Englishहिन्दीമലയാളംதமிழ்తెలుగు

ರೈಲ್ವೇಸ್ ತಂಡದ 'ದ್ರಾವಿಡ್' ಯರೇಗೌಡ ಗುಡ್ ಬೈ

Posted by:
Updated: Tuesday, October 30, 2012, 15:30 [IST]
 

ಬೆಂಗಳೂರು, ಅ.30: ಕರ್ನಾಟಕ ತಂಡದ ಮಾಜಿ ನಾಯಕ, ರೈಲ್ವೇಸ್ ತಂಡದ 'ರಾಹುಲ್ ದ್ರಾವಿಡ್' ಯರೇಗೌಡ ಅವರು ಕ್ರಿಕೆಟ್ ಜೀವನಕ್ಕೆ ಸೋಮವಾರ ಸಂಜೆ ಗುಡ್ ಬೈ ಹೇಳಿದ್ದಾರೆ.

ಎಂ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಸರಳ ಸಮಾರಂಭದಲ್ಲಿ ಬಲಗೈ ಬ್ಯಾಟ್ಸ್ ಮನ್ ಯರೇಗೌಡ ನಿವೃತ್ತಿ ಘೋಷಿಸಿದರು. ಸುಮಾರು 18 ವರ್ಷಗಳ ಕಾಲ ಕರ್ನಾಟಕ ಹಾಗೂ ರೈಲ್ವೇಸ್ ತಂಡದ ಪರ ಕ್ರಿಕೆಟ್ ಆಡಿದ ಅನುಭವ ರಾಯಚೂರಿನ ಯರೇಗೌಡ ಅವರಿಗಿದೆ.


ಹಲವು ಬಾರಿ ರೈಲ್ವೇಸ್ ತಂಡವನ್ನು ಸಂಕಷ್ಟದಿಂದ ಪಾರು ಮಾಡಿ ದ್ರಾವಿಡ್ ರಂತೆ ಗೋಡೆಯಂತೆ ಕ್ರೀಸ್ ನಲ್ಲಿ ನಿಲ್ಲುತ್ತಿದ್ದ ಯರೇಗೌಡ, ರೈಲ್ವೇಸ್ ತಂಡಕ್ಕೆ 'ರಾಹುಲ್ ದ್ರಾವಿಡ್' ರಂತೆ ಇದ್ದರು ಎಂದರೆ ಅತಿಶಯೋಕ್ತಿಯಲ್ಲ.

ರಾಯಚೂರಿನಿಂದ ಬೆಂಗಳೂರಿಗೆ ಬಂದು ಸುಮಾರು 18 ವರ್ಷ ಕಾಲ ಕ್ರಿಕೆಟ್ ಆಡಿದ್ದು ಖುಷಿ ಕೊಟ್ಟಿದೆ. ವೃತ್ತಿಯ ಕಾರಣ ಕರ್ನಾಟಕ ಪರ ಹೆಚ್ಚಿನ ಕ್ರಿಕೆಟ್ ಆಡಲು ಸಾಧ್ಯವಾಗಲಿಲ್ಲ. ರೈಲ್ವೇಸ್ ಪರ ಆಡಬೇಕಾಯಿತು. ಅದರೂ, ಎರಡು ತಂಡಕ್ಕೂ ಆಡಿದ ಹೆಮ್ಮೆ ಇದೆ ಎಂದು 41 ವರ್ಷದ ಬ್ಯಾಟ್ಸ್ ಮನ್ ಯರೇಗೌಡ ಹೇಳಿದರು.

ಯರೇಗೌಡ ವೃತ್ತಿ ಜೀವನ ಅಂಕಿ ಅಂಶ:
ಪ್ರಥಮ ದರ್ಜೆ : 119 ಪಂದ್ಯ, 6774 ರನ್, ಔಟಾಗದೆ 211, 45.46 ಸರಾಸರಿ, 16 ಶತಕ, 39 ಅರ್ಧಶತಕ
ರಾಜ್ಯ : 17 ಪಂದ್ಯ, 986 ರನ್, 171 ಔಟಾಗದೆ, 51.86 ಸರಾಸರಿ, 3 ಶತಕ, 3 ಅರ್ಧಶತಕ
ರೈಲ್ವೆ: 102 ಪಂದ್ಯ, 5788 ರನ್, 221 ಔಟಾಗದೆ, 44.52 ಸರಾಸರಿ, 11 ಶತಕ, 34 ಅರ್ಧಶತಕ

18 ವರ್ಷ ಕ್ರಿಕೆಟ್ ರಂಗದಲ್ಲಿರಲು ನನ್ನ ತಂದೆ ಕೆ ತಿಪ್ಪಣ್ಣ ಗೌಡ ಅವರೇ ಪ್ರೇರಣೆ. ನಾನು ನಿವೃತ್ತಿ ನಂತರ ಅಂಪೈರಿಂಗ್ ಅಥವಾ ಕೋಚಿಂಗ್ ಕಡೆ ಗಮನಹರಿಸುವೆ ಎಂದು ಗೌಡರು ಹೇಳಿದ್ದಾರೆ.

ಕರ್ನಾಟಕಕ್ಕೆ ಆಡಬೇಕು ಎಂಬ ಹಂಬಲ ಮನದಾಳದಲ್ಲಿದ್ದರೂ, ಹೆಸರು ಮತ್ತು ಯಶಸ್ಸು ತಂದುಕೊಟ್ಟ ರೈಲ್ವೇಸ್ ನ್ನು ಒಮ್ಮೇಲೆ ಬಿಟ್ಟುಬಿಡಲು ಗೌಡರು ತಯಾರಿರಲಿಲ್ಲ. ಆದರೆ, ಗೆಳೆಯ ಜಾವಗಲ್ ಶ್ರೀನಾಥ್ ಒತ್ತಾಯಕ್ಕೆ ಮಣಿದು ಮತ್ತೆ ಕರ್ನಾಟಕದ ನಾಯಕತ್ವದ ವಹಿಸಿದ್ದು ಈಗ ಇತಿಹಾಸ.

ಕರ್ನಾಟಕ ತಂಡದ ರಾಹುಲ್ ದ್ರಾವಿಡ್, ಸುನಿಲ್ ಜೋಶಿ, ತಿಲಕ್ ನಾಯ್ಡು ನಂತರ ಯರೇಗೌಡ ಅವರು ನಿವೃತ್ತಿ ಹೊಂದಿದ್ದಾರೆ. ಇನ್ನೇನು ರಣಜಿ ಋತು ಆರಂಭವಾಗುತ್ತಿದೆ. ಈ ವರ್ಷ ಯರೇಗೌಡರ ನಿವೃತ್ತಿಯೇ ಕೊನೆಯಾಗಲಿ.

ರಾಯಚೂರಿನಿಂದ ಬಂದು ಕರ್ನಾಟಕದ ಕ್ರಿಕೆಟ್ ಕಲಿಯಾಗಿ ಬೆಳೆದಿದ್ದು ದೊಡ್ಡ ಸಾಧನೆ ಅವರನ್ನು ಕೋಚ್ ಆಗಿ ಕಾಣಲು ಬಯಸುತ್ತೇವೆ ಎಂದು ಕೆಎಸ್ ಸಿಎ ಪರವಾಗಿ ಅಧ್ಯಕ್ಷ ಅನಿಲ್ ಕುಂಬ್ಳೆ ಹೇಳಿದರು. 1994-95 ಸರಣಿಯಲ್ಲಿ ಗೌಡ ಅವರು ಅನಿಲ್ ಕುಂಬ್ಳೆ ನಾಯಕತ್ವದಲ್ಲಿ ಆಡಿದ್ದರು.

ಯರೇಗೌಡ ಅವರಿಗೆ 'ರಾಹುಲ್ ದ್ರಾವಿಡ್ ಆಫ್ ರೈಲ್ವೇಸ್' ಎಂಬ ಬಿರುದನ್ನು ಕೊಟ್ಟಿದ್ದು ಗೆಳೆಯ ಜಾವಗಲ್ ಶ್ರೀನಾಥ್. ಸಾಮಾನ್ಯವಾಗಿ ನಾಯಕರಾಗಿದ್ದವರು ಸ್ಲಿಪ್ ನಲ್ಲಿ ಫೀಲ್ಡ್ ಮಾಡುತ್ತಾರೆ. ಅದರೆ, ಯರೇಗೌಡ ಸಿಲ್ಲಿ ಪಾಯಿಂಟ್ ಹಾಗೂ ಫಾರ್ವರ್ಡ್ ಶಾರ್ಟ್ ಲೆಗ್ ನಲ್ಲಿ ನಿಂತು ಕೊಳ್ಳುತ್ತಿದ್ದರು. ಸುಮಾರು 61 ಅದ್ಭುತ ಕ್ಯಾಚ್ ತೆಗೆದುಕೊಂಡಿದ್ದಾರೆ ಎಂದು ಶ್ರೀನಾಥ್ ಹಿಂದಿನ ದಿನಗಳನ್ನು ನೆನಪಿಸಿಕೊಂಡರು.

Story first published:  Tuesday, October 30, 2012, 14:04 [IST]
English summary
Former captain of Karnataka and Railways batsman Yere Goud announced his retirement from first-class cricket here at the M Chinnaswamy Stadium on Monday evening.Former captain of Karnataka and Railways batsman Yere Goud announced his retirement from first-class cricket here at the M Chinnaswamy Stadium on Monday evening.
ಅಭಿಪ್ರಾಯ ಬರೆಯಿರಿ