Englishहिन्दीമലയാളംதமிழ்తెలుగు

ವಿಂಡೀಸ್ ವಿರುದ್ಧ ಮಂಡಿಯೂರಿದ ಟೀಂ ಇಂಡಿಯಾ

Posted by:
Updated: Tuesday, July 30, 2013, 14:00 [IST]
 

ವಿಂಡೀಸ್ ವಿರುದ್ಧ ಮಂಡಿಯೂರಿದ ಟೀಂ ಇಂಡಿಯಾ
 

ಕಿಂಗ್‌ಸ್ಟನ್‌, ಜು.1 : ಸೆಲ್ಕಾನ್ ಮೊಬೈಲ್ ತ್ರಿಕೋನ ಸರಣಿ ಮೊದಲ ಪಂದ್ಯದಲ್ಲೇ ಟೀಂ ಇಂಡಿಯಾ ಹೊಡೆತ ತಿಂದಿದೆ. ವೆಸ್ಟ್ ಇಂಡೀಸ್ ತಂಡ ಸಾಂಘಿಕ ಹೋರಾಟದ ಮೂಲಕ ಟೀಂ ಇಂಡಿಯಾವನ್ನು ಸೋಲಿಸಿ ಚಾಂಪಿಯನ್ಸ್ ಟ್ರೋಫಿ ಟೂರ್ನಿಯ ಸೇಡು ತೀರಿಸಿಕೊಂಡಿದೆ.

ಆತಿಥೇಯ ವೆಸ್ಟ್‌ಇಂಡೀಸ್‌ ಬೌಲರ್ ಗಳನ್ನು ಸಮರ್ಥವಾಗಿ ಎದುರಿಸಲು ತಿಣುಕಾಡಿದ ಧೋನಿ ಪಡೆ 230 ರನ್ ಟಾರ್ಗೆಟ್ ಮಾತ್ರ ನೀಡಿತ್ತು. ವಿಂಡೀಸ್ ತಂಡ ಜಾನ್ಸನ್ ಚರ್ಲ್ಸ್ , ಡರೇನ್ ಬ್ರಾವೋ, ಸ್ಯಾಮಿ ಹಾಗೂ ರೋಚ್ ಉತ್ತಮ ಬ್ಯಾಟಿಂಗ್ ನೆರವಿನಿಂದ ಪಂದ್ಯವನ್ನು 1 ವಿಕೆಟ್ ನಿಂದ ಗೆದ್ದು ಕುಣಿದಾಡಿತು.

ಸ್ಕೋರ್ ಕಾರ್ಡ್ ನೋಡಿ

230 ಗುರಿ ಬೆನ್ನಟ್ಟಿದ ವಿಂಡೀಸ್ ಪಡೆ ಆರಂಭ ಕೂಡಾ ಉತ್ತಮವಾಗಿರಲಿಲ್ಲ. ದೈತ್ಯ ಕ್ರಿಸ್ ಗೇಲ್ 11 ರನ್ ಗಳಿಸಿ ಔಟಾದ ಖುಷಿಯಲ್ಲಿದ್ದ ಟೀಂ ಇಂಡಿಯಾಗೆ ಜಾನ್ಸನ್ ಚಾರ್ಲ್ಸ್ ಕಾಡಿದರು. ಚಾರ್ಲ್ಸ್ 97ರನ್ ಗಳಿಸಿ ಅರ್ಹ ಶತಕದಿಂದ ವಂಚಿತರಾದರೂ ಪಂದ್ಯವನ್ನು ಗೆಲುವಿನ ಹಾದಿಗೆ ತಿರುಗಿಸಿಬಿಟ್ಟರು. ತಂಡದ ಮೊತ್ತ 26 ರನ್ನಿಗೆ 3 ವಿಕೆಟ್ ಕಳೆದುಕೊಂಡಿದ್ದಾಗ ಡರೇನ್ ಬ್ರಾವೋ 55 ರನ್ ಹಾಗೂ ಚಾರ್ಲ್ಸ್ ಜೊತೆಯಾಟ ಪಂದ್ಯದ ಗತಿ ತಿರುಗಿಸಿಬಿಟ್ಟಿತು.

ಆದರೂ ಗೆಲುವು ಸುಲಭವಾಗಿರಲಿಲ್ಲ. ಪೊಲ್ಲಾರ್ಡ್, ರಾಮದೀನ್, ಸುನಿಲ್ ನರೇನ್ ವಿಕೆಟ್ ಬೇಗ ಉದುರಿಸಿ ಟೀಂ ಇಂಡಿಯಾ ಗೆಲುವಿನ ಕನಸು ಕಂಡಿತ್ತು. ಸ್ಯಾಮಿ 29 ರನ್ ಹಾಗೂ ಕೆಮಾರ್ ರೋಚ್ ಔಟಾಗದೆ 14 ಹೊಡೆದು ಪಂದ್ಯವನ್ನು ತಮ್ಮದಾಗಿಸಿಕೊಂಡರು.

ಟೀಂ ಇಂಡಿಯಾ ಪರ ಉಮೇಶ್ ಯಾದವ್ 43ಕ್ಕೆ 3, ಶರ್ಮ, ಅಶ್ವಿನ್ ತಲಾ 2 ವಿಕೆಟ್ ಗಳಿಸಿದರೆ, ಭುವನೇಶ್ವರ್ ಕುಮಾರ್ ಹಾಗೂ ಸುರೇಶ್ ರೈನಾ ತಲಾ 1 ವಿಕೆಟ್ ಪಡೆದರು.

ಭಾರತದ ಇನ್ನಿಂಗ್ಸ್ : ಟಾಸ್‌ ಸೋತರೂ ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ಭಾರತ ತಂಡದ ಇನ್ನಿಂಗ್ಸ್ ಅನ್ನು ರೋಹಿತ್‌ ಶರ್ಮ ಮತ್ತು ಶಿಖರ್‌ ಧವನ್‌ ಆರಂಭಿಸಿದರು. ಚಾಂಪಿಯನ್ಸ್‌ ಟ್ರೋಫಿಯಲ್ಲಿ ಅಮೋಘ ಜತೆಯಾಟ ನೀಡಿದ್ದ ಈ ಜೋಡಿ ಟುಸ್ ಆಯಿತು.

ಚಾಂಪಿಯನ್ಸ್‌ ಟ್ರೋಫಿಯಲ್ಲಿ ಗೋಲ್ಡನ್‌ ಬ್ಯಾಟ್‌ ಪ್ರಶಸ್ತಿಗೆ ಪಾತ್ರರಾಗಿದ್ದ ಶಿಖರ್‌ ಧವನ್‌ ಇಲ್ಲಿ ಎಡವಿದರು. 10 ಎಸೆತ ಎದುರಿಸಿದ ಅವರು ಕೇವಲ 11 ರನ್‌ ಗಳಿಸಿ ಔಟಾದರು.ವಿರಾಟ್‌ ಕೊಹ್ಲಿ 21 ಎಸೆತ ಎದುರಿಸಿದ ಅವರು 11 ರನ್‌ ಗಳಿಸಿ ಪೆವಿಲಿಯನ್ ಗೆ ತೆರಳಿದರು.

ಆ ಬಳಿಕ ರೋಹಿತ್‌ ಮತ್ತು ದಿನೇಶ್‌ ಕಾರ್ತಿಕ್‌ ಅವರು ಮೂರನೇ ವಿಕೆಟಿಗೆ 62 ರನ್‌ ಪೇರಿಸಿದರು. 26ನೇ ಓವರಿನಲ್ಲಿ 23 ರನ್‌ ಗಳಿಸಿದ ದಿನೇಶ್‌ ಕಾರ್ತಿಕ್‌ ಔಟಾದರು. ರೋಹಿತ್‌ ಶರ್ಮ 60 ರನ್ನುಗಳಿಗೆ ಆಟ ಮುಗಿಸಿದರು.

ನಂತರ ಸುರೇಶ್ ರೈನಾ 44, ನಾಯಕ ಧೋನಿ 27 ರನ್ ಹೊಡೆದರೂ ರನ್ ಗತಿ ಹೆಚ್ಚಿಸಲು ಸಾಧ್ಯವಾಗಲಿಲ್ಲ. ಭಾರತ ನಿಗದಿತ 50 ಓವರ್ ಗಳಲ್ಲಿ 229/7 ಸ್ಕೋರ್ ಗೆ ತೃಪ್ತಿ ಪಡಬೇಕಾಯಿತು.

ವಿಂಡೀಸ್ ಪರ ಕೆಮಾರ್ ರೋಚ್, ಟಿನೋ ಬೆಸ್ಟ್, ಸ್ಯಾಮಿ ತಲಾ 2 ವಿಕೆಟ್ ಪಡೆದರೆ ಸ್ಯಾಮುಯಲ್ಸ್ 1 ವಿಕೆಟ್ ಕಬಳಿಸಿದರು.

Story first published:  Monday, July 1, 2013, 8:48 [IST]
English summary
West Indies won by 1 wicket against India in 47.4 overs after India was put into bat to score 229 for seven in a Celkon Mobile Cup Tri—series match in Kingston on Monday.
ಅಭಿಪ್ರಾಯ ಬರೆಯಿರಿ