Englishहिन्दीമലയാളംதமிழ்తెలుగు

ಟಿ20 ನಾಯಕತ್ವಕ್ಕೆ ಧೋನಿ ಬೇಡ, ದ್ರಾವಿಡ್ ಸಲಹೆ

Posted by:
Updated: Thursday, January 10, 2013, 17:06 [IST]
 

ಬೆಂಗಳೂರು, ಜ.10: ಭಾರತೀಯ ಕ್ರಿಕೆಟ್ ನ ಅಪ್ರತಿಮ ಆಟಗಾರ ರಾಹುಲ್ ದ್ರಾವಿಡ್ ಅವರು ನಾಯಕ ಎಂಎಸ್ ಧೋನಿ ಅವರಿಗೆ ಕಿವಿಮಾತು ಹೇಳಿದ್ದಾರೆ. ಎಂಎಸ್ ಧೋನಿ ಅವರು ಟಿ20 ನಾಯಕತ್ವ ತ್ಯಜಿಸಿದರೆ ಒಳ್ಳೆಯದು ಎಂದು ದ್ರಾವಿಡ್ ಹೇಳಿದ್ದಾರೆ.

ಟೆಸ್ಟ್ ಕ್ರಿಕೆಟ್ ನಲ್ಲಿ ನಾಯಕತ್ವ ವಹಿಸಲು ಧೋನಿ ಅತ್ಯಂತ ಸಮರ್ಥರಾಗಿದ್ದಾರೆ. ಟೆಸ್ಟ್ ಕ್ರಿಕೆಟ್ ಗೆ ಧೋನಿ ನಾಯಕತ್ವದ ಅಗತ್ಯವಿದೆ. ನಿರಂತರ ಕ್ರಿಕೆಟ್ ನಿಂದ ಧೋನಿ ದಣಿದಿದ್ದಾರೆ. ಅವರಿಗೆ ವಿಶ್ರಾಂತಿಯ ಅಗತ್ಯವಿದೆ.

ಟಿ20 ಕ್ರಿಕೆಟ್ ನಲ್ಲಿ ಅವರ ಸಾಧನೆ ಅಷ್ಟು ಉತ್ತಮವಾಗಿಲ್ಲ ಎಂದು ಅಂಕಿ ಅಂಶಗಳು ಹೇಳುತ್ತಿದೆ ಎಂದು ದ್ರಾವಿಡ್ ಅವರು ಇಎಸ್ ಪಿಎನ್ ನೀಡಿದ ಸಂದರ್ಶನದಲ್ಲಿ ಹೇಳಿದ್ದಾರೆ.

ಟಿ20 ತಂಡಕ್ಕೆ ವಿರಾಟ್ ಕೊಹ್ಲಿ ನಾಯಕರಾದರೆ ಹೆಚ್ಚಿನ ಉತ್ಸಾಹದಿಂದ ಆಡಲು ಸಾಧ್ಯ. 64 ಟೆಸ್ಟ್ ಗಳಲ್ಲಿ 13288 ರನ್ ಪೇರಿಸಿದ ಬೃಹತ್ ಪ್ರತಿಭೆ ರಾಹುಲ್ ದ್ರಾವಿಡ್ ಅವರು ಇಂಗ್ಲೆಂಡ್ ಸರಣಿಗೂ ಮುನ್ನ ಧೋನಿ ನಾಯಕತ್ವದಲ್ಲಿ ಬದಲಾವಣೆ ಬೇಡ ಎಂದಿದ್ದರು.

ಆದರೆ, ಕಳೆದ ವಾರ ಪಾಕಿಸ್ತಾನದ ವಿರುದ್ಧ ಭಾರತ ಟಿ20 ಪಂದ್ಯಗಳನ್ನು ಸೋತ ರೀತಿ ನೋಡಿದ ಮೇಲೆ ದ್ರಾವಿಡ್ ಕೂಡಾ ತಮ್ಮ ಅಭಿಪ್ರಾಯಬದಲಾಯಿಸಿದ್ದಾರೆ.

ಐಪಿಎಲ್ ನಲ್ಲಿ ಕಂಡ ಯಶಸ್ಸು ಬೇರೆ ಭಾರತದ ಪರ ಟಿ20 ಮುನ್ನಡೆಸುವುದೇ ಬೇರೆ. ಚೆನ್ನೈ ಸೂಪರ್ ಕಿಂಗ್ಸ್ ನಾಯಕತ್ವವನ್ನು ತ್ಯಜಿಸಿದರೆ ಇನ್ನೂ ಒಳ್ಳೆಯದು ಎಂದು ದ್ರಾವಿಡ್ ಅಭಿಪ್ರಾಯಪಟ್ಟಿದ್ದಾರೆ.

ಆದರೆ, ಟೆಸ್ಟ್ ಕ್ರಿಕೆಟ್ ನಲ್ಲಿ ಧೋನಿ ಅವರು ಬ್ಯಾಟ್ಸ್ ಮನ್ ಹಾಗೂ ವಿಕೆಟ್ ಕೀಪರ್ ಆಗಿ ತಮ್ಮ ನೈಜ ಆಟ ಪ್ರದರ್ಶಿಸಬೇಕಿದೆ. ನಾಯಕತ್ವದ ಭಾರ ಕೊಂಚ ತಗ್ಗಿಸಿದರೆ ಉತ್ತಮ ಪ್ರದರ್ಶನ ನೀಡಬಲ್ಲರು.

ವಿರಾಟ್ ಕೊಹ್ಲಿ ಎಲ್ಲಾ ಮಾದರಿಯಲ್ಲೂ ಹೊಂದಿಕೊಳ್ಳಬಲ್ಲ ಸಮರ್ಥ ಆಟಗಾರ. ಭಾರತದ ಭವಿಷ್ಯದ ನಾಯಕ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ, ಆಯ್ಕೆದಾರರ ಜೊತೆಗೆ ಇಡೀ ವಿಶ್ವವೇ ಮುಂದಿನ 12 ತಿಂಗಳಿನಲ್ಲಿ ಕೊಹ್ಲಿ ಆಟವನ್ನು ಗಮನಿಸಲಿದೆ. ಕೊಹ್ಲಿ ತನ್ನ ಜವಾಬ್ದಾರಿ ಅರಿತು ಇನ್ನಷ್ಟು ತಾಳ್ಮೆಯಿಂದ ಕ್ರೀಸ್ ನಲ್ಲಿ ನಿಂತರೆ ಪ್ರತಿಭೆಗೆ ತಕ್ಕ ಆಟ ಪ್ರದರ್ಶಿಸಬಹುದಾಗಿದೆ ಎಂದು ದ್ರಾವಿಡ್ ಹೇಳಿದ್ದಾರೆ.

ಕಳೆದ ವರ್ಷ ಭಾರತ ತಂಡ ಟೆಸ್ಟ್ ಕ್ರಿಕೆಟ್ ನಲ್ಲಿ ಸತತವಾಗಿ 8 ಸೋಲುಗಳನ್ನು ಕಂಡ ಮೇಲೆ, ಇಂಗ್ಲೆಂಡ್ ವಿರುದ್ಧ ಸರಣಿ ಸೋಲುಂಡ ಮೇಲೆ ಎಂಎಸ್ ಧೋನಿ ನಾಯಕತ್ವದ ಬಗ್ಗೆ ಪ್ರಶ್ನೆ ಎದ್ದಿತ್ತು. ಟಿ20, ಏಕದಿನ ಕ್ರಿಕೆಟ್ ಹಾಗೂ ಟೆಸ್ಟ್ ಕ್ರಿಕೆಟ್ ಗೆ ಪ್ರತ್ಯೇಕ ನಾಯಕರನ್ನು ನೇಮಿಸುವ ಬಗ್ಗೆ ಬಿಸಿಸಿಐನ ಹೊಸ ಆಯ್ಕೆ ಮಂಡಳಿ ಹಾಗೂ ಮಾಜಿ ಆಟಗಾರರು ಒಲವು ತೋರಿಸಿದ್ದಾರೆ ಎಂಬ ಸುದ್ದಿ ಹಬ್ಬಿತ್ತು.

Story first published:  Thursday, January 10, 2013, 16:45 [IST]
English summary
Former India cricketer Rahul Dravid feels MS Dhoni should quit T20 captaincy and lead the side in Tests.
ಅಭಿಪ್ರಾಯ ಬರೆಯಿರಿ