Englishहिन्दीമലയാളംதமிழ்తెలుగు

ತಂಡಕ್ಕೆ ಮರಳಲು ದೇವರಿಗೆ ಶ್ರೀಶಾಂತ್ ನೃತ್ಯ ಸೇವೆ

Posted by:
Updated: Friday, October 26, 2012, 15:36 [IST]
 

ತಂಡಕ್ಕೆ ಮರಳಲು ದೇವರಿಗೆ ಶ್ರೀಶಾಂತ್ ನೃತ್ಯ ಸೇವೆ
 

ಗುರುವಾಯೂರು, ಅ.26: ಟೀಂ ಇಂಡಿಯಾದ ವೇಗಿ, ಸ್ಟೈಲಿಷ್ ಆಟಗಾರ ಎಸ್ ಶ್ರೀಶಾಂತ್ ಈಗ ಏನು ಮಾಡುತ್ತಿದ್ದಾರೆ? ಕ್ರಿಕೆಟ್ ಬಿಟ್ಟರೆ, ಡ್ಯಾನ್ಸ್, ಸಿನಿಮಾ, ಪಾರ್ಟಿ ಎಂದು ವಿಹರಿಸುತ್ತಿದ್ದ ಶ್ರೀಶಾಂತ್ ಈಗ ಶಾಂತನಾಗಿ ಭಗವಂತನ ಮೊರೆ ಹೊಕ್ಕಿದ್ದಾರೆ.

ಭಾರತ ತಂಡಕ್ಕೆ ಮರಳುವ ಉತ್ಸಾಹದಲ್ಲಿರುವ ಶ್ರೀಶಾಂತ್ ಇತ್ತೀಚೆಗೆ ಇಲ್ಲಿನ ಶ್ರೀಕೃಷ್ಣ ದೇಗುಲಕ್ಕೆ ಭೇಟಿ ನೀಡಿ ಭಕ್ತಿ ಪ್ರಧಾನ 'ಕೃಷ್ಣಾಟ್ಟಂ' ನೃತ್ಯ ರೂಪಕದಲ್ಲಿ ಪಾಲ್ಗೊಂಡು ಸೇವೆ ಸಲ್ಲಿಸಿದ್ದಾರೆ.

ಆದರೆ, ಶ್ರೀಶಾಂತ್ ಗೆ ಇನ್ನೂ ದೇವರ ಕೃಪೆ ಒಲಿದಂತೆ ಕಾಣುತ್ತಿಲ್ಲ. ಬಿಸಿಸಿಐ ವಾರ್ಷಿಕ ಆಟಗಾರರ ಗುತ್ತಿಗೆ ಪಟ್ಟಿಯಿಂದ ಶ್ರೀಶಾಂತ್ ಹೊರಗಿಡಲಾಗಿದೆ.

ಏನಿದು ನೃತ್ಯ ಸೇವೆ: 29 ವರ್ಷದ ಉಗ್ರ ವೇಗಿ ತನ್ನ ಹೆತ್ತವರ ಜೊತೆಗೆ ಕೃಷ್ಣನ ಮೊರೆ ಹೊಕ್ಕಿದ್ದಾರೆ. ಮಹಾವಿಷ್ಣುವಿನ 'ವಿಶ್ವರೂಪಂ ದರ್ಶನ' ದಿರಿಸು ಧರಿಸಿದ ಶ್ರೀಶಾಂತ್ ಇದಕ್ಕೂ ಮುನ್ನ 'ದೀಪ ದಾನ' ಮಾಡಿದರು ದೇವಸ್ಥಾನದ ಮೂಲಗಳು ಹೇಳಿದೆ.

'ಕೃಷ್ಣವೇಷಧಾರಿಯಾಗಿ ಮಕ್ಕಳನ್ನು ನಿನ್ನ ಮುಂದೆ ತಂದು ನಿಲ್ಲಿಸುತ್ತೇವೆ' ಎಂದು ಕೇರಳದಲ್ಲಿ ಪೋಷಕರು ತಮ್ಮ ಮಕ್ಕಳ ಆರೋಗ್ಯ, ಯಶಸ್ಸಿಗಾಗಿ ಹರಕೆ ಹೊತ್ತುಕೊಳ್ಳುವುದು ಸಾಮಾನ್ಯ ಸಂಗತಿಯಾಗಿದೆ.

ಕೇರಳದ ಪ್ರಸಿದ್ಧ ಕಥಕ್ಕಳಿ ನೃತ್ಯ ಶೈಲಿ ಹೋಲುವ ಕೃಷ್ಣಾಟ್ಟಂ ನೃತ್ಯವನ್ನು ಗುರುವಾಯೂರಪ್ಪ ದೇವರ ಮುಂದೆ ಪ್ರತಿ ದಿನ ಸಂಜೆ ನೃತ್ಯ ಸೇವೆಯ ಅಂಗವಾಗಿ ಪ್ರದರ್ಶಿಸಲಾಗುತ್ತದೆ. ದೇವರಿಗೆ ಸಲ್ಲುವ ಷೋಡಷೋಪಚಾರ(16 ಉಪಚಾರಗಳು)ಗಳಲ್ಲಿ ಹಾಡುಗಾರಿಕೆ, ನೃತ್ಯ ಕೂಡಾ ಸೇರಿದೆ.

ಶ್ರೀಶಾಂತ್ ಅವರು ಹಸಿರು ಬಣ್ಣ ಬಳಿದುಕೊಂಡು ಕಿರೀಟ ಧರಿಸಿ ಕಥಕ್ಕಳಿ, ಕೂಡಿಯಾಟ್ಟಂ, ಕೃಷ್ಣಾಟ್ಟಂ ಪ್ರಕಾರ ನೃತ್ಯ ಶೈಲಿಯನ್ನು ಪ್ರದರ್ಶಿಸಿ ದೇವರಿಗೆ ಹರಿಕೆ ತೀರಿಸಿದ್ದಾರೆ.

ಕಳೆದ ಮೇ ತಿಂಗಳಿನಲ್ಲಿ ಕಾಲಿನ ಬೆರಳಿಗೆ ಗಾಯ ಮಾಡಿಕೊಂಡ ಶ್ರೀಶಾಂತ್, 2011 ಅಗಸ್ಟ್ ನಲ್ಲಿ ಇಂಗ್ಲೆಂಡ್ ವಿರುದ್ಧ ಟೆಸ್ಟ್ ಅಡಿದ ನಂತರ ಟೀಂ ಇಂಡಿಯಾಗೆ ಮರಳಿಲ್ಲ. ದೇವರ ಕೃಪೆಯಿಂದ ಶ್ರೀಶಾಂತ್ ಮತ್ತೆ ತಂಡಕ್ಕೆ ಮರಳುವ ಆಶಯ ಅವರ ಅಭಿಮಾನಿಗಳಲ್ಲೂ ಇದೆ.

Story first published:  Friday, October 26, 2012, 15:23 [IST]
English summary
Indian cricketer S Sreesanth, who is out of the team for a quite some while, paid obeisance at the famed Sree Krishna temple decked up in a colourful costume for the devotional "Krishattam" dance-drama.
ಅಭಿಪ್ರಾಯ ಬರೆಯಿರಿ