Englishहिन्दीമലയാളംதமிழ்తెలుగు

ಏಕದಿನ ಕ್ರಿಕೆಟ್‌ಗೆ ಸಚಿನ್ ತೆಂಡೂಲ್ಕರ್ ಬೈಬೈ

Posted by:
Updated: Sunday, December 23, 2012, 15:45 [IST]
 

ಏಕದಿನ ಕ್ರಿಕೆಟ್‌ಗೆ ಸಚಿನ್ ತೆಂಡೂಲ್ಕರ್ ಬೈಬೈ
 

ಮುಂಬೈ, ಡಿ. 23 : ನಿರೀಕ್ಷೆಯ ಘಳಿಗೆ ಬಂದುಬಿಟ್ಟಿದೆ. ಕ್ರಿಕೆಟ್ ಕ್ಷೇತ್ರದ 'ದೇವರು' ಎಂದು ಹೆಗ್ಗಳಿಕೆ ಹೊಂದಿರುವ ಸಚಿನ್ ರಮೇಶ್ ತೆಂಡೂಲ್ಕರ್ (39) ಅವರು ಡಿ.23ರಂದು ತಮ್ಮ 23 ವರ್ಷಗಳ ಏಕದಿನ ಕ್ರಿಕೆಟ್ ಜೀವನಕ್ಕೆ ಭಾನುವಾರ ನಿವೃತ್ತಿ ಘೋಷಿಸಿದ್ದಾರೆ.

ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯ ನಾಗ್ಪುರ ಟೆಸ್ಟ್ ಪಂದ್ಯದಲ್ಲಿಯೇ ಸಚಿನ್ ತೆಂಡೂಲ್ಕರ್ ಅವರು ನಿವೃತ್ತಿ ಘೋಷಿಸಲಿದ್ದಾರೆ ಎಂದು ಸುದ್ದಿ ಹಬ್ಬಿತ್ತು. ಆ ಪಂದ್ಯದಲ್ಲಿ ಅವರ ಪತ್ನಿ ಅಂಜಲಿ ಅವರು ಕೂಡ ಇದ್ದದ್ದು ಈ ಊಹಾಪೋಹಕ್ಕೆ ನೀರು ಗೊಬ್ಬರ ಎರೆದಿತ್ತು. ಎಲ್ಲ ಊಹಾಪೋಹಗಳನ್ನು ಗಾಳಿಗೆ ತೂರಿದ್ದ ಸಚಿನ್ ಆಗ ನಿವೃತ್ತಿ ಘೋಷಿಸಿರಲಿಲ್ಲ.

ಅವರು ಸದ್ಯಕ್ಕೆ ಏಕದಿನ ಪಂದ್ಯಗಳಿಗೆ ಮಾತ್ರ ನಿವೃತ್ತಿ ಘೋಷಿಸಿದ್ದಾರೆ. ಅವರು ಟೆಸ್ಟ್ ಕ್ರಿಕೆಟ್‌ಗೆ ಇನ್ನೂ ನಿವೃತ್ತಿ ಘೋಷಣೆ ಮಾಡಿಲ್ಲ. ಮುಂಬರುವ ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್ ಸರಣಿಯ ನಂತರ ಅವರು ಟೆಸ್ಟ್ ಕ್ರಿಕೆಟ್‌ಗೂ ಗುಡ್ ಬೈ ಹೇಳಲಿದ್ದಾರೆ ಎಂಬ ಮಾತು ಕೇಳಿಬಂದಿವೆ.

ಸಚಿನ್ ಅವರು ಪಾಕಿಸ್ತಾನದ ವಿರುದ್ಧದ ಏಕದಿನ ಸರಣಿಯಲ್ಲಿ ಆಡಬಹುದು ಎಂದು ನಿರೀಕ್ಷಿಸಲಾಗಿತ್ತು. ಜೊತೆಗೆ ಅವರನ್ನು ಏಕದಿನ ಸರಣಿಗೆ ಬಿಸಿಸಿಐ ಪರಿಗಣಿಸುವುದೋ ಇಲ್ಲವೋ ಎಂಬ ಗಾಳಿಸುದ್ದಿ ಕೂಡ ಹಬ್ಬಿತ್ತು. ಈ ಎಲ್ಲ ನಿರೀಕ್ಷೆಗಳನ್ನು ಹುಸಿಗೊಳಿಸಿರುವ ಸಚಿನ್ ತೆಂಡೂಲ್ಕರ್ ಅವರು ಏಕದಿನ ಕ್ರಿಕೆಟ್‌ಗೆ ಗುಡ್ ಬೈ ಹೇಳಿ ಅವರ ಅಭಿಮಾನಿಗಳಲ್ಲಿ ನಿರಾಶೆ ಮೂಡಿಸಿದ್ದಾರೆ.

1989ರಲ್ಲಿ ಕ್ರಿಕೆಟ್ ಪಯಣ ಆರಂಭಿಸಿದ ಸಚಿನ್ ಅವರು ಇಲ್ಲಿಯವರೆಗೆ 463 ಏಕದಿನ ಪಂದ್ಯಗಳನ್ನು ಆಡಿದ್ದು, 44.83 ಸರಾಸರಿಯಲ್ಲಿ 18,426 ರನ್ ಪೇರಿಸಿದ್ದು, 49 ಸೆಂಚುರಿ ಮತ್ತು 96 ಅರ್ಧ ಶತಕಗಳನ್ನು ಗಳಿಸಿದ್ದಾರೆ.  ಉತ್ತಮ ಲೆಗ್ ಕಟ್ಟರ್ ಬೌಲರ್ ಕೂಡ ಆಗಿರುವ ಅವರು 154 ವಿಕೆಟ್ ಕಿತ್ತಿದ್ದಾರೆ. ಗ್ವಾಲಿಯರ್‌ನಲ್ಲಿ ದಕ್ಷಿಣ ಆಫ್ರಿಕಾದ ವಿರುದ್ಧ 2010ರಲ್ಲಿ ಬಾರಿಸಿದ 200 ನಾಟೌಟ್ ಸಚಿನ್ ಗಳಿಸಿದ ಅತ್ಯಧಿಕ ಸ್ಕೋರ್.

ಸಚಿನ್ ಏಕದಿನದ ಪಂದ್ಯಗಳಿಗೆ ನಿವೃತ್ತಿ ಘೋಷಿಸಿದ್ದಾರೆ. ಟೆಸ್ಟ್ ಕ್ರಿಕೆಟ್‌ಗೆ ವಿದಾಯ ಹೇಳುವ ದಿನವೂ ದೂರವಿಲ್ಲ. ಆದರೆ, ಅವರ ಸೇವೆ ಕ್ರಿಕೆಟ್‌ಗೆ ಇನ್ನೂ ಲಭಿಸಲಿ. ಇನ್ನೂ ಅನೇಕ ಸಚಿನ್ ತೆಂಡೂಲ್ಕರ್‌ರಂತಹ ಆಟಗಾರರನ್ನು ರೂಪಿಸುವಲ್ಲಿ ಅವರು ತಮ್ಮ ಅನುಭವವನ್ನು ಧಾರೆ ಎರೆಯಲಿ.

Story first published:  Sunday, December 23, 2012, 11:37 [IST]
English summary
Legendary cricket player Sachin Tendulkar bids goodbye to One day internationals. BCCI has confirmed the news about Sachin's retirement.
ಅಭಿಪ್ರಾಯ ಬರೆಯಿರಿ