Englishहिन्दीമലയാളംதமிழ்తెలుగు

ಆಸ್ಟ್ರೇಲಿಯನ್ನರ ಮೆಚ್ಚುಗೆ ಗಳಿಸಿದ ಸಚಿನ್

Posted by:
Updated: Wednesday, November 7, 2012, 12:27 [IST]
 

ಸಿಡ್ನಿ, ನ.6: ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಅವರಿಗೆ ಆಸ್ಟ್ರೇಲಿಯಾದ ಅತ್ಯುನ್ನತ ಗೌರವ ಸಿಕ್ಕಿದೆ. ಮಂಗಳವಾರ(ನ.6) ಆರ್ಡರ್ ಆಫ್ ಆಸ್ಟ್ರೇಲಿಯಾ ಸದಸ್ಯತ್ವ ಪಡೆದ ಸಚಿನ್ ಮಾಡಿದ ಭಾಷಣ ಆಸ್ಟ್ರೇಲಿಯನ್ನರ ಮೆಚ್ಚುಗೆ ಗಳಿಸಿದೆ.

ಮುಂಬೈನಲ್ಲಿ ನಡೆದ ಸರಳ ಸಮಾರಂಭದಲ್ಲಿ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಅವರಿಗೆ ಆಸ್ಟ್ರೇಲಿಯಾದ ಸಚಿವ ಸೈಮನ್ ಕ್ರೀನ್ ಅವರು ಈ ಗೌರವ ನೀಡಿದರು.

ಆಸ್ಟ್ರೇಲಿಯನ್ನರ ಮೆಚ್ಚುಗೆ ಗಳಿಸಿದ ಸಚಿನ್

ಆಸ್ಟ್ರೇಲಿಯಾದ ಪ್ರಧಾನಿ ಜೂಲಿಯಾ ಗಿಲ್ಲಾರ್ಡ್ ಅವರು ಅ.16 ರಂದು ಆರ್ಡರ್ ಆಫ್ ಆಸ್ಟ್ರೇಲಿಯಾ ಸದಸ್ಯತ್ವವನ್ನು ಸಚಿನ್ ತೆಂಡೂಲ್ಕರ್ ಅವರಿಗೆ ನೀಡಿ ಗೌರವಿಸಲಾಗುವುದು ಎಂದು ಘೋಷಿಸಿದ್ದನ್ನು ಇಲ್ಲಿ ಸ್ಮರಿಸಬಹುದು.

'39 ವರ್ಷದ ಕ್ರಿಕೆಟರ್ ತೆಂಡೂಲ್ಕರ್ ಈ ಗೌರವ ಪಡೆದ ಪ್ರಪ್ರಥಮ ಭಾರತೀಯ ಕ್ರಿಕೆಟರ್ ಎನಿಸಿದ್ದಾರೆ. ಆಸ್ಟ್ರೇಲಿಯನ್ನರ ಕುಹಕ ನುಡಿ(sledging) ಗಳಿಗೆ ನಾನು ತಲೆ ಕೆಡಿಸಿಕೊಳ್ಳಲಿಲ್ಲ. ಹಲವಾರು ವೇಗಿಗಳು ಬ್ಯಾಟ್ಸ್ ಮನ್ ಗಳನ್ನು ಕೆಣಕುವುದು ಸಾಮಾನ್ಯ ಸಂಗತಿ. ಆಟದಲ್ಲಿ ಇದೆಲ್ಲ ಮಾಮೂಲಿ. sledging ಅನ್ನು ಒಳ್ಳೆ ಹಾಸ್ಯದಂತೆ ಪರಿಗಣಿಸುತ್ತಿದ್ದೆ' ಎಂದು ಸಚಿನ್ ಹೇಳಿದ್ದಾರೆ.

ನಾನು ಉತ್ತಮ ಕ್ರಿಕೆಟರ್ ಆಗಿ ರೂಪುಗೊಳ್ಳಲು ಆರಂಭದ ದಿನಗಳಲ್ಲಿ ಆಸ್ಟ್ರೇಲಿಯಾ ಪ್ರವಾಸ ಕಾರಣ. ಸರ್ ಡಾನ್ ಬ್ರಾಡ್ಮನ್ ಅವರ ಜೊತೆ ಕೆಲ ಕಾಲ ಕಳೆದ ಸೌಭಾಗ್ಯ ನನಗೆ ಒದಗಿ ಬಂದಿದ್ದು ನನ್ನ ಪುಣ್ಯ. ಸಿಡ್ನಿ ಕ್ರಿಕೆಟ್ ಮೈದಾನ ನನ್ನ ಮೆಚ್ಚಿನ ಕ್ರೀಡಾಂಗಣವಾಗಿದೆ.

ಆಸೀಸ್ ಆಟಗಾರರ ಆಟದ ಗುಣಮಟ್ಟ ಕಾಯ್ದುಕೊಳ್ಳುವಿಕೆ ನನಗೆ ಸ್ಪೂರ್ತಿ ನೀಡಿದೆ. ನನ್ನನ್ನು ಈ ಪ್ರತಿಷ್ಠಿತ ಗೌರವಕ್ಕೆ ಪರಿಗಣಿಸಿದ ಅಸ್ಟ್ರೇಲಿಯಾ ಪ್ರಧಾನಿಗೆ ನನ್ನ ಧನ್ಯವಾದ ಅರ್ಪಿಸುತ್ತೇನೆ ಎಂದು ಸಚಿನ್ ಹೇಳಿದರು.

ಭಾರತ ಹಾಗೂ ಆಸ್ಟ್ರೇಲಿಯಾ ಉಭಯ ದೇಶಗಳ ಕಾನೂನು ಸಂಬಂಧ ಸುಧಾರಣೆಗೆ ಸೊರಾಬ್ಜಿ ಅವರು ನೀಡಿದ ಕೊಡುಗೆ ಪರಿಗಣಿಸಿ 2006ರಲ್ಲಿ ಆರ್ಡರ್ ಆಫ್ ಆಸ್ಟ್ರೇಲಿಯಾ ಗೌರವ ನೀಡಲಾಗಿತ್ತು.

ಆಸ್ಟ್ರೇಲಿಯಾದ ಪ್ರಜೆ ಹಾಗೂ ಮಿಲಿಟರಿ ವಲಯದ ಸಾಧಕರಿಗೆ ಸಿಗುವ ಆರ್ಡರ್ ಆಫ್ ಆಸ್ಟ್ರೇಲಿಯಾ ಗೌರವ ಪ್ರಪ್ರಥಮ ಬಾರಿಗೆ ಭಾರತದ ಕ್ರಿಕೆಟರ್ ಗೆ ಸಲ್ಲುತ್ತಿದೆ.

ಹೇಡನ್ ಕಿಡಿ: ಆಸ್ಟ್ರೇಲಿಯಾದವರಿಗೆ ಮಾತ್ರ ಈ ಗೌರವ ಸಲ್ಲಬೇಕು. ಕ್ರಿಕೆಟ್ ಕ್ಷೇತ್ರದಲ್ಲಿ ಸಚಿನ್ ಮಹಾನ್ ಆಟಗಾರರೇ ಇರಬಹುದು. ಅದರೆ, ಎರಡು ದೇಶಗಳ ನಡುವೆ ಉತ್ತಮ ಬಾಂಧವ್ಯ ಮೂಡಿಸುವಲ್ಲಿ ಅವರ ಕೊಡುಗೆ ಶೂನ್ಯವಾಗಿದೆ.

ಇದು ನನ್ನೊಬ್ಬನ ಅಭಿಪ್ರಾಯವಲ್ಲ. ಹರ್ಭಜನ್ ಸಿಂಗ್ ಹಾಗೂ ಆಂಡ್ರ್ಯೂ ಸೈಮಂಡ್ 'ಮಂಕಿಗೇಟ್' ಪ್ರಕರಣದಲ್ಲಿ ಸಚಿನ್ ಯಾವ ರೀತಿ ಸಾಕ್ಷಿ ಹೇಳಿ ತಪ್ಪಿಸಿಕೊಂಡಿದ್ದರು ಎಂಬುದು ಎಲ್ಲರಿಗೂ ತಿಳಿದ ವಿಷಯ ಎಂದು ಹೇಡನ್ ಕಿಡಿಕಾರಿದ್ದರು.

ಸಚಿನ್ ಗೂ ಮೊದಲು ಕ್ರಿಕೆಟ್ ಜಗತ್ತಿನ ದಿಗ್ಗಜ ವೆಸ್ಟ್ ಇಂಡೀಸ್ ನ ಮಾಜಿ ನಾಯಕ ಕ್ಲೈವ್ ಲಾಯ್ಡ್ ಅವರಿಗೆ 1985ರಲ್ಲಿ ಈ ಗೌರವ ಸಿಕ್ಕಿದೆ. ಹಾಗೂ ಅದ್ಭುತ ಆಟಗಾರ ಬ್ರಿಯಾನ್ ಲಾರಾ ಅವರಿಗೆ 2009ರಲ್ಲಿ ಈ ಗೌರವ ನೀಡಲಾಗಿದೆ.

ಸಚಿನ್ ತೆಂಡೂಲ್ಕರ್ ಅವರು ಕ್ರಿಕೆಟ್ ಜಗತ್ತಿನಲ್ಲಿ ದೇವರಂತೆ ಕಾಣಲಾಗುತ್ತದೆ. 190 ಟೆಸ್ಟ್ ಗಳಲ್ಲಿ ಸುಮಾರು 15,533 ರನ್ ಹಾಗೂ 463 ಏಕದಿನ ಪಂದ್ಯಗಳಲ್ಲಿ 18,426 ರನ್ ಗಳಿಸಿದ್ದಾರೆ.

2008ರಲ್ಲಿ ಭಾರತದ ಎರಡನೇ ಅತ್ಯುನ್ನತ ನಾಗರೀಕ ಗೌರವವಾದ ಪದ್ಮವಿಭೂಷಣ ಪ್ರಶಸ್ತಿ ನೀಡಿ ಗೌರವಿಸಲಾಗಿದೆ. ಅತ್ಯುನ್ನತ ಕ್ರೀಡಾ ಪ್ರಶಸ್ತಿಯಾದ ರಾಜೀವ್ ಗಾಂಧಿ ಖೇಲ್ ರತ್ನ ಪ್ರಶಸ್ತಿ ಕೂಡಾ ಸಚಿನ್ ಅವರಿಗೆ ಲಭಿಸಿದೆ.

Story first published:  Wednesday, November 7, 2012, 12:17 [IST]
English summary
India batsman Sachin Tendulkar, on Tuesday, was honoured with the membership of Order of Australia (AM). He was conferred the honour by Minister for Regional Australia, Regional Development and Local Government, Simon Crean, at a function here.
ಅಭಿಪ್ರಾಯ ಬರೆಯಿರಿ