Englishहिन्दीമലയാളംதமிழ்తెలుగు

ಸೂಪರ್ ಓವರ್: ಕಿವೀಸ್ ಕಿವಿ ಕಚ್ಚಿದ ವಿಂಡೀಸ್

Posted by:
Updated: Monday, October 1, 2012, 22:25 [IST]
 

ಪಲ್ಲೆಕೆಲೆ, ಅ.1; ಐಸಿಸಿ ವಿಶ್ವ ಟಿ20ಯಲ್ಲಿ ಮತ್ತೊಮ್ಮೆ ಸೂಪರ್ ಓವರ್ ಕಾಣುವ ಯೋಗ ಸೋಮವಾರ ಪ್ರೇಕ್ಷಕರಿಗೆ ಲಭಿಸಿತು. ವಿಂಡೀಸ್ ತಂಡ ಒಡ್ಡಿಡ್ಡ 139 ರನ್ ಚೇಸ್ ಮಾಡಿದ ಕಿವೀಸ್ ತಂಡ 7 ವಿಕೆಟ್ ಕಳೆದುಕೊಂಡು 1 ರನ್ ಇಂದ ಗೆಲುವು ತಪ್ಪಿಸಿಕೊಂಡು ಸೂಪರ್ ಓವರ್ ಸುಳಿಗೆ ಸಿಲುಕಿತು. ಸೂಪರ್ ಓವರ್ ನಲ್ಲಿ ವಿಂಡೀಸ್ 18ರನ್ ಚೆಚ್ಚಿ ಸೂಪರ್ ಗೆಲುವು ಸಾಧಿಸಿತು.

ಸೂಪರ್ ಓವರ್: ಕಿವೀಸ್ ಕಿವಿ ಕಚ್ಚಿದ ವಿಂಡೀಸ್

ಸೂಪರ್ ಓವರ್ ನಲ್ಲಿ ವಿಂಡೀಸ್ ಪರ ಕ್ರಿಸ್ ಗೇಲ್ ಹಾಗೂ ಸ್ಯಾಮುಯಲ್ಸ್ ಕಣಕ್ಕಿಳಿದರು. ನ್ಯೂಜಿಲೆಂಡ್ ಪರ ಬೌಲ್ ಮಾಡಿದ ಸೌಥಿ ಮೊದಲ ಎಸೆತದಲ್ಲಿ ನೋಬಾಲ್ ಮಾಡಿ ಸಿಕ್ಸ್ ಹೊಡೆಸಿಕೊಂಡರು. ಮೊದಲ 3 ಎಸೆತಗಳಲ್ಲಿ 11 ರನ್ ಗಳಿಸಿದ ವಿಂಡೀಸ್ ಐದನೇ ಎಸೆತದಲ್ಲಿ ಸಿಕ್ಸರ್ ಹೊಡೆದು ಭರ್ಜರಿ ಜಯ ದಾಖಲಿಸಿದರು.

ಮೊದಲು ಬ್ಯಾಟ್ ಮಾಡಿದ ನ್ಯೂಜಿಲೆಂಡ್ ತಂಡ ನಾಯಕ ರಾಸ್ ಟೇಲರ್ ಹೊಡೆದ ಸಿಕ್ಸರ್ ಹಾಗೂ ಬೌಂಡರಿ ನೆರವಿನಿಂದ 6 ಎಸೆತದಲ್ಲಿ 17 ರನ್ ಗಳಿಸಿದರು. ಸ್ಯಾಮುಯಲ್ ಬೌಲಿಂಗ್ ನಲ್ಲಿ ರನ್ ನಿಯಂತ್ರಿಸಲು ಸಾಧ್ಯವಾಗಲಿಲ್ಲ. ವಿಂಡೀಸ್ ಗೆಲ್ಲಲು 6 ಎಸೆತದಲ್ಲಿ 18 ರನ್ ಬೇಕಿತ್ತು.

ಸ್ಕೋರ್ ಕಾರ್ಡ್
ಇದಕ್ಕೂ ಮುನ್ನ ಮೊದಲು ಬ್ಯಾಟಿಂಗ್ ಮಾಡಿದ ವೆಸ್ಟ್ ಇಂಡೀಸ್ ತಂಡ ಕ್ರಿಸ್ ಗೇಲ್ ಅವರಿಂದ ಉತ್ತಮ ಆರಂಭ ಪಡೆಯಿತು. 14 ಎಸೆತದಲ್ಲಿ 30 ರನ್ (3 ಬೌಂಡರಿ, 2 ಸಿಕ್ಸರ್) ಗಳಿಸಿದ ಗೇಲ್ ಗೆ ಸ್ಯಾಮುಯಲ್ಸ್ 24 ರನ್(2 ಬೌಂಡರಿ, 1 ಸಿಕ್ಸರ್) ಉತ್ತಮ ಸಾಥ್ ನೀಡಿದರು.

ಈ ಮಧ್ಯೆ ಚಾರ್ಲ್ಸ್, ರಸೆಲ್ ವಿಫಲರಾದರೂ ಪೊಲ್ಲಾರ್ಡ್ 28 ರನ್ (22 ಎಸೆತ, 3 ಬೌಂಡರಿ) ತಂಡದ ಮೊತ್ತ ಹೆಚ್ಚಿಸಲು ಯತ್ನಿಸಿದರು. ಬ್ರಾವೋ 16 ರನ್, ಸ್ಯಾಮಿ 11 ರನ್ ಗಳಿಸಿದರೂ ತಂಡದ ಮೊತ್ತ ಹಿಗ್ಗಿಸಲು ಆಗಲಿಲ್ಲ. ವಿಂಡೀಸ್ 19.3 ಓವರ್ ಗಳಲ್ಲಿ 139 ರನ್ ಗಳಿಗೆ ಆಲೌಟ್ ಆಯಿತು.

ವಿಂಡೀಸ್ ಇನ್ನಿಂಗ್ಸ್ ನಲ್ಲಿ 11 ಬೌಂಡರಿ, 5 ಸಿಕ್ಸರ್ ಗಳು ಬಂದಿತ್ತು. ನ್ಯೂಜಿಲೆಂಡ್ ಪರ ಡೌಗ್ ಬ್ರೇಸ್ ವೆಲ್, ಟಿಮ್ ಸೌಥಿ ತಲಾ 3 ವಿಕೆಟ್ ಪಡೆದು ಯಶಸ್ವಿ ಬೌಲರ್ ಎನಿಸಿದರು. ಮೆಕಲಮ್ 2 ವಿಕೆಟ್ ಹಾಗೂ ಜೇಕಬ್ ಓರಮ್, ಹಿರಾ ತಲಾ 1 ವಿಕೆಟ್ ಪಡೆದರು.

ನ್ಯೂಜಿಲೆಂಡ್ ಇನ್ನಿಂಗ್ಸ್ : ವಿಂಡೀಸ್ ನಂತೆ ಕಿವೀಸ್ ಕೂಡಾ ಆರಂಭದಲ್ಲೆ ವಿಕೆಟ್ ಕಳೆದುಕೊಂಡಿತು. ನಂತರ ಗಪ್ಟಿಲ್ 21 ರನ್, ಬ್ರೆಂಡನ್ ಮೆಕಲಮ್ 22 ರನ್ ಗಳಿಸಿ ತಂಡದ ಮೊತ್ತ ಹೆಚ್ಚಿಸಿದರು. ಜೇಮ್ಸ್ ಫ್ರಾಂಕ್ಲಿನ್ 14 ರನ್ ಗಳಿಸಿ ಔಟಾದರು. ಓರಮ್, ನಾಥನ್ ಮೆಕಲಮ್ ಕೂಡಾ ಬೇಗ ವಿಕೆಟ್ ಒಪ್ಪಿಸಿದರು.

ನಾಯಕ ರಾಸ್ ಟೇಲರ್ ಏಕಾಂಗಿ ಹೋರಾಟ ನಡೆಸಿ 40 ಎಸೆತದಲ್ಲಿ 62 ರನ್(3 ಬೌಂಡರಿ, 3 ಸಿಕ್ಸರ್) ಗಳಿಸಿ ಔಟಾಗದೆ ಉಳಿದರು.

20 ಓವರ್ ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 139 ರನ್ ಗಳಿಸಿದ ನ್ಯೂಜಿಲೆಂಡ್ ಮತ್ತೊಮ್ಮೆ ಸೂಪರ್ ಓವರ್ ಆಡುವ ಅವಕಾಶ ಪಡೆಯಿತು.

ವಿಂಡೀಸ್ ಪರ ಸುನಿಲ್ ನರೇನ್ 20 ರನ್ನಿತ್ತು 3 ವಿಕೆಟ್ ಕಬಳಿಸಿ ಪಂದ್ಯಶ್ರೇಷ್ಠ ಪ್ರಶಸ್ತಿಗಳಿಸಿದರು. ಉಳಿದಂತೆ ರವಿ ರಾಮ್ ಪಾಲ್, ಸ್ಯಾಮಿ, ಬದ್ರಿ ತಲಾ 1 ವಿಕೆಟ್ ಗಳಿಸಿದರು.

Story first published:  Monday, October 1, 2012, 18:52 [IST]
English summary
West Indies and New Zealand, both scored 139 as the match was tied, as Windies won the one-over eliminator against Kiwis to stay alive in the tournament after the Super Eights clash at Pallekele International Cricket Stadium on Monday.
ಅಭಿಪ್ರಾಯ ಬರೆಯಿರಿ