Englishहिन्दीമലയാളംதமிழ்తెలుగు

ಡೆಕ್ಕನ್ ತಂಡ ಮೋದಿ ನಾಡಿಗೆ ಹೋಗೋಕ್ಕಾಗಲ್ಲ

Posted by:
Updated: Friday, October 12, 2012, 17:50 [IST]
 

ಡೆಕ್ಕನ್ ತಂಡ ಮೋದಿ ನಾಡಿಗೆ ಹೋಗೋಕ್ಕಾಗಲ್ಲ
 

ಬೆಂಗಳೂರು, ಸೆ.7: ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿರುವ ಡೆಕ್ಕನ್ ಚಾರ್ಜರ್ಸ್ ತಂಡ ಮಾರಾಟಕ್ಕಿಟ್ಟ ಮೇಲೆ ಬಿಡ್ಡಿಂಗ್ ಭರಾಟೆ ಆರಂಭವಾಗಿದೆ. ಬಿಡ್ಡಿಂಗ್ ನಲ್ಲಿ ಮುಂದಿರುವ ವಿಡಿಯೋಕಾನ್ ಸಂಸ್ಥೆ ಡೆಕ್ಕನ್ ಚಾರ್ಜರ್ಸ್ ಖರೀದಿಸಿ ಮೋದಿಯ 'ವೈಬ್ರಂಟ್' ನಾಡಿಗೆ ಕರೆದೊಯ್ಯುವ ಹುಮ್ಮಸ್ಸಿನಲ್ಲಿದೆ.

ಆದರೆ, ನಿಯಮಗಳ ಪ್ರಕಾರ ಡೆಕ್ಕನ್ ಚಾರ್ಜರ್ಸ್ ತಂಡವನ್ನು ಖರೀದಿಸುವ ಹೊಸ ಮಾಲೀಕರಿಗೆ ಈಗ ತಂಡ ಹೇಗಿದೆಯೋ ಅದೇ ಸ್ಥಿತಿಯಲ್ಲಿ ಕೈಗೆ ಸಿಕ್ಕರೂ ತಂಡವನ್ನು ಹೈದರಾಬಾದಿನಿಂದ ಬೇರೆಡೆ ಕೊಂಡೊಯ್ಯುವಂತಿಲ್ಲ. ಒಂದು ವೇಳೆ ಟೆಂಡರ್ ನಿಯಮ ಮೀರಿದರೂ, ಈ ರೀತಿ ವರ್ಗಾವಣೆಗೆ ಬಿಸಿಸಿಐ ಅನುಮತಿ ನೀಡಬೇಕಾಗುತ್ತದೆ.

ಇಂಡಿಯನ್ ಪ್ರಿಮಿಯರ್ ಲೀಗ್ (ಐಪಿಎಲ್) ಜನಕ ಲಲಿತ್ ಮೋದಿ ಹಾಗೂ ಗುಜರಾತಿನ ಕ್ರೀಡಾಭಿಮಾನಿ ಮುಖ್ಯಮಂತ್ರಿ ನರೇಂದ್ರ ಮೋದಿ ಅವರು ಅಹಮದಾಬಾದಿಗೆ ಐಪಿಎಲ್ ತಂಡ ಕರೆಸಿಕೊಳ್ಳುವ ಉತ್ಸಾಹ ತೋರಿದ್ದರು.

ವಿಡಿಯೋ ಕಾನ್ ಮುಖ್ಯಸ್ಥ ಹಾಗೂ ವ್ಯವಸ್ಥಾಪಕ ನಿರ್ದೇಶಕ ವೇಣುಗೋಪಾಲ್ ಧೂತ್ ಕೂಡಾ 'ನಾವು ಡೆಕ್ಕನ್ ಚಾರ್ಜರ್ಸ್ ತಂಡವನ್ನು ಖರೀದಿಸಲು ಉತ್ಸುಕರಾಗಿದ್ದೇವೆ. ತಂಡವನ್ನು ಅಹಮದಾಬಾದಿಗೆ ಶಿಫ್ಟ್ ಮಾಡುವ ಯೋಜನೆಯಿದೆ ಎಂದಿದ್ದರು.

ಸುಮಾರು 700 ಕೋಟಿ ರು ಖರ್ಚು ಮಾಡಿ ಡೆಕ್ಕನ್ ಚಾರ್ಜರ್ಸ್ ತಂಡ ಖರೀದಿಸುವುದು ನಮ್ಮ ಸಂಸ್ಥೆಗೆ ಕಷ್ಟವಾಗುವುದಿಲ್ಲ ಎಂದಿರುವ ವಿಡಿಯೋಕಾನ್ ಸಂಸ್ಥೆ ಈ ಮುಂಚೆ ಐಪಿಎಲ್ ತಂಡ ಖರೀದಿಸಲು ಯತ್ನಿಸಿ ಕೈಸುಟ್ಟಿಕೊಂಡಿತ್ತು.

ಸಹಾರಾ ಸಂಸ್ಥೆ ಬಿಡ್ಡಿಂಗ್ ನಲ್ಲಿ ವಿಡಿಯೋಕಾನ್ ಸೋಲಿಸಿ ಪುಣೆ ವಾರಿಯರ್ಸ್ ತಂಡವನ್ನು ಖರೀದಿಸಿತ್ತು. ಆದರೆ, ಪುಣೆ ವಾರಿಯರ್ಸ್ ತಂಡ ಕೂಡಾ ಸಹಾರಾ ಸಂಸ್ಥೆಗೆ ನಷ್ಟದ ಭಾಗವಾಗಿ ಬಿಟ್ಟಿತು.

ಡೆಕ್ಕನ್ ಚಾರ್ಜರ್ಸ್ ತಂಡ ಸುಮಾರು 28 ಬ್ಯಾಂಕುಗಳಿಂದ ಸುಮಾರು 3,200 ಕೋಟಿ ರು.ಗೂ ಅಧಿಕ ಸಾಲ ಪಡೆದಿರುವ ಡೆಕ್ಕನ್ ಚಾರ್ಜರ್ಸ್ ತಂಡ ವಿಧಿ ಇಲ್ಲದೆ ಷೇರು ಮಾರಾಟಕ್ಕೆ ಇಳಿದಿತ್ತು.

ಬಿಸಿಸಿಐನಿಂದ ಅನುಮತಿ ಪಡೆದ ನಂತರ ಡೆಕ್ಕನ್ ಕ್ರಾನಿಕಲ್ ಹೋಲ್ಡಿಂಗ್ಸ್ ಲಿ (DHCL) ಸಂಸ್ಥೆ ಡೆಕ್ಕನ್ ಚಾರ್ಜರ್ಸ್ ತಂಡದ ಮಾರಾಟಕ್ಕೆ ಟೆಂಡರ್ ಕರೆದು ತಂಡದ ಒಡತಿ ಗಾಯತ್ರಿ ರೆಡ್ಡಿ ಪತ್ರಿಕಾ ಪ್ರಕಟಣೆ ಹೊರಡಿಸಿದ್ದರು.

DHCL ಹೆಸರಿನಲ್ಲಿ 5 ಲಕ್ಷ ರು ಡಿಡಿ ಅಥವಾ ಪೇ ಆರ್ಡರ್ ತೆಗೆದುಕೊಂಡು ಸೆ.7 ರಿಂದ ಮುಂಬೈನಲ್ಲಿರುವ ಬಿಸಿಸಿಐ ಕಚೇರಿಯಲ್ಲಿ ಟೆಂಡರ್ ಗೆ ಅರ್ಜಿ ಸಲ್ಲಿಸಬಹುದಾಗಿದೆ. ಸೆ.12 ಕ್ಕೆ ಬಿಡ್ಡಿಂಗ್ ಮುಕ್ತಾಯವಾಗಲಿದ್ದು, ಸೆ.13ರಂದು ಚೆನ್ನೈನ ಶೆರಾಟನ್ ಪಾರ್ಕ್ ಹೋಟೆಲ್ ನಲ್ಲಿ ಹೊಸ ಮಾಲೀಕರನ್ನು ಘೋಷಿಸಲಾಗುತ್ತದೆ.

ಇಂಡಿಯನ್ ಪ್ರಿಮಿಯರ್ ಲೀಗ್ ನಿಯಮದ ಪ್ರಕಾರ ಬಿಡ್ಡಿಂಗ್ ನ ಶೇ 5 ರಷ್ಟು ಮೊತ್ತ ಬಿಸಿಸಿಐ ಪಾಲಾಗಲಿದೆ. ಖರೀದಿದಾರರಿಗೆ ಡೆಕ್ಕನ್ ಚಾರ್ಜರ್ಸ್ ತಂಡ ಈಗ ಹೇಗಿದೆಯೋ ಹಾಗೆ ದೊರೆಯಲಿದೆ. ಡೆಕ್ಕನ್ ಚಾರ್ಜರ್ಸ್ ಬ್ರಾಂಡ್ ನೇಮ್ ಬದಲಿಸಲು ಸಾಧ್ಯವಿಲ್ಲ.

ಡೆಕ್ಕನ್ ಚಾರ್ಜರ್ಸ್ ಮಾರಾಟ, ಬಿಡ್ಡಿಂಗ್ ವ್ಯವಹಾರಗಳನ್ನು ಬ್ಯಾಂಕಿಂಗ್ ಸಂಸ್ಥೆ ರೆಲಿಗೇರ್ ಗೆ ವಹಿಸಲಾಗಿದೆ.

ಡೆಕ್ಕನ್ ಚಾರ್ಜರ್ಸ್ ತಂಡ ಐಪಿಎಲ್ 5 ರಲ್ಲಿ ಭಾಗವಹಿಸಿ, ಕಳಪೆ ಸಾಧನೆ ತೋರಿತ್ತು. ತಂಡದ ಆಟಗಾರರಿಗೆ ಸಂಬಳ ನೀಡದೆ ಬಾಕಿ ಉಳಿಸಿಕೊಂಡಿತ್ತು. ಹೊಸ ಮಾಲೀಕರು ಆಟಗಾರರ ಬಾಕಿ ಮೊತ್ತವನ್ನು ನೀಡಬೇಕಾಗುತ್ತದೆ.

ಡೆಕ್ಕನ್ ಚಾರ್ಜರ್ಸ್ ತಂಡ 2009ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ನಡೆದ ಐಪಿಎಲ್ ಟೂರ್ನಿಯಲ್ಲಿ ಪ್ರಶಸ್ತಿ ಗೆದ್ದಿದ್ದು ಬಿಟ್ಟರೆ ಉಳಿದಂತೆ ಕಳಪೆ ಸಾಧನೆ ಮುಂದುವರೆಸಿತ್ತು.

Story first published:  Friday, September 7, 2012, 18:58 [IST]
English summary
Videocon Industries has shown interest in buying Deccan Chargers and if successful, want to move the franchise to Ahmedabad from Hyderabad. But, as of now, it won't be possible.
ಅಭಿಪ್ರಾಯ ಬರೆಯಿರಿ