Englishहिन्दीമലയാളംதமிழ்తెలుగు

ನಿಗದಿಯಂತೆ ನಡೆಯಲಿದೆ ಐಪಿಎಲ್ 2013 ಫೈನಲ್

Posted by:
Updated: Sunday, May 26, 2013, 9:46 [IST]
 

ಕೋಲ್ಕತಾ, ಮೇ. 25 : ಸ್ಪಾಟ್ ಫಿಕ್ಸಿಂಗ್‌ನಿಂದಾಗಿ ಇಂಡಿಯನ್ ಪ್ರೀಮಿಯರ್ ಲೀಗ್‌ಗೆ ಏನೇ ಕಳಂಕ ಅಂಟಿಕೊಂಡಿದ್ದರೂ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಮುಂಬೈ ಇಂಡಿಯನ್ ನಡುವಿನ ಅಂತಿಮ ಹಣಾಹಣಿ ಕೋಲ್ಕತಾದ ಈಡನ್ ಗಾರ್ಡನ್ಸ್‌ನಲ್ಲಿ ನಿಗದಿತ ವೇಳಾಪಟ್ಟಿಯಂತೆ ಭಾನುವಾರ, ಮೇ 26ರಂದು ಸಂಜೆ 8 ಗಂಟೆಗೆ ನಡೆಯಲಿದೆ.

ಸ್ಪಾಟ್ ಫಿಕ್ಸಿಂಗ್ ಹಗರಣದಿಂದಾಗಿ ಮತ್ತು ಫೈನಲ್ ತಲುಪಿರುವ ಚೆನ್ನೈ ಸೂಪರ್ ಕಿಂಗ್ಸ್‌ನ ಸಿಇಓ ಗುರುನಾಥ್ ಮೇಯಪ್ಪನ್‌ನೇ ಹಗರಣದಲ್ಲಿ ಭಾಗಿಯಾಗಿರುವುದರಿಂದ ಫೈನಲ್ ಪಂದ್ಯ ನಡೆಯುತ್ತದೋ ಇಲ್ಲವೋ ಎಂದು ಅನುಮಾನಗಳು ಮೂಡಿದ್ದವು. ಅಲ್ಲದೆ, ಕೆಲ ಕ್ರಿಕೆಟ್ ಪ್ರೇಮಿಗಳು, ಐಪಿಎಲ್ ಫೈನಲ್ ಪಂದ್ಯ ನಡೆಸಲು ಅವಕಾಶ ನೀಡಬಾರದೆಂದು ರಿಟ್ ಅರ್ಜಿಯನ್ನೂ ಸಲ್ಲಿಸಿದ್ದರು.

ಚೆನ್ನೈ ಸೂಪರ್ ಕಿಂಗ್ಸ್ 'ಗೌರವ ಸದಸ್ಯ'ನಾಗಿರುವ ಗುರುನಾಥ ಮೇಯಪ್ಪನ್ ಅವರನ್ನು ಮುಂಬೈ ಪೊಲೀಸರು ಬಂಧಿಸಿರುವುದರಿಂದ ಫೈನಲ್‌ಗೆ ಮುಂಚೆಯೇ ಚೆನ್ನೈ ಸೂಪರ್ ಕಿಂಗ್ಸ್ ಫ್ರಾಂಚೈಸಿಯನ್ನು ರದ್ದುಪಡಿಸಲಾಗುವುದು ಎಂಬ ಸುದ್ದಿ ಹಬ್ಬಿತ್ತು. ಅಲ್ಲದೆ, ಈ ಐಪಿಎಲ್ ಫೈನಲ್ ಪಂದ್ಯದ ನಂತರ ಸಿಎಸ್‌ಕೆ ಅಸ್ತಿತ್ವದಲ್ಲಿರುವ ಬಗ್ಗೆಯೂ ಅನುಮಾನಗಳಿವೆ.

ನಿಗದಿಯಂತೆ ನಡೆಯಲಿದೆ ಐಪಿಎಲ್ 2013 ಫೈನಲ್

ಸಿಎಸ್‌ಕೆ ಫ್ರಾಂಚೈಸಿಯನ್ನು ರದ್ದುಪಡಿಸಬೇಕೆಂದು ಐಪಿಎಲ್ ಹಿಂದಿನ ಕಮಿಷನರ್ ಆಗಿದ್ದ ಲಲಿತ್ ಮೋದಿ ಅವರು ಆಗ್ರಹಿಸಿದ್ದರು. ಕಳ್ಳಾಟದಲ್ಲಿ ಫ್ರಾಂಚೈಸಿ ಮಾಲಿಕರು ಭಾಗಿಯಾಗಿರುವ ಬಗ್ಗೆ ತಿಳಿದುಬಂದರೆ ಫ್ರಾಂಚೈಸಿಯನ್ನೇ ರದ್ದುಪಡಿಸಬಹುದೆಂದು ನಿಮಯಗಳು ಹೇಳುತ್ತವೆ.

ಬಿಸಿಸಿಐ ಅಧ್ಯಕ್ಷರಾಗಿರುವ ಶ್ರೀನಿವಾಸನ್ ಅವರ ಅಳಿಯನಾಗಿರುವ ಗುರುನಾಥ್ ಮೇಯಪ್ಪನ್ ಅವರನ್ನು ಸದ್ಯಕ್ಕೆ ಮೇ 29ರವರೆಗೆ ಪೊಲೀಸ್ ಕಸ್ಟಡಿಗೆ ನೀಡಲಾಗಿದೆ. ವಿಚಾರಣೆಯ ವೇಳೆ ಯಾವುದೇ ಫ್ರಾಂಚೈಸಿಯ ಮಾಲಿಕರು ಭಾಗಿಯಾಗಿಲ್ಲ ಎಂದು ಕ್ರೈಂ ಬ್ರಾಂಚ್ ಪೊಲೀಸರು ಹೇಳಿದ್ದಾರೆ.

ಕ್ರಿಕೆಟ್‌ಗೆ ಕಪ್ಪುಚುಕ್ಕೆ ಬಳಿದಿರುವ ಸ್ಪಾಟ್ ಫಿಕ್ಸಿಂಗ್‌ನಿಂದಾಗಿ ಹಲವಾರು ಕ್ರಿಕೆಟ್ ಪ್ರೇಮಿಗಳು ಈ ಕ್ರೀಡೆಯ ಬಗ್ಗೆ ಆಸಕ್ತಿ ಕಳೆದುಕೊಂಡಿದ್ದಾರಾದರೂ, ಕೋಲ್ಕತಾದಲ್ಲಿ ಭಾನುವಾರ ನಡೆಯಲಿರುವ ಹೈವೋಲ್ಟೇಜ್ ಫೈನಲ್ ಪಂದ್ಯವನ್ನು ಕ್ರಿಕೆಟ್ ಪ್ರೇಮಿಗಳು ಎದುರು ನೋಡುತ್ತಿದ್ದಾರೆ. ನಮ್ಮ ಬೆಂಬಲ ಮುಂಬೈ ಇಂಡಿಯನ್ಸ್‌ಗೆ ಎಂದು ಹಲವಾರು ಟ್ವಿಟ್ಟಿಗರು ಟ್ವೀಟ್ ಕುಟ್ಟುತ್ತಿದ್ದಾರೆ.

ಮಹೇಂದ್ರ ಸಿಂಗ್ ಧೋನಿ ನಾಯಕತ್ವದ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ರೋಹಿತ್ ಶರ್ಮಾ ನಾಯಕತ್ವದ ಮುಂಬೈ ಇಂಡಿಯನ್ ತಂಡಗಳು ಸಾಕಷ್ಟು ಬಲಾಢ್ಯವಾಗಿಯೇ ಇವೆ. ಸಿಎಸ್ಕೆ 5ನೇ ಬಾರಿ ಫೈನಲ್ ತಲುಪಿದ್ದು, ಮೂರನೇ ಬಾರಿ ಕಪ್ ಗೆದ್ದುಕೊಳ್ಳಲು ತಯಾರಾಗಿದೆ. ರಿಕಿ ಪಾಂಟಿಂಗ್ ನಾಯಕತ್ವದಿಂದ ಹಿಂಜರಿದ ನಂತರ ರೋಹಿತ್ ಮುಂದಾಳತ್ವದಲ್ಲಿ ಮುಂಬೈ ಇಂಡಿಯನ್ ಕೂಡ ಗೆಲುವಿನ ರುಚಿ ಕಂಡುಕೊಂಡಿದೆ.

Story first published:  Saturday, May 25, 2013, 17:30 [IST]
English summary
The IPL 2013 final between Chennai Super Kings and Mumbai Indians will go on as per scheduled on May 26, Sunday, according to reports on Saturday.
ಅಭಿಪ್ರಾಯ ಬರೆಯಿರಿ