Englishहिन्दीമലയാളംதமிழ்తెలుగు

ಭಾರತ ತಂಡಕ್ಕೆ ಮಣ್ಣು ತಿನ್ನಿಸಿದ ಮಧುಸೂದನ್

Posted by:
Updated: Monday, November 26, 2012, 17:55 [IST]
 

ಮುಂಬೈ, ನ.26: ಎರಡನೇ ಟೆಸ್ಟ್ ಗೆಲ್ಲಲು ಕೇವಲ 57 ರನ್ ಗುರಿ ಪಡೆದ ಪ್ರವಾಸಿ ಇಂಗ್ಲೆಂಡ್ ತಂಡ ಸುಲಭವಾಗಿ ಗುರಿ ತಲುಪಿ ಜಯದ ಬ್ಯೂಗಲ್ ಊದಿದೆ. ನಾಯಕ ಕುಕ್ ಹಾಗೂ ನಿಕ್ ಕಾಂಪ್ಟನ್ ಜವಾಬ್ದಾರಿಯುತವಾಗಿ ಆಡಿ ಗೆಲುವಿನ ದಡ ಮುಟ್ಟಿದ್ದಾರೆ.

ಭಾರತ ಮೊದಲ ಟೆಸ್ಟ್ ನಲ್ಲಿ ಬಿಟ್ಟ ಬಾಣ ಈಗ ತಿರುಗು ಬಾಣವಾಗಿದೆ. ಮಧುಸೂಧನ ಸಿಂಗ್ ಪನೇಸರ್ ಮೋಡಿ ಟೀಂ ಇಂಡಿಯಾ ಶರಣಾಗಿದೆ. 4 ಟೆಸ್ಟ್ ಗಳ ಸರಣಿಯಲ್ಲಿ ಉಭಯ ತಂಡಗಳು 1-1 ಸಮಬಲ ಸಾಧಿಸಿದೆ. ಮುಂದಿನ ಟೆಸ್ಟ್ ಪಂದ್ಯ ಕೋಲ್ಕತ್ತಾದಲ್ಲಿ ಡಿ.5 ರಂದು ಬೆಳಗ್ಗೆ 9 ಗಂಟೆಗೆ ಆರಂಭವಾಗಲಿದೆ.

9.4 ಓವರ್ ಗಳಲ್ಲಿ ಯಾವುದೇ ವಿಕೆಟ್ ಕಳೆದುಕೊಳ್ಳದೇ 58 ರನ್ ಗಳಿಸಿದ ಆಂಗ್ಲರು ವಿಜಯೋತ್ಸವ ಆಚರಿಸಿದ್ದಾರೆ. ನಾಯಕ ಅಲಿಸ್ಟರ್ ಕುಕ್ 18 ರನ್ ಹಾಗೂ ನಿಕ್ ಕಾಂಪ್ಟನ್ 30 ರನ್ ಮಾಡಿ ಔಟಾಗದೆ ಉಳಿದು ತಂಡಕ್ಕೆ ಅರ್ಹ ಜಯ ಸಂಪಾದಿಸಿದ್ದಾರೆ.

ಗೆಲುವಿನ ರುವಾರಿಗಳು: ಇಂಗ್ಲೆಂಡ್ ತಂಡದ ಗೆಲುವಿಗೆ ನಾಯಕ ಕುಕ್ ಅಲ್ಲದೆ ಮಧುಸೂದನ  ಹಾಗೂ ಕೆಪಿ ಕಾರಣ ಎನ್ನಬಹುದು. ಅದರಲ್ಲೂ 30 ವರ್ಷದ ಎಡಗೈ ಸ್ಪಿನ್ನರ್ ಮಧುಸೂದನ್ ಸಿಂಗ್ ಪನೇಸರ್ ಯಾನೆ ಮಾಂಟಿ ಪನೇಸರ್ ದಾಳಿಗೆ ಸಿಲುಕಿದ ಟೀಂ ಇಂಡಿಯಾ ವಿಲವಿಲನೆ ಒದ್ದಾಡಿಬಿಟ್ಟಿತು.

ಮೊದಲ ಇನ್ನಿಂಗ್ಸ್ ನಲ್ಲಿ 129 ರನ್ನಿತ್ತು 5 ವಿಕೆಟ್, ಎರಡನೇ ಇನ್ನಿಂಗ್ಸ್ ನಲ್ಲಿ 81 ರನ್ ನೀಡಿ 6 ವಿಕೆಟ್ ಪಡೆದ ಪನೇಸರ್ ಇಂಗ್ಲೆಂಡ್ ಗೆಲುವಿನ ರುವಾರಿ ಎನಿಸಿದರು. ಪನೇಸರ್ ಗೆ ಉತ್ತಮ ಬೆಂಬಲ ನೀಡಿದ ಸ್ವ್ಯಾನ್ 8 ವಿಕೆಟ್ ಕಬಳಿಸಿದರು.

ಎರಡನೇ ಇನ್ನಿಂಗ್ಸ್ ನಲ್ಲಿ ನಾಯಕ ಅಲಿಸ್ಟರ್ ಕುಕ್ 122 ಹಾಗು ಕೆವಿನ್ ಪೀಟರ್ಸನ್ 188 ರನ್ (233 ಎಸೆತ, 20 ಬೌಂಡರಿ, 4 ಸಿಕ್ಸರ್) ಬಾರಿಸಿದ್ದು ತಂಡದ ಗತಿ ಬದಲಿಸಿಬಿಟ್ಟಿತು. ಕೆವಿನ್ ಪೀಟರ್ಸನ್ ಅವರನ್ನು ಪಂದ್ಯ ಪುರುಷೋತ್ತಮ ಎಂದು ಘೋಷಿಸಲಾಯಿತು.

ಭಾರತ ಕೂಡಾ ಎರಡನೇ ಇನ್ನಿಂಗ್ಸ್ ನಲ್ಲಿ ಕಳಪೆ ಬ್ಯಾಟಿಂಗ್ ಪ್ರದರ್ಶಿಸಿತು. ಗಂಭೀರ್ 65, ಅಶ್ವಿನ್ 11 ಗಳಿಸಿದ್ದು ಬಿಟ್ಟರೆ ಉಳಿದವರು ಹತ್ತರ ಗಡಿ ದಾಟದಂತೆ ಪನೇಸರ್ ಹಾಗೂ ಸ್ವ್ಯಾನ್ ಜೋಡಿ ಕಟ್ಟಿ ಹಾಕಿತು.

ಒಟ್ಟಾರೆ, ಸ್ಪಿನ್ ಪಿಚ್ ಬೇಕು ಎಂದು ಕೇಳಿದ್ದ, ಸ್ಪಿನ್ ಮೂಲಕ ಮೊದಲ ಟೆಸ್ಟ್ ಗೆದ್ದು ಬೀಗಿದ್ದ ಧೋನಿಗೆ ಇಂಗ್ಲೆಂಡ್ ತಂಡ ಸ್ಪಿನ್ ಮೂಲಕವೇ ದಿಟ್ಟ ಉತ್ತರ ನೀಡಿದೆ.

ಇದಕ್ಕೂ ಮುನ್ನ ಭಾರತ ತಂಡ 44.1 ಓವರ್ ಗಳಲ್ಲಿ 142 ರನ್ ಗಳ ಅಲ್ಪ ಮೊತ್ತಕ್ಕೆ ಆಲೌಟ್ ಆಯಿತು. ಮಾಂಟಿ ಪನೇಸರ್ 6 ವಿಕೆಟ್ ಕಿತ್ತು ಭಾರತದ ಬೆನ್ನೆಲುಬು ಮುರಿದರು. ಸ್ವ್ಯಾನ್ ಉತ್ತಮ ಸಾಥ್ ನೀಡಿ 4 ವಿಕೆಟ್ ಕಬಳಿಸಿದರು.

ಎರಡನೇ ಇನ್ನಿಂಗ್ಸ್ ನಲ್ಲಿ ಭಾರತದ ಪರ ಗೌತಮ್ ಗಂಭೀರ್ 65 ರನ್ ಗಳಿಸಿದ್ದು ಬಿಟ್ಟರೆ, ಉಳಿದವರು ಹೀಗೆ ಬಂದು ಹಾಗೆ ಪೆವಿಲಿಯನ್ ಗೆ ಹೋದರು.

ಗಂಭೀರ್ ಅವರ ಔಟ್ ಬಗ್ಗೆ ಅನುಮಾನಗಳು ಎದ್ದಿದ್ದು, ಅಂಪೈರ್ ಟೋನಿ ಹಿಲ್ ಅವರು ಸ್ವ್ಯಾನ್ ಬೌಲಿಂಗ್ ನಲ್ಲಿ ಗಂಭೀರ್ ಅವರನ್ನು ಎಲ್ ಬಿಡಬ್ಲ್ಯೂ ಎಂದು ತೀರ್ಪು ನೀಡಿದ್ದರು. ಆದರೆ, ಗಂಭೀರ್ ಅವರ ಬ್ಯಾಟಿನ ಒಳಬದಿಗೆ ಚೆಂಡು ತಗುಲಿರುವುದು ಸ್ಪಷ್ಟವಾಗಿ ಗೋಚರಿಸುತ್ತಿತ್ತು.

ಓಜಾ ಕೂಡಾ ಔಟಾಗಬೇಕಿತ್ತು. ಆದರೆ, ಅಂಪೈರ್ ಅಲೀಂ ಧರ್ ಅವರು ಓಜಾ ಬ್ಯಾಟ್ ಗೆ ಚೆಂಡು ತಗುಲಿದ್ದು ಗಮನಿಸದೆ ಕ್ಯಾಚ್ ಮನವಿಯನ್ನು ತಳ್ಳಿ ಹಾಕಿದ್ದರು.

ನಿನ್ನೆ ಔಟಾಗದೆ ಉಳಿದಿದ್ದ ಹರ್ಭಜನ್ ಸಿಂಗ್ ಅವರು ದಿನದ ಆರಂಭದಲ್ಲಿ ಮೊದಲಿಗರಾಗಿ ಔಟಾದರು. ಭಜ್ಜಿ ವಿಕೆಟ್ ಸ್ವ್ಯಾನ್ ಪಾಲಾದರೆ, ಜಹೀರ್ ವಿಕೆಟ್ ಪನೇಸರ್ ಪಾಲಾಯಿತು.

ಈ ಮೂಲಕ ಈ ಪಂದ್ಯದಲ್ಲಿ ಎಡಗೈ ಸ್ಪಿನ್ನರ್ ಮಾಂಟಿ ಪನೇಸರ್ ಅವರು ಒಟ್ಟು 11 ವಿಕೆಟ್ ಗಳಿಸಿದ್ದಾರೆ. ಮೂರನೇ ದಿನದ ಅಂತ್ಯಕ್ಕೆ ಟೀಂ ಇಂಡಿಯಾ 117/7 ಸ್ಕೋರ್ ಮಾಡಿ ಹೀನಾಯ ಸ್ಥಿತಿಯಲ್ಲಿತ್ತು, ಕೇವಲ 31 ರನ್ ಗಳ ಅಲ್ಪ ಮುನ್ನಡೆ ಗಳಿಸಿತ್ತು.

Story first published:  Monday, November 26, 2012, 10:33 [IST]
English summary
England, led by their spinners Monty Panesar and Graeme Swann, thrashed India by 10 wickets in the second Test here at Wankhede Stadium on Monday(Nov.26).
ಅಭಿಪ್ರಾಯ ಬರೆಯಿರಿ