Englishहिन्दीമലയാളംதமிழ்తెలుగు

ಯುವರಾಜ್ ಭರ್ಜರಿ ಶತಕ, ಭಾರತ 'ಎ' ಗೆ ಜಯ

Posted by:
Published: Monday, September 16, 2013, 12:54 [IST]
 

ಬೆಂಗಳೂರು, ಸೆ.16: ನಾಯಕನ ಆಟ ಪ್ರದರ್ಶಿಸುವ ಮೂಲಕ ಆಯ್ಕೆದಾರರಿಗೆ ಭರ್ಜರಿ ಉತ್ತರ ನೀಡಿದ ಯುವರಾಜ್ ಸಿಂಗ್ ಸಿಡಿಸಿದ ಶತಕ ಹಾಗೂ ಯೂಸುಫ್ ಪಠಾಣ್ ಆಲ್ ರೌಂಡ್ ಆಟದ ನೆರವಿನಿಂದ ಭಾರತ ‘ಎ' ತಂಡ ಭಾನುವಾರ ನಡೆದ ವೆಸ್ಟ್ ಇಂಡೀಸ್ ‘ಎ' ವಿರುದ್ಧದ ಮೊದಲನೆ ಅನಧಿಕೃತ ಏಕದಿನ ಪಂದ್ಯದಲ್ಲಿ 77 ರನ್ ಗಳಿಂದ ಜಯ ಸಾಧಿಸಿದೆ.

ಭಾರತ ಎ ತಂಡ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ. ಉಳಿದೆರಡು ಪಂದ್ಯಗಳು ಇದೇ ಮೈದಾನದಲ್ಲಿ ಸೆ.17 ಹಾಗೂ 18 ರಂದು ನಡೆಯಲಿದೆ.

ತೇವಾಂಶ ಭರಿತ ಮೈದಾನ, ಪ್ರತಿಕೂಲ ಹವಾಮಾನದಿಂದಾಗಿ 1 ಗಂಟೆ, 45 ನಿಮಿಷಗಳ ಕಾಲ ವಿಳಂಬವಾಗಿ ಪಂದ್ಯ ಆರಂಭಗೊಂಡಿತ್ತು. 42 ಓವರ್ ಗೆ ಸೀಮಿತವಾದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ಎ ತಂಡ 4 ವಿಕೆಟ್ ಗಳ ನಷ್ಟಕ್ಕೆ 312 ರನ್ ಗಳಿಸಿತು.

ಇದಕ್ಕೆ ಉತ್ತರವಾಗಿ ವೆಸ್ಟ್ ಇಂಡೀಸ್ 39.1 ಓವರ್ ಗಳಲ್ಲಿ 235 ರನ್ ಗಳಿಗೆ ಆಲೌಟಾಗಿದೆ. ವಿಂಡೀಸ್ ನ ಪರ ಆಶ್ಲೆ ನರ್ಸ್ (57 ರನ್, 50 ಎಸೆತ) ಹಾಗೂ ನರಸಿಂಗ್ ಡಿಯೋನರೇನ್(57ರನ್, 63 ಎಸೆತ, 6 ಬೌಂಡರಿ, 1 ಸಿಕ್ಸರ್) ಉತ್ತಮ ಆಟ ಪ್ರದರ್ಶಿಸಿದರು.

ಭಾರತದ ಪರ ಸಮಿತ್ ನರ್ವಾಲ್(2-28), ವಿನಯ್ ಕುಮಾರ್(2-42), ರೋಹಿತ್ ಶರ್ಮ(2-57) ಹಾಗೂ ಪಠಾಣ್(2-47) ತಲಾ ಎರಡು ವಿಕೆಟ್ ಗಳನ್ನು ಕಬಳಿಸಿದರು.

ಭಾರತದ ಬ್ಯಾಟಿಂಗ್: ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ವೆಸ್ಟ್ ಇಂಡೀಸ್ ನ ಬೌಲಿಂಗ್ ದಾಳಿಯನ್ನು ಯುವರಾಜ್ ಸಿಂಗ್ ಚಿಂದಿ ಮಾಡಿಬಿಟ್ಟರು. ಕೇವಲ 89 ಎಸೆತಗಳಲ್ಲಿ 8 ಬೌಂಡರಿ ಹಾಗೂ 7 ಸಿಕ್ಸರ್ ಗಳನ್ನು ಒಳಗೊಂಡ 123 ರನ್ ಗಳಿಸಿ ಆಯ್ಕೆ ಸಮಿತಿಯ ಗಮನ ಸೆಳೆದರು.

ಮನ್ ದೀಪ್ ಸಿಂಗ್(67 ರನ್, 78 ಎಸೆತ, 7 ಬೌಂಡರಿ, 1 ಸಿಕ್ಸರ್) ಹಾಗೂ ಯೂಸುಫ್ ಪಠಾಣ್(70 ನಾಟೌಟ್, 32 ಎಸೆತ, 4 ಬೌಂಡರಿ, 6 ಸಿಕ್ಸರ್) ಅರ್ಧ ಶತಕದಿಂದ ಭಾರತ ‘ಎ' ತಂಡ ಬೃಹತ್ ಮೊತ್ತ ಗಳಿಸಿತು.

ಜನವರಿಯಲ್ಲಿ ಕೊನೆಯ ಬಾರಿ ಏಕದಿನ ಪಂದ್ಯವನ್ನು ಆಡಿದ್ದ ಯುವರಾಜ್ ಮೊದಲನೆ ಬೌಂಡರಿ ಬಾರಿಸಲು 39 ಎಸೆತಗಳನ್ನು ತೆಗೆದುಕೊಂಡಿದ್ದು ವಿಶೇಷ ಆದರೆ, 61 ಎಸೆತಗಳಲ್ಲಿ ಅರ್ಧಶತಕವನ್ನು ಪೂರೈಸಿದ ಯುವಿ ಮುಂದಿನ 19 ಎಸೆತಗಳಲ್ಲಿ ಶತಕವನ್ನು ಸಿಡಿಸಿದರು.

English summary
Captain Yuvraj Singh blasted an 89-ball 123 (8x4, 7x6) to power India A to a convincing 77-run victory over West Indies A in the first of the three-match one-day series here at the M Chinnaswamy Stadium on Sunday.
ಅಭಿಪ್ರಾಯ ಬರೆಯಿರಿ