Englishहिन्दीമലയാളംதமிழ்తెలుగు

ಕೆಎಸ್ಸಿಎ 'ಅಮೃತ', ಶ್ರೀನಾಥ್, ಕುಂಬ್ಳೆ ಹಾಲಾಹಲ

Posted by:
Updated: Wednesday, August 21, 2013, 17:01 [IST]
 

ಬೆಂಗಳೂರು, ಆ.21: ಕರ್ನಾಟಕ ಕ್ರಿಕೆಟ್ ಸಂಸ್ಥೆ (ಕೆಎಸ್ ಸಿಎ) ತನ್ನ ಅಮೃತ ಮಹೋತ್ಸವ ಸಮಾರಂಭ ವಿಜೃಂಭಣೆಯಿಂದ ಆಚರಿಸಿದ್ದು ಹಲವರ ಕೆಂಗಣ್ಣಿಗೆ ಗುರಿಯಾಗಿದೆ. ಕ್ರಿಕೆಟ್ ಲೋಕದ ದಿಗ್ಗಜರಾದ ಅನಿಲ್ ಕುಂಬ್ಳೆ, ಜಾವಗಲ್ ಶ್ರೀನಾಥ್ ಅವರನ್ನು ವಿವಾದದ ಕೇಂದ್ರ ಬಿಂದುವನ್ನಾಗಿಸಲಾಗಿದೆ. ಸಮಾರಂಭಕ್ಕೆ 4 ಕೋಟಿ ರು ಖರ್ಚು ಮಾಡಲು ಯಾರ ಅಪ್ಪಣೆ ಇದೆ ಎಂದು ಮಾಜಿ ಕ್ರಿಕೆಟರ್ ಬ್ರಿಜೇಶ್ ಪಟೇಲ್ ಪ್ರಶ್ನಿಸಿದ್ದಾರೆ.

ಇದರ ಜತೆಗೆ 2009-10ರಲ್ಲಿ ನಡೆಯಬೇಕಾಗಿದ್ದ ಮಹೋತ್ಸವ ಈಗೇಕೆ ನಡೆಯಿತು? ಕೆಎಸ್ ಸಿಎ ವಾರ್ಷಿಕ ಕಾರ್ಯಕಾರಿ ಮಹಾಸಭೆಯಲ್ಲಿ ಖರ್ಚು ವೆಚ್ಚದ ಬಗ್ಗೆ ಚರ್ಚೆ ನಡೆಯದೆ ಹಣ ಬಿಡುಗಡೆ ಹೇಗೆ ಸಾಧ್ಯವಾಯಿತು? ಅನಿಲ್ ಕುಂಬ್ಳೆ, ಶ್ರೀನಾಥ್ ಲೆಕ್ಕ ತಪ್ಪಿದ್ದು ಎಲ್ಲಿ? ಎಂದು ಪ್ರಶ್ನಿಸಲಾಗಿದೆ.

ಸಚಿನ್ ತೆಂಡೂಲ್ಕರ್, ಸೌರವ್ ಗಂಗೂಲಿ, ರಾಹುಲ್ ದ್ರಾವಿಡ್ ಹಾಗೂ ರಿಚರ್ಚ್ ಹ್ಯಾಡ್ಲಿ ಅವರಂಥ ಶ್ರೇಷ್ಠ ಕ್ರಿಕೆಟಿಗರನ್ನು ರತ್ನಗಂಬಳಿ ಹಾಸಿ ಸ್ವಾಗತಿಸಿ, ಸಂಭ್ರಮದಲ್ಲಿ ನಡೆದ ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆ (ಕೆಎಸ್ ಸಿಎ) ಅಮೃತ ಮಹೋತ್ಸವದ ಬಗ್ಗೆ ಮಾಜಿ ಆಡಳಿತ ಮಂಡಳಿ ಸದಸ್ಯರು ಕೆಎಸ್ ಸಿಎ ಮಾಜಿ ಅಧ್ಯಕ್ಷ ಮೈಸೂರು ರಾಜ ವಂಶಸ್ಥ ಶ್ರೀಕಂಠದತ್ತ ಒಡೆಯರ್ ಅವರು ಅಪಸ್ವರ ಎತ್ತಿದ್ದಾರೆ.

1934-35ರಲ್ಲಿ ಮೈಸೂರು ಕ್ರಿಕೆಟ್ ಸಂಸ್ಥೆಯಾಗಿ ಹುಟ್ಟಿಕೊಂಡ ರಾಜ್ಯ ಕ್ರಿಕೆಟ್ ಸಂಸ್ಥೆಯ ಅಮೃತ ಮಹೋತ್ಸವ ವರ್ಷ 2009-10 ಆಗಿದೆ. ಆದರೆ ಅಂದಿನ ಅಧ್ಯಕ್ಷರಾಗಿದ್ದ ಶ್ರೀಕಂಠದತ್ತ ನರಸಿಂಹರಾಜ ಒಡೆಯರ್, ''ಇದು ಚುನಾವಣೆಯ ವರ್ಷವಾದ ಕಾರಣ ಅಮೃತ ಮಹೋತ್ಸವ ಆಚರಿಸುವುದು ಸೂಕ್ತವಲ್ಲ,'' ಎಂದು ಹೇಳಿದ್ದರು. ಕೆಎಸ್ ಸಿಎ ಅಮೃತ ಮಹೋತ್ಸವ ಯಶಸ್ಸು ಮಾಜಿ ಸದಸ್ಯರ ಕಣ್ಣು ಕುಕ್ಕಿದೆ ಎಂದು ಕೇಳವರು ಹೇಳಿದ್ದಾರೆ.. ಮುಂದೇನು ಕಥೆ ಓದಿ... ಚಿತ್ರಗಳು: ಅಪ್ರಮೇಯ. ಸಿ

ಶ್ರೀಕಂಠದತ್ತ ಒಡೆಯರ್ ಆರೋಪ

ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಅನಿಲ್ ಕುಂಬ್ಳೆ ಅವರ ಅಧ್ಯಕ್ಷತೆಯಲ್ಲಿ ಕೆಎಸ್ ಸಿಎ ಹೊಸ ಆಡಳಿತ ಮಂಡಳಿ ಅಧಿಕಾರಕ್ಕೆ ಬಂದಿತ್ತು. '2011, 2012ರಲ್ಲಿ ಈ ಅಮೃತ ಮಹೋತ್ಸವವನ್ನು ಆಚರಿಸಬಹುದಾಗಿತ್ತು.

ಆದರೆ 2013 ಮಾರ್ಚ್ ನಂತರ ಆಚರಿಸಲಾಗಿದೆ. ಇದು ಚುನಾವಣೆಯ ವರ್ಷದ ಅವಧಿಯಾದ ಕಾರಣ ಕೆಎಸ್ ಸಿಎ ನಿಯಮಕ್ಕೆ ವಿರೋಧವಾಗಿದೆ,'' ಎಂದು ಮಾಜಿ ಅಧ್ಯಕ್ಷ ಶ್ರೀಕಂಠದತ್ತ ಒಡೆಯರ್ ಆರೋಪಿಸಿದ್ದಾರೆ.

ಉಡುಗೊರೆ ಏಕೆ

ಚುನಾವಣೆ ಮುಂದಿಟ್ಟುಕೊಂಡು ಕೆಎಸ್ ಸಿಎ ಅಮೃತ ಮಹೋತ್ಸವ ಮಾಡಿರುವುದೇ ತಪ್ಪು. ಸರ್ವ ಸದಸ್ಯರ ಸಭೆಯಲ್ಲಿ ಚುನಾವಣೆ ದಿನಾಂಕ ನಿಗದಿಪಡಿಸುವ ಬಗ್ಗೆ ಚರ್ಚೆ ನಡೆದಿತ್ತು.ಜತೆಗೆ ಅಮೃತ ಮಹೋತ್ಸವ ಆಚರಿಸುವ ಮೂಲಕ ಸದಸ್ಯರಿಗೆ ಉಡುಗೊರೆ, ಸನ್ಮಾನಗಳನ್ನು ಮಾಡುವುದು ಸೂಕ್ತವಲ್ಲ ಎಂದು ನಿರ್ಧರಿಸಲಾಗಿತ್ತು. ಆದರೆ, ಇಲ್ಲಿ ಆದದ್ದು ಎಲ್ಲವೂ ಉಲ್ಟಾ ಎಂದು ಮಾಜಿ ಸದಸ್ಯರೊಬ್ಬರು ಕಿಡಿಕಾರಿದ್ದಾರೆ.

ಖರ್ಚು ವೆಚ್ಚದ ಲೆಕ್ಕ ಕೊಡಿ

ರಾಜ್ಯ ಕ್ರಿಕೆಟ್ ಸಂಸ್ಥೆಯ ಅಮೃತಮಹೋತ್ಸವಕ್ಕೆ ತಗುಲುವ ಖರ್ಚು ವೆಚ್ಚದ ಬಗ್ಗೆ ಅಧ್ಯಕ್ಷ ಅನಿಲ್ ಕುಂಬ್ಳೆಯಾಗಲಿ, ಕಾರ್ಯದರ್ಶಿ ಶ್ರೀನಾಥ್ ಆಗಲಿ ಸದಸ್ಯರ ಜತೆ ಚರ್ಚಿಸಿಲ್ಲ. 4 ಕೋಟಿ ರು ಖರ್ಚಾಗಿರುವ ಅಂದಾಜು ಸಿಕ್ಕಿದೆ. ಎಜಿಎಂನಲ್ಲಿ ಈ ಬಗ್ಗೆ ಚರ್ಚೆ ನಡೆಯಲೇ ಇಲ್ಲ. ಸರ್ವ ಸದಸ್ಯರ ಸಭೆಯಲ್ಲಿ ಅನುಮತಿ ಇಲ್ಲದೆ ಇಷ್ಟು ದೊಡ್ಡ ಮೊತ್ತ ಬಳಸಿದ್ದು ಏಕೆ ಎಂದು ಪ್ರಶ್ನಿಸಲಾಗಿದೆ.

ವೇಗಿ ಹ್ಯಾಡ್ಲಿ ಏಕೆ?

ರಾಜ್ಯ ಕ್ರಿಕೆಟ್ ಅಭಿವೃದ್ಧಿಗಾಗಿ ಶ್ರಮಿಸಿದವರನ್ನು ನಿರ್ಲಕ್ಷಿಸಿ, ನ್ಯೂಜಿಲೆಂಡ್ ಕ್ರಿಕೆಟರ್ ರಿಚರ್ಡ್ ಹ್ಯಾಡ್ಲಿ ಕರೆ ತಂದು ಹೊಗಳುವ ಮೂಲಕ ಪ್ರಚಾರ ಪಡೆಯುವ ಉದ್ದೇಶವಾದರೂ ಏನು? ಎಂದು ಕೆಎಸ್ ಸಿಎ ಪದಾಧಿಕಾರಿಯೊಬ್ಬರು ಪ್ರಶ್ನಿಸಿದ್ದಾರೆ.

ಕೆಎಸ್ ಸಿಎ ಖಜಾಂಚಿ ಹೇಳಿಕೆ

ಮಾಜಿ ಅಧ್ಯಕ್ಷ ಶ್ರೀಕಂಠದತ್ತ ಒಡೆಯರ್ ಹಾಗೂ ಅವರ ಬೆಂಬಲಿಗರ ಆರೋಪಗಳಿಗೆ ಉತ್ತರಿಸಿರುವ ಕೆಎಸ್ ಸಿಎ ಖಜಾಂಚಿ ತಲ್ಲಂ ವೆಂಕಟೇಶ್, ನಾವು ಚುನಾವಣೆಗಾಗಿ ಈ ಫಂಕ್ಷನ್ ಮಾಡಿಲ್ಲ. ಇಷ್ಟು ಕಾಲ ಸುಮ್ಮನಿದ್ದು ಈಗ ಮಾತನಾಡುತ್ತಿದ್ದಾರೆ ಎಂದರೆ ಅವರು ಕೂಡಾ ಚುನಾವಣೆ ಪ್ರಚಾರಕ್ಕೆ ತಯಾರಾಗಿದ್ದಾರೆ ಎಂದರ್ಥ. ನಾಲ್ಕು ಕೋಟಿ ಖರ್ಚು ಮಾಡಲಾಗಿದೆ ಎಂಬುದು ಸುಳ್ಳು ಸುದ್ದಿ ಎಂದಿದ್ದಾರೆ.

Story first published:  Wednesday, August 21, 2013, 16:55 [IST]
English summary
After eight days of KSCA Plantinum Jubilee celebrations, now comes controversy for the Karnataka State Cricket Association (KSCA) and its officials including stalwarts Anil Kumble, the president of the association and Javagal Srinath (secretary).
ಅಭಿಪ್ರಾಯ ಬರೆಯಿರಿ