Englishहिन्दीമലയാളംதமிழ்తెలుగు

ಸೂಪರ್ 8: ಆಸ್ಟ್ರೇಲಿಯಾಕ್ಕೆ 8 ವಿಕೆಟ್ ಗಳ ಅಮೋಘ ಜಯ

Posted by:
Updated: Wednesday, October 31, 2012, 15:05 [IST]
 

ಸೂಪರ್ 8: ಆಸ್ಟ್ರೇಲಿಯಾಕ್ಕೆ 8 ವಿಕೆಟ್ ಗಳ ಅಮೋಘ ಜಯ
 

ಕೊಲಂಬೋ, ಸೆ.30: ದಕ್ಷಿಣ ಆಫ್ರಿಕಾ ತಂಡ ಒಡ್ಡಿದ ಸ್ಪರ್ಧಾತ್ಮಕ ಮೊತ್ತವನ್ನು ಬೆನ್ನು ಹತ್ತಿದ ಆಸ್ಟ್ರೇಲಿಯಾ ತಂಡ ಮತ್ತೊಮ್ಮೆ ಶೇನ್ ವ್ಯಾಟ್ಸನ್ ಬ್ಯಾಟಿಂಗ್ ನಿಂದಾಗಿ ಸುಲಭ ಗೆಲುವು ಪಡೆದಿದೆ. ವ್ಯಾಟ್ಸನ್ ಹಾಗೂ ಹಸ್ಸಿ ಜವಾಬ್ದಾರಿಯುತ ಬ್ಯಾಟಿಂಗ್ ನಿಂದ ಆಸೀಸ್ 8 ವಿಕೆಟ್ ಗಳ ಭರ್ಜರಿ ಜಯ ದಾಖಲಿಸಿದೆ. 17.4 ಓವರ್ ಗಳಲ್ಲಿ 147/2 ಸ್ಕೋರ್ ಮಾಡಿ ಆಸೀಸ್ ತಂಡ ಜಯದ ನಗೆ ಬೀರಿದೆ.

ಡೇವಿಡ್ ವಾರ್ನರ್ 5 ರನ್ ಗಳಿಸಿ ಔಟಾದ ಮೇಲೆ ಶೇನ್ ವ್ಯಾಟ್ಸನ್ ಬೌಂಡರಿಗಳ ಸುರಿಮಳೆಗೆರೆದು ಆಸೀಸ್ ಗೆ ಉತ್ತಮ ಆರಂಭ ನೀಡಿದರು. ಶೇನ್ ವ್ಯಾಟ್ಸನ್ 70 ರನ್(47 ಎಸೆತ, 8 ಬೌಂಡರಿ, 2 ಸಿಕ್ಸರ್) ಹಾಗೂ ಮೈಕಲ್ ಹಸ್ಸಿ 37 ಎಸೆತದಲ್ಲಿ 45 ರನ್ (2 ಬೌಂಡರಿ, 2 ಸಿಕ್ಸರ್) ಬಾರಿಸಿ ಆಸ್ಟ್ರೇಲಿಯಾವನ್ನು ಗೆಲುವಿನ ಹಾದಿಗೆ ತಂದರು. ಕೊನೆ ಹಂತದಲ್ಲಿ ಕೆಮರೂನ್ ವೈಟ್ 13 ಎಸೆತದಲ್ಲಿ 21 ರನ್ ( 3 ಬೌಂಡರಿ, 1 ಸಿಕ್ಸ್ ) ಸಿಡಿಸಿದರು.

ಸತತ ನಾಲ್ಕನೇ ಪಂದ್ಯಶ್ರೇಷ್ಠ ಪ್ರಶಸ್ತಿ ಗಳಿಸಿದ ಶೇನ್ ವ್ಯಾಟ್ಸನ್ ಮಾತನಾಡಿ, ಸ್ಟೈನ್ ಹಾಗೂ ಮಾರ್ಕೆಲ್ ರಂಥ ಉತ್ತಮ ಬೌಲಿಂಗ್ ಪಡೆಯ ವಿರುದ್ಧ ಸ್ಕೋರ್ ಮಾಡಿದ್ದು ಖುಷಿ ಕೊಟ್ಟಿದೆ. ಆಸೀಸ್ ತಂಡವನ್ನು ಸೆಮಿಸ್ ಹಂತಕ್ಕೆ ಸೇರಿಸುವುದು ನನ್ನ ಗುರಿಯಾಗಿತ್ತು ಎಂದಿದ್ದಾರೆ.

3 ಓವರ್ ಗಳಲ್ಲಿ 15 ರನ್ ನೀಡಿ ದಕ್ಷಿಣ ಆಫ್ರಿಕಾ ಪರ ಸ್ಟ್ರೈನ್ ಮಿತವ್ಯಯಿ ಬೌಲರ್ ಎನಿಸಿದರು.ಪೀಟರ್ಸನ್, ಮಾರ್ಕೆಲ್ ತಲಾ 1 ವಿಕೆಟ್ ಪಡೆದರು. ಉಳಿದಂತೆ ಯಾವ ಬೌಲರ್ ಕೂಡಾ ವ್ಯಾಟ್ಸನ್ ಹಾಗೂ ಹಸ್ಸಿ ಜೋಡಿಯನ್ನು ಕಾಡಲಿಲ್ಲ.

ಇದಕ್ಕೂ ಮುನ್ನ ಆಸ್ಟ್ರೇಲಿಯಾ ತಂಡ ತನ್ನ ಉತ್ತಮ ಫಾರ್ಮ್ ಮುಂದುವರೆಸಿ, ದಕ್ಷಿಣ ಅಫ್ರಿಕಾ ತಂಡವನ್ನು 146/5 ಮೊತ್ತಕ್ಕೆ ನಿಯಂತ್ರಿಸಿತು. ದಕ್ಷಿಣ ಆಫ್ರಿಕಾ ತಂಡದ ಆರಂಭಿಕ ಆಟಗಾರ ರಿಚರ್ಡ್ ಲೆವಿ ಮತ್ತೊಮ್ಮೆ ವಿಫಲರಾಗಿ ಶೂನ್ಯ ಸುತ್ತಿದರು. ಹಶೀಂ ಆಮ್ಲಾ ಕೂಡಾ 1 ಬೌಂಡರಿ, 1 ಸಿಕ್ಸ್ ಎತ್ತಿ 17 ರನ್ ಗಳಿಸಿ ಔಟಾದರು.

ನಂತರ ಬಂದ ಜಾಕ್ ಕಾಲಿಸ್ ಕೂಡಾ 6 ರನ್ ಗಳಿಸಿ ಡೊಹರ್ಟಿ ಸ್ಪಿನ್ ಗೆ ಬಲಿಯಾದರು. ಉತ್ತಮ ಫಾರ್ಮ್ ನಲ್ಲಿರುವ ಜೆಪಿ ಡುಮಿನಿ 25 ಎಸೆತದಲ್ಲಿ 30 ರನ್(4 ಬೌಂಡರಿ) ಹಾಗೂ ಎಬಿ ಡಿವಿಲೆಯರ್ಸ್ 21 ರನ್ ಗಳಿಸಿ ತಂಡದ ಮೊತ್ತ ಹೆಚ್ಚಿಸಿದರು.

ಆಮೇಲೆ, ಫರ್ಹಾನ್ ಬೆಹರ್ದೀನ್ 27 ಎಸೆತದಲ್ಲಿ 31 ರನ್ ಹಾಗೂ ಪೀಟರ್ಸನ್ 19 ಎಸೆತದಲ್ಲಿ 32 ರನ್ ಗಳಿಸಿ ತಂಡದ ಮೊತ್ತ ಉತ್ತಮ ಕೊಡುಗೆ ನೀಡಿದರು.

ಆಸ್ಟ್ರೇಲಿಯಾ ಪರ ಮೊದಲ ಪಂದ್ಯವಾಡಿದ ಯುವ ಸ್ಪಿನ್ನರ್ ಕ್ಸೆವಿಯರ್ ಡೊಹರ್ಟಿ 20 ರನ್ನಿತ್ತು 3 ವಿಕೆಟ್ ಕಿತ್ತು ಯಶಸ್ವಿ ಬೌಲರ್ ಎನಿಸಿದರು. ವ್ಯಾಟ್ಸನ್ 29 ರನ್ನಿತ್ತು 2 ವಿಕೆಟ್ ಪಡೆದರು.

Story first published:  Sunday, September 30, 2012, 18:01 [IST]
English summary
Left-arm spinner Xavier Doherty took 3/20 as Australia restricted South Africa to 146/5 in 20 overs in their Super Eight game of the ICC World Twenty20 2012 here on Sunday afternoon.
ಅಭಿಪ್ರಾಯ ಬರೆಯಿರಿ