Englishहिन्दीമലയാളംதமிழ்తెలుగు

ಟಿ20 : ಪಾಕಿಗಳ ಮೇಲೆ ಭಾರತಕ್ಕೆ ಸೂಪರ್ ಜಯ

Posted by:
Updated: Monday, October 1, 2012, 13:07 [IST]
 

ಟಿ20 : ಪಾಕಿಗಳ ಮೇಲೆ ಭಾರತಕ್ಕೆ ಸೂಪರ್ ಜಯ
 

ಕೊಲಂಬೋ, ಸೆ.30: ಪಾಕಿಸ್ತಾನ ತಂಡ ಒಡ್ಡಿದ್ದ 129 ರನ್ ಗುರಿಯನ್ನು ಬೆನ್ನು ಹತ್ತಿದ ಟೀಂ ಇಂಡಿಯಾ 8 ವಿಕೆಟ್ ಗಳಿಂದ ಭರ್ಜರಿ ಜಯ ದಾಖಲಿಸಿದೆ. ವಿರಾಟ್ ಕೊಹ್ಲಿ ಅಮೋಘ ಬ್ಯಾಟಿಂಗ್ ಪ್ರದರ್ಶಿಸಿ ಭಾರತಕ್ಕೆ ಜಯದಲ್ಲಿ ಮಹತ್ವದ ಪಾತ್ರವಹಿಸಿದರು. ಭಾರತ 17 ಓವರ್ ಗಳಲ್ಲಿ 129/2 ಗಳಿಸಿ ಜಯಭೇರಿ ಬಾರಿಸಿತು.

ಟಿ20 ವಿಶ್ವಕಪ್ ಟೂರ್ನಿಗಳಲ್ಲಿ ಪಾಕಿಸ್ತಾನದ ವಿರುದ್ಧ ಭಾರತ ಅಜೇಯವಾಗಿ ಉಳಿದಿದ್ದು 3 ಬಾರಿ ಪಾಕಿಸ್ತಾನವನ್ನು ಸೋಲಿಸಿದ ದಾಖಲೆ ಬರೆದಿದೆ.

ಗಂಭೀರ್ ಶೂನ್ಯ ಸುತ್ತಿದ್ದರೆ, ವೀರೆಂದರ್ ಸೆಹ್ವಾಗ್ 29ರನ್ (24 ಎಸೆತ, 4 ಬೌಂಡರಿ) ಗಳಿಸಿ ಪೆವಿಲಿಯನ್ ಗೆ ಮರಳಿದ್ದಾರೆ. 5 ಓವರ್ ಗಳಲ್ಲಿ 1 ವಿಕೆಟ್ ಕಳೆದುಕೊಂಡು 30 ರನ್ ಗಳಿಸಿತು.

ಎರಡನೇ ವಿಕೆಟ್ ಗೆ ಸೆಹ್ವಾಗ್ ಹಾಗೂ ಕೊಹ್ಲಿ 74 ರನ್ ಜೊತೆಯಾಟ ಕಲೆ ಹಾಕಿ ಭಾರತಕ್ಕೆ ಭದ್ರ ಬುನಾದಿ ಒದಗಿಸಿದರು. [ಸ್ಕೋರ್ ಕಾರ್ಡ್ ನೋಡಿ]

ವಿರಾಟ್ ಕೊಹ್ಲಿ ಅಮೋಘ ಅರ್ಧಶತಕ ದಾಖಲಿಸಿ ಅಜೇಯವಾಗಿ ಉಳಿದರು. ಕೊಹ್ಲಿ 78 ರನ್ (61 ಎಸೆತ, 8 ಬೌಂಡರಿ, 2 ಸಿಕ್ಸರ್) ಸಿಡಿಸಿದರು. ಯುವರಾಜ್ ಸಿಂಗ್ ಉತ್ತಮ ಸಾಥ್ ನೀಡಿ 16 ಎಸೆತದಲ್ಲಿ 19 ರನ್(2 ಬೌಂಡರಿ) ಗಳಿಸಿ ಔಟಾಗದೆ ಉಳಿದು ಜಯದ ರನ್ ಬಾರಿಸಿದರು. ವಿರಾಟ್ ಕೊಹ್ಲಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಗಳಿಸಿದರು.

ಪಾಕ್ ಪರ ಸ್ಪಿನ್ನರ್ ರಾಜಾ ಹಸನ್ ಹಾಗೂ ಅಫ್ರಿದಿ ತಲಾ 1 ವಿಕೆಟ್ ಪಡೆದರು. ಗುಲ್ 3 ಓವರ್ ಗಳಲ್ಲಿ 30 ರನ್ ನೀಡಿ ದುಬಾರಿಯಾದರೆ, ನಾಯಕ ಹಫೀಜ್ ಕೇವಲ 1 ಓವರ್ ಎಸೆದಿದ್ದು ವಿಶೇಷವಾಗಿತ್ತು.

ಈ ಗೆಲುವಿನೊಂದಿಗೆ (-0.45) ರನ್ ಸರಾಸರಿ ಹೊಂದಿರುವ ಭಾರತ ಅಂಕಿಪಟ್ಟಿಯಲ್ಲಿ ಮೂರನೇ ಸ್ಥಾನಕ್ಕೇರಿದೆ. ಆಸ್ಟ್ರೇಲಿಯಾ 4 ಅಂಕ, ಪಾಕಿಸ್ತಾನ 2 ಅಂಕದೊಂದಿಗೆ ಮೊದಲೆರಡು ಸ್ಥಾನ ಗಳಲ್ಲಿದೆ. ದಕ್ಷಿಣ ಆಫ್ರಿಕಾ ನಾಲ್ಕನೇ ಸ್ಥಾನಕ್ಕೆ ಕುಸಿದಿದೆ.

ಪಾಕಿಸ್ತಾನ ಇನ್ನಿಂಗ್ಸ್ : ಸೂಪರ್ 8 ಹಂತದ ಮಹತ್ವದ ಪಂದ್ಯದಲ್ಲಿ ಭಾರತ ವಿರುದ್ಧ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಪಾಕಿಸ್ತಾನ ಆರಂಭಿಕ ಆಘಾತ ಅನುಭವಿಸಿತು. ಭಾರತದ ಪಾರ್ಟ್ ಟೈಂ ಬೌಲರ್ ಗಳ ಭರ್ಜರಿ ಬೌಲಿಂಗ್ ಗೆ ಪಾಕಿಸ್ತಾನದ ಬ್ಯಾಟ್ಸ್ ಮನ್ ಗಳು ತತ್ತರಿಸಿದರು.

ಪಾಕಿಸ್ತಾನ ಮೊದಲ 10 ಓವರ್ ನಲ್ಲಿ 60 ರನ್ ಗಳಿಸಿ 5 ವಿಕೆಟ್ ಕಳೆದುಕೊಂಡು ದುಃಸ್ಥಿತಿ ತಲುಪಿತು.

ಮೊದಲ ಎರಡು ಓವರ್ ಗಳಲ್ಲಿ 26 ರನ್ ಚೆಚ್ಚಿದ ಪಾಕಿಗಳು ನಂತರ ಪೆವಿಲಿಯನ್ ಪೆರೇಡ್ ಮಾಡಿದರು. ಯುವರಾಜ್ ಸಿಂಗ್ ಹಾಗೂ ವಿರಾಟ್ ಕೊಹ್ಲಿ ಕರಾರುವಾಕ್ ಬೌಲಿಂಗ್ ಗೆ ಉತ್ತರ ನೀಡದೆ ಸೋತರು. ನಾಯಕ ಹಫೀಜ್ ವಿಕೆಟ್ ಕಾಯ್ದುಕೊಂಡರೂ ಕೇವಲ 15 ರನ್ ಗಳಿಸಿ ತಂಡದ ಮೊತ್ತ 59 ರನ್ ಆಗಿದ್ದಾಗ ಔಟಾದರು.

ಶಹೀದ್ ಅಫ್ರಿದಿ 12 ಎಸೆತದಲ್ಲಿ 14 ರನ್ (2 ಬೌಂಡರಿ), ಶೊಯಿಬ್ ಮಲ್ಲಿಕ್ 22 ಎಸೆತದಲ್ಲಿ 28 ರನ್ (3 ಬೌಂಡರಿ) ಹಾಗೂ ಉಮರ್ ಅಕ್ಮಲ್ 18 ಎಸೆತದಲ್ಲಿ 21 ರನ್ ಗಳಿಸಿ ಪಾಕಿಸ್ತಾನದ ಮೊತ್ತ ಹೆಚ್ಚಿಸಲು ಶ್ರಮಿಸಿದರು.

ಭಾರತದ ಪರ ಯುವರಾಜ್ ಸಿಂಗ್ 3 ಓವರ್ ಗಳಲ್ಲಿ 16 ರನ್ ನೀಡಿ 2 ವಿಕೆಟ್, ಅಶ್ವಿನ್ 16 ರನ್ನಿತ್ತು 2 ವಿಕೆಟ್ ಗಳಿಸಿದರೆ, ಎಲ್ ಬಾಲಾಜಿ 22 ರನ್ನಿತ್ತು 3 ವಿಕೆಟ್ ಉರುಳಿಸಿದರು. ಇರ್ಫಾನ್ ಹಾಗೂ ಕೊಹ್ಲಿ ತಲಾ 1 ವಿಕೆಟ್ ಪಡೆದರು.

Story first published:  Sunday, September 30, 2012, 20:27 [IST]
English summary
First the bowlers were fantastic. Then came a superb half century from Virat Kohli and India crushed Pakistan by eight wickets in their Super Eight game of ICC World Twenty20 2012 here on Sunday(Sept.30) night.
ಅಭಿಪ್ರಾಯ ಬರೆಯಿರಿ