Englishहिन्दीമലയാളംதமிழ்తెలుగు

ವಿಶ್ವ ಟಿ20 ನೂತನ ಚಾಂಪಿಯನ್ -ವೆಸ್ಟ್ ಇಂಡೀಸ್

Posted by:
Updated: Sunday, October 7, 2012, 22:51 [IST]
 

ಕೊಲಂಬೋ, ಅ.7: ವಿಶ್ವ ಟಿ20 ಟೂರ್ನಿಯ ಅಂತಿಮ ಹಣಾಹಣಿಯಲ್ಲಿ ಅತಿಥೇಯ ಶ್ರೀಲಂಕಾವನ್ನು ಸೋಲಿಸಿ ವೆಸ್ಟ್ ಇಂಡೀಸ್ ತಂಡ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ವಿಂಡೀಸ್ ಆರಂಭದಿಂದಲೇ ಲಂಕಾ ಸಿಂಹಗಳ ಮೇಲೆ ಹತ್ತಿ ನಿಂತು ಗ್ಯಾಂಗ್ ನಮ್ ಡ್ಯಾನ್ಸ್ ಮಾಡಿಬಿಟ್ಟಿತು. ಶ್ರೀಲಂಕಾ ತಂಡ 101 ರನ್ ಗಳಿಗೆ ಕುಸಿದು ವೆಸ್ಟ್ ಇಂಡೀಸ್ ಗೆ 36 ರನ್ ಗಳ ಜಯದ ಕೊಡುಗೆ ನೀಡಿತು. ಉತ್ತಮ ಬ್ಯಾಟಿಂಗ್ ಪ್ರದರ್ಶನ ನೀಡಿದ ಮರ್ಲಾನ್ ಸ್ಯಾಮುಯಲ್ಸ್ ಪಂದ್ಯಶ್ರೇಷ್ಠ ಎನಿಸಿದರು. ಶೇನ್ ವ್ಯಾಟ್ಸನ್ ಸರಣಿ ಶ್ರೇಷ್ಠ ಪ್ರಶಸ್ತಿ ಗಳಿಸಿದರು.

ಸ್ಕೋರ್ ಕಾರ್ಡ್ ನೋಡಿ



69 ರನ್ ಗಳಿಗೆ 7 ವಿಕೆಟ್ ಕಳೆದು ಕೊಂಡಿದ್ದ ಶ್ರೀಲಂಕಾ ತಂಡ ಬೇಗ ಕುಸಿಯುವ ಭೀತಿಯಲ್ಲಿತ್ತು. ಆದರೆ, ಕುಲಶೇಖರ ಬಿರುಸಿನ ಆಟ ಪ್ರದರ್ಶಿಸಿ 12 ಎಸೆತದಲ್ಲಿ 26ರನ್ (3 ಬೌಂಡರಿ, 1 ಸಿಕ್ಸರ್ ) ವಿಂಡೀಸ್ ತಂಡಕ್ಕೆ ಆತಂಕ ತಂದರು.

ಆದರೆ, ಕುಲಶೇಖರ ಔಟಾಗುತ್ತಿದ್ದಂತೆ ಲಂಕಾ ಆಸೆ ಕಮರಿಬಿಟ್ಟಿತು. ವಿಂಡೀಸ್ ಜಯದ ನೃತ್ಯ ಶುರುವಾಯಿತು.

138ರನ್ ಚೇಸ್ ಆರಂಭಿಸಿದ ನಾಯಕ ಮಹೇಲ ಜಯವರ್ಧನೆ ಹಾಗೂ ತಿಲಕರತ್ನೆ ದಿಲ್ಶನ್ ಉತ್ತಮ ಆರಂಭ ನೀಡುವಲ್ಲಿ ವಿಫಲರಾದರು. ರಾಮಪಾಲ್ ಎಸೆತ ಅರಿಯಲಾರದೆ ದಿಲ್ಶನ್ ಕ್ಲೀನ್ ಬೋಲ್ಡ್ ಆದರು.

ನಂತರ ಜಯವರ್ಧನೆ ಹಾಗೂ ಕುಮಾರ ಸಂಗಕ್ಕಾರ ಇನ್ನಿಂಗ್ಸ್ ಕಟ್ಟುವ ಕೆಲಸದಲ್ಲಿ ತೊಡಗಿದರು. ಆದರೆ, 22 ರನ್ ಗಳಿಸಿದ್ದ ಸಂಗಕ್ಕಾರ ಸ್ಪಿನ್ನರ್ ಬದ್ರಿಗೆ ಬಲಿಯಾದರು. ನಂತರ ಮ್ಯಾಥ್ಯೂಸ್ ಹೀಗೆ ಬಂದು ಹಾಗೆ ಪೆವಿಲಿಯನ್ ಗೆ ಹೋದರು.

ನಾಯಕ ಜಯವರ್ಧನೆ ಕೂಡಾ ಸ್ಪಿನ್ ಸುಳಿಗೆ ಸಿಲುಕಿ ಸುನಿಲ್ ನರೇನ್ ಬೌಲಿಂಗ್ ನಲ್ಲಿ ಸ್ಯಾಮಿಗೆ ಕ್ಯಾಚಿತ್ತು ವಿಕೆಟ್ ಒಪ್ಪಿಸಿದರು. ಜಯವರ್ಧನೆ 36 ರನ್ ಗಳಿಸಿದ್ದು ಪ್ರಯೋಜನಕ್ಕೆ ಬರಲಿಲ್ಲ.

ವೆಸ್ಟ್ ಇಂಡೀಸ್ ಪರ ಸುನಿಲ್ ನರೇನ್ ಭರ್ಜರಿ ಬೌಲಿಂಗ್ ಪ್ರದರ್ಶಿಸಿ 3.4 ಓವರ್ ಗಳಲ್ಲಿ 9 ರನ್ನಿತ್ತು 3 ವಿಕೆಟ್ ಗಳಿಸಿ ಯಶಸ್ವಿ ಬೌಲರ್ ಎನಿಸಿದರು. ಸ್ಯಾಮಿ 2 ವಿಕೆಟ್, ಬದ್ರಿ, ರಾಮ್ ಪಾಲ್ ಹಾಗೂ ಸ್ಯಾಮುಯಲ್ಸ್ ತಲಾ 1 ವಿಕೆಟ್ ಕಬಳಿಸಿದರು.

ವೆಸ್ಟ್ ಇಂಡೀಸ್ ಇನ್ನಿಂಗ್ಸ್ : ಜಾನ್ಸನ್ ಚಾರ್ಲ್ಸ್ ಹಾಗೂ ಕ್ರಿಸ್ ಗೇಲ್ ಜೋಡಿ ಉತ್ತಮ ಆರಂಭ ಒದಗಿಸುವಲ್ಲಿ ವಿಫಲವಾಯಿತು. ಚಾರ್ಲ್ಸ್ ಶೂನ್ಯ ಸುತ್ತಿದರೆ, ಗೇಲ್ 14 ಎಸೆತದಲ್ಲಿ 3 ರನ್ ಗಳಿಸಿ ಅಜಂತಾ ಮೆಂಡಿಸ್ ಗೆ ಬಲಿಯಾಗಿದ್ದು ಅಭಿಮಾನಿಗಳಿಗೆ ನಿರಾಶೆ ಉಂಟು ಮಾಡಿತು.

ನಂತರ ಮರ್ಲಾನ್ ಸ್ಯಾಮುಯಲ್ಸ್ ಅರ್ಧಶತಕ 78 ರನ್ (56 ಎಸೆತ) ಹಾಗೂ ಡಿ ಬ್ರಾವೋ 19 ರನ್ ಗಳಿಸಿ ತಂಡದ ಮೊತ್ತ ಹೆಚ್ಚಿಸಿದರು. ಸ್ಫೋಟಕ ಹೊಡೆತಗಳ ಬ್ಯಾಟ್ಸ್ ಮನ್ ಪೊಲ್ಲಾರ್ಡ್ 2 ರನ್ ಗಳಿಸಿ ಪೆವಿಲಿಯನ್ ಗೆ ತೆರಳಿದರು. ರಸೆಲ್ 0 ರನ್ ಗಳಿಸಿ ಔಟಾದರು.

ಸ್ಯಾಮುಯಲ್ಸ್ ಅರ್ಧಶತಕದಲ್ಲಿ 3 ಬೌಂಡರಿ ಹಾಗೂ 6 ಭರ್ಜರಿ ಸಿಕ್ಸರ್ ಗಳನ್ನು ಸಿಡಿಸಿದ್ದರು. ನಾಯಕ ಸ್ಯಾಮಿ 26 ರನ್(15 ಎಸೆತ, 3 ಬೌಂಡರಿ) ಗಳಿಸಿ ತಂಡದ ಮೊತ್ತ ಹೆಚ್ಚಿಸಿದರು. ಅಂತಿಮವಾಗಿ  ವೆಸ್ಟ್ ಇಂಡೀಸ್ ತಂಡ 137/6 ರನ್ ಗಳಿಸಿದರು.

ಶ್ರೀಲಂಕಾ ಪರ ಅಜಂತಾ ಮೆಂಡಿಸ್ ಉತ್ತಮ ಬೌಲಿಂಗ್ ಪ್ರದರ್ಶಿಸಿ 4 ಓವರ್ ಗಳಲ್ಲಿ 12 ರನ್ನಿತ್ತು 4 ವಿಕೆಟ್ ಪಡೆದರು. ಏಂಜೆಲೋ ಮ್ಯಾಥ್ಯೂಸ್ 4-1-11-1 ನೊಂದಿಗೆ ಆರಂಭದಲ್ಲೇ ವಿಂಡೀಸ್ ಗೆ ರನ್ ಗಳಿಕೆಗೆ ಕಡಿವಾಣ ಹಾಕಿದರು.

ಲಸಿತ್ ಮಾಲಿಂಗ ಅತ್ಯಂತ ಕಳಪೆ ಬೌಲಿಂಗ್ ಮಾಡಿ 4 ಓವರ್ ಗಳಲ್ಲಿ 54 ರನ್ ನೀಡಿದರು. ರಂಗಣ ಬದಲಿಗೆ ತಂಡಕ್ಕೆ ಬಂದ ಅಖಿಲ ಧನಂಜಯ 16 ರನ್ನಿತ್ತು 1 ವಿಕೆಟ್ ಪಡೆದರು.

Story first published:  Sunday, October 7, 2012, 20:32 [IST]
English summary
It is time to welcome the Caribbean Kings, the new champions of ICC World Twenty20. What an effort it was from the West Indies as they brilliantly defended a modest total of 137 to hand Sri Lanka their fourth straight loss in World Cup finals. West Indies won the final by 36 runs as the hosts were bowled out
ಅಭಿಪ್ರಾಯ ಬರೆಯಿರಿ