Englishहिन्दीമലയാളംதமிழ்తెలుగు

ಮುನಿಸಿಕೊಂಡ ಮಡದಿ ಬೌನ್ಸರ್ ಗೆ ಸಚಿನ್ ಬೋಲ್ಡ್

Posted by:
Updated: Saturday, November 24, 2012, 18:17 [IST]
 

ಮುಂಬೈ, ನ.24: ಬೌಲರ್ ಗಳ ಬಿಡುಗಾಳಿ ಚೆಂಡಿಗಿಂತ ಮುನಿಸಿಕೊಂಡ ಮಡದಿ ಎದುರಿಸುವುದು ಕಷ್ಟ ಎಂದು ಜಗದೇಕ ವೀರ ಸಚಿನ್ ತೆಂಡೂಲ್ಕರ್ ಹಾಸ್ಯ ಮಾಡಿದ್ದಾರೆ.

ನಾನು ಎಂಥ ಫಾಸ್ಟ್ ಬೌಲರ್ ಗಳ ಬೌನ್ಸರ್ ಬೇಕಾದರೂ ಎದುರಿಸಬಲ್ಲೆ. ಆದರೆ, ಕೋಪಗೊಂಡ ಹೆಂಡತಿಯ ನೋಟ ಶರವೇಗ ಚೆಂಡಿಗಿಂತಲೂ ಭಯಾನಕವಾಗಿರುತ್ತದೆ ಎಂದು ಮಾಸ್ಟರ್ ಬ್ಲಾಸ್ಟರ್ ಸಚಿನ್ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದಾರೆ.

ಮುನಿಸಿಕೊಂಡ ಮಡದಿ ಬೌನ್ಸರ್ ಗೆ ಸಚಿನ್ ಬೋಲ್ಡ್

ಉತ್ತಮ ಹಾಸ್ಯ ಪ್ರಜ್ಞೆ ಹೊಂದಿರುವ ಸಚಿನ್ ಅವರು ಇತ್ತೀಚೆಗೆ ಆಸ್ಟ್ರೇಲಿಯಾದ ಅತ್ಯುನ್ನತ ನಾಗರಿಕ ಗೌರವ ಪಡೆದ ಸಂದರ್ಭದಲ್ಲೂ ಇದೇ ರೀತಿ ಜೋಕ್ ಕಟ್ ಮಾಡಿದ್ದರು.

ಪೇಸ್ ಬೌಲರ್ ಚೆಂಡು ಹಾಗೂ ಹೆಂಡತಿ ಕೋಪ ಇವೆರಡರಲ್ಲಿ ಯಾವುದಕ್ಕೆ ಹೆದರುತ್ತೀರಿ? ಎಂದು ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಸಚಿನ್ 'ನಾನು ಯಾವ ಚೆಂಡನ್ನು ಬೇಕಾದರೂ ಮೈದಾನದಿಂದ ಹೊರಕ್ಕೆ ಅಟ್ಟಬಲ್ಲೆ ಆದರೆ, ಹೆಂಡತಿ ಕೋಪ ಇದೆಯಲ್ಲ. ಅಬ್ಬಬ್ಬಾ ತಡೆದುಕೊಳ್ಳಲು ಸಾಧ್ಯವೆ ಆಗುವುದಿಲ್ಲ ಎಂದಿದ್ದಾರೆ.

ನಾನು ಹೆಂಡತಿ ಬಿಟ್ಟು ದೂರ ಬಂದರೆ ಸಹಜವಾಗಿ ಆಕೆಗೆ ಕೋಪ ಬರುತ್ತದೆ. ಕೆಲವು ಬಾರಿ ಅಕೆ ಕೇಳುವ ಪ್ರಶ್ನೆಗೆ ಸರಿ ಉತ್ತರ ನೀಡದಿದ್ದರೆ ಅಷ್ಟೇ ಮುಗಿದು ಹೋಯ್ತು ಎಂದು ಸಚಿನ್ ನಗೆಯಾಡಿದರು.

ಸಚಿನ್ ಯಶಸ್ಸು ಸ್ತ್ರೀ ಪಾತ್ರ : ನನ್ನ ಜೀವನದಲ್ಲಿ 3 ಮಹಿಳೆಯರು ಮಹತ್ವದ ಪಾತ್ರ ವಹಿಸಿದ್ದಾರೆ. ನನ್ನ ಇಂದಿನ ಯಶಸ್ಸಿಗೆ ಅವರೇ ಕಾರಣ ಎಂದು ಸಚಿನ್ ಹೇಳಿದ್ದಾರೆ.

ಮೊದಲನೆಯದಾಗಿ ನನ್ನ ತಾಯಿ. ನನ್ನ ಚಿಕ್ಕಂದಿನ ಕ್ರಿಕೆಟ್ ಕನಸಿಗೆ ನೀರೆರೆದು ಪೋಷಿಸಿದವರು. ಹೊತ್ತು ಹೊತ್ತಿಗೆ ನನಗೆ ಕಾಫಿ ತಿಂಡಿ, ನೆಚ್ಚಿನ ವಡಾ ಪಾವ್ ಒದಗಿಸುತ್ತಿದ್ದರು. ಉದ್ಯೋಗಸ್ಥ ಮಹಿಳೆಯಾದರೂ ನನಗಾಗಿ ಸದಾ ಕಾಲ ಸಮಯ ಮೀಸಲಿಡುತ್ತಿದ್ದರು.

ನನ್ನ ಚಿಕ್ಕಮ್ಮ ನನ್ನ ಮೇಲೆ ಅತ್ಯಂತ ಪ್ರೀತಿ ವಿಶ್ವಾಸ ತೋರಿ ನನ್ನ ಏಳಿಗೆಗೆ ಸಹಕರಿಸಿದ್ದಾರೆ.

ಮೂರನೇ ಮಹಿಳೆ ನನ್ನ ಪ್ರೀತಿಯ ಪತ್ನಿ ಅಂಜಲಿ ಎಂದು ಸಚಿನ್ ನಕ್ಕರು.

1990ರಲ್ಲಿ ನಾನು ಭೇಟಿ ಆದಾಗಲೇ ನನ್ನ ಬಗ್ಗೆ ಆಕೆಗೆ ಎಲ್ಲವೂ ತಿಳಿದಿತ್ತು. ವೈದ್ಯಳಾಗಿ ಕೂಡಾ ನನ್ನ ವೃತ್ತಿ ಜೀವನಕ್ಕೂ ಸಹಕಾರಿಯಾದಳು ಎಂದು ಸಚಿನ್ ಹೇಳಿದರು.

ಒಟ್ಟಾರೆ ನಾನು ಈ ಸಂದರ್ಭದಲ್ಲಿ ಯಾವುದಕ್ಕೂ ಭಯಪಡಲಾರೆ, ಆದರೆ, ಹೆಂಡತಿ ಕೋಪಗೊಂಡಾಗ ಮಾತ್ರ ಎಲ್ಲಕ್ಕಿಂತ್ ಹೆಚ್ಚು ಭಯವಾಗುತ್ತದೆ ಎಂದು ಸಚಿನ್ ಹೇಳಿದರು.

Story first published:  Saturday, November 24, 2012, 18:04 [IST]
English summary
He has squared off against the most fearsome of pace attacks all over the world but veteran Indian batsman Sachin Tendulkar jokes that it is nothing when compared to facing his wife when she is upset!
ಅಭಿಪ್ರಾಯ ಬರೆಯಿರಿ