Englishहिन्दीമലയാളംதமிழ்తెలుగు

ವಿರಾಟ್ ಕೊಹ್ಲಿ ಶತಕ, ಜಿಂಬಾಬ್ವೆ ಮೇಲೆ ಜಯ

Posted by:
Updated: Thursday, July 25, 2013, 19:19 [IST]
 

ಹರಾರೆ, ಜು.24: ನಾಯಕ ವಿರಾಟ್ ಕೊಹ್ಲಿ ಅವರ ಅಮೋಘ ಶತಕದ ನೆರವಿನಿಂದ ಪ್ರವಾಸಿ ಭಾರತ ತಂಡ ಅತಿಥೇಯ ಜಿಂಬಾಬ್ವೆ ವಿರುದ್ಧದ ಮೊದಲ ಏಕದಿನ ಪಂದ್ಯವನ್ನು ಸುಲಭವಾಗಿ ತನ್ನದಾಗಿಸಿಕೊಂಡಿದೆ.


ವಿರಾಟ್ ಕೊಹ್ಲಿ ಅವರು ಏಕದಿನ ಕ್ರಿಕೆಟ್ ನಲ್ಲಿ ವೈಯಕ್ತಿಕ 15ನೇ ಶತಕ ಬಾರಿಸಿ ಭಾರತದ ಗೆಲುವಿನ ರುವಾರಿ ಎನಿಸಿದರು. ನಾಯಕನಾಗಿ ಕೊಹ್ಲಿ ಅವರ 2ನೇ ಶತಕ ಇದಾಗಿದ್ದು, ಜಿಂಬಾಬ್ವೆ ವಿರುದ್ಧ ಭಾರತಕ್ಕೆ 6 ವಿಕೆಟ್ ಗಳ ಜಯ ಲಭಿಸಿದೆ. ಹರಾರೆಯಲ್ಲಿ ಬುಧವಾರ ನಡೆದ ಪಂದ್ಯ ಗೆಲ್ಲುವ ಮೂಲಕ ಭಾರತ ಐದು ಪಂದ್ಯಗಳ ಏಕದಿನ ಸರಣಿಯಲಿ 1-0 ಮುನ್ನಡೆ ಪಡೆದಿದೆ.

ಕೊಹ್ಲಿ 115 ರನ್ (108 ಎಸೆತ, 13X4, 1X6) ಹಾಗೂ ಮೊದಲ ಪಂದ್ಯವಾಡಿದ ಅಂಬಟಿ ರಾಯುಡು ಮೂರನೇ ವಿಕೆಟ್ ಗೆ ಸೇರಿಸಿದ 159 ರನ್ ಜೊತೆಯಾಟ ಪಂದ್ಯದಲ್ಲಿ ನಿರ್ಣಾಯಕ ಎನಿಸಿತು. ಭಾರತ ಗೆಲ್ಲಲು ಬೇಕಿದ್ದ 229ರನ್ ಚೇಸ್ ಮಾಡಿ 44.5 ಓವರ್ ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 230ರನ್ ಗಳಿಸಿ ಜಯಭೇರಿ ಬಾರಿಸಿತು. ಸ್ಕೋರ್ ಕಾರ್ಡ್ ನೋಡಿ

ವಿರಾಟ್ ಕೊಹ್ಲಿ ಶತಕ, ಜಿಂಬಾಬ್ವೆ ಮೇಲೆ ಜಯ

ಕೊಹ್ಲಿ ವಿಕ್ರಮ: 24 ವರ್ಷದ ಕೊಹ್ಲಿ ಭಾರತದ ಪರ ಏಕದಿನ ಪಂದ್ಯಗಳಲ್ಲಿ ಹೆಚ್ಚು ಶತಕ ಗಳಿಸಿದ ವೀರರ ಪಟ್ಟಿ ಸೇರಿದ್ದಾರೆ. ಸಚಿನ್ ತೆಂಡೂಲ್ಕರ್ 49 ಶತಕ, ಸೌರವ್ ಗಂಗೂಲಿ 22 ಟಾಪ್ ನಲ್ಲಿದ್ದಾರೆ. ಕೊಹ್ಲಿ 109 ಪಂದ್ಯ(106 ಇನ್ನಿಂಗ್ಸ್) ದಲ್ಲಿ 15 ಶತಕ ಗಳಿಸಿ ನಂತರದ ಸ್ಥಾನದಲ್ಲಿದ್ದಾರೆ. ವೀರೇಂದರ್ ಸೆಹ್ವಾಗ್ ಅವರು 251 ಪಂದ್ಯವಾಡಿ 15 ಶತಕ ಗಳಿಸಿ ಕೊಹ್ಲಿ ಜತೆ ಮೂರನೇ ಸ್ಥಾನ ಹಂಚಿಕೊಂಡಿದ್ದಾರೆ.

ಇದಲ್ಲದೆ ಏಕದಿನ ಕ್ರಿಕೆಟ್ ನಲ್ಲಿ 15 ಶತಕ ಬಾರಿಸಿದ ಅತ್ಯಂತ ಕಿರಿಯ ವಯಸ್ಕ(24 ವರ್ಷ, 261 ದಿನಗಳು). 15 ಶತಕಗಳ ಗಡಿ ದಾಟಿದಾಗ ಸಚಿನ್ ಗೆ 25 ವರ್ಷ ಪೂರ್ತಿ ತುಂಬಿತ್ತು. ಜೊತೆಗೆ ಕೊಹ್ಲಿ ಅವರು 106 ಇನ್ನಿಂಗ್ಸ್ ನಲ್ಲೇ 15 ಶತಕ ಗಳಿಸಿದ ಸಾಧನೆ ಮಾಡಿದ್ದಾರೆ.

ಚೊಚ್ಚಲ ಪಂದ್ಯವಾಡಿದ ರಾಯುಡು 63 ರನ್ (84 ಎಸೆತ, 4 ಬೌಂಡರಿ) ಬಾರಿಸಿ ಔಟಾಗದೆ ಉಳಿದು ಬೌಂಡರಿ ಮೂಲದ ವಿಜಯದ ರನ್ ಬಾರಿಸಿದ್ದು ವಿಶೇಷವಾಗಿತ್ತು.

ಭಾರತದ ಆರಂಭ ನಿಧಾನಗತಿಯಿಂದ ಕೂಡಿತ್ತು. ಶಿಖರ್ ಧವನ್ 17 ರನ್, ರೋಹಿತ್ ಶರ್ಮ 20 ರನ್ ದೊಡ್ಡ ಮೊತ್ತ ಗಳಿಸುವಲ್ಲಿ ವಿಫಲರಾದರು. ಈ ಸರಣಿ ಎರಡನೇ ಪಂದ್ಯ ಶುಕ್ರವಾರ(ಜು.26) ನಡೆಯಲಿದೆ.

ಜಿಂಬಾಬ್ವೆ ಇನ್ನಿಂಗ್ಸ್: ಭಾರತ ತಂಡಕ್ಕೆ ಮತ್ತೆ ಸೇರ್ಪಡೆಗೊಂಡಿರುವ ಸ್ಪಿನ್ನರ್ ಅಮಿತ್ ಮಿಶ್ರಾ ಉತ್ತಮ ಬೌಲಿಂಗ್ ನೆರವಿನಿಂದ ಜಿಂಬಾಬ್ವೆ ತಂಡವನ್ನು 50 ಓವರ್ ಗಳಲ್ಲಿ 228/7 ಸ್ಕೋರ್ ಗೆ ನಿಯಂತ್ರಿಸಲಾಯಿತು.

ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ದುಕೊಂಡ ಕೊಹ್ಲಿ ನಿರ್ಣಯ ಫಲ ಕೊಟ್ಟಿತು. ಜಿಂಬಾಬ್ವೆ ಪರ ಸಿಕಂದರ್ ರಾಜಾ 82 ರನ್ (112 ಎಸೆತ, 6 ಬೌಂಡರಿ, 2 ಸಿಕ್ಸರ್) ಗಳಿಸಿ ಉತ್ತಮ ಪ್ರತಿರೋಧ ತೋರಿದ್ದು ಬಿಟ್ಟರೆ ಉಳಿದ ಆಟಗಾರರು ಹೆಚ್ಚು ಹೊತ್ತು ಕ್ರೀಸ್ ನಲ್ಲಿ ನಿಲ್ಲಲಿಲ್ಲ. ಚಿಗಂಬುರ 34 ಎಸೆತದಲ್ಲಿ 43 ರನ್ (6 ಬೌಂಡರಿ, 1 ಸಿಕ್ಸ್) ಗಳಿಸಿ ರನ್ ಗತಿ ಹೆಚ್ಚಿಸಿದರು.

2011ರಲ್ಲಿ ಏಕದಿನ ಪಂದ್ಯವಾಡಿದ್ದ ಅಮಿತ್ ಮಿಶ್ರಾ ಈ ಪಂದ್ಯದಲ್ಲಿ ಉತ್ತಮ ಬೌಲಿಂಗ್ ಪ್ರದರ್ಶಿಸಿ 3 ವಿಕೆಟ್ ಕಬಳಿಸಿದರು. ಆರಂಭದಲ್ಲಿ ವಿನಯ್ ಕುಮಾರ್, ಶಮಿ ಅಹ್ಮದ್ ಉತ್ತಮ ಬೌಲಿಂಗ್ ಪ್ರದರ್ಶಿಸಿ ರನ್ ಗತಿಗೆ ಬ್ರೇಕ್ ಹಾಕಿದರು. 20 ಓವರ್ ಗಳಲ್ಲಿ 68ರನ್ ಮಾತ್ರ ಗಳಿಸಿದ್ದ ಜಿಂಬಾಬ್ವೆ ಮುಂದಿನ 30 ಓವರ್ ಗಳಲ್ಲಿ 160 ರನ್ ಮಾತ್ರ ಗಳಿಸಿತು.

Story first published:  Wednesday, July 24, 2013, 22:50 [IST]
English summary
Virat Kohli hit his 15th One Day International century and second as captain to power India to a convincing 6-wicket victory over Zimbabwe in the first match of the series here on Wednesday. India took a 1-0 lead in the five-match series.
ಅಭಿಪ್ರಾಯ ಬರೆಯಿರಿ