿರಿ