Englishहिन्दीമലയാളംதமிழ்తెలుగు

ಯುವಿ ಕ್ರೇಜ್: ಟಿ20 ಟಿಕೆಟ್ ಭರ್ಜರಿ ಮಾರಾಟ

Posted by:
Updated: Wednesday, September 5, 2012, 12:13 [IST]
 

ಯುವಿ ಕ್ರೇಜ್: ಟಿ20 ಟಿಕೆಟ್ ಭರ್ಜರಿ ಮಾರಾಟ
 

ವಿಶಾಖಪಟ್ಟಣಂ, ಸೆ.5: ಪ್ರವಾಸಿ ನ್ಯೂಜಿಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯನ್ನು 2-0 ಅಂತರದಿಂದ ಗೆದ್ದು ಬೀಗುತ್ತಿರುವ ಟೀಂ ಇಂಡಿಯಾ ಈಗ ಟಿ20 ಪಂದ್ಯಕ್ಕೆ ಸಜ್ಜಾಗುತ್ತಿದೆ. ಬಹುದಿನಗಳ ನಂತರ ಯುವರಾಜ್ ಕಣಕ್ಕಿಳಿತ್ತಿರುವುದರಿಮ್ದ ಮೊದಲ ಟಿ20 ಪಂದ್ಯದ ಟಿಕೆಟ್ ಗಳು ಭರ್ಜರಿ ಮಾರಾಟ ಕಂಡಿದೆ.

ವಿಶಾಖಪಟ್ಟಣಮ್ ನಲ್ಲಿ ಮಂಗಳವಾರ ಟಿಕೆಟ್ ಕೌಂಟರ್ ಆರಂಭವಾದ ಮೊದಲ ಗಂಟೆಯಲ್ಲೇ ಸುಮಾರು 10,000 ಟಿಕೆಟ್ ಗಳು ಮಾರಾಟವಾಗಿ ದಾಖಲೆ ನಿರ್ಮಿಸಿದೆ. ಇಲ್ಲಿನ ಡಾ ವೈಎಸ್ ರಾಜಶೇಖರ್ ರೆಡ್ಡಿ ಎಡಿಎ ವಿಡಿಸಿಎ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆಯಲಿರುವ ಕಿವೀಸ್ ವಿರುದ್ಧದ ಪಂದ್ಯಕ್ಕೆ 17,000 ಟಿಕೆಟ್ ಸಾರ್ವಜನಿಕರಿಗೆ ಲಭ್ಯವಿದೆ.

ಅದರಲ್ಲಿ 10,000 ಟಿಕೆಟ್ ಮೊದಲ ಅವಧಿಯಲ್ಲೇ ಮಾರಾಟವಾಗಿಬಿಟ್ಟಿದೆ. ಸುಮಾರು 27,000 ಸೀಟು ಸಾಮರ್ಥ್ಯವುಳ್ಳ ಈ ಕ್ರೀಡಾಂಗಣದಲ್ಲಿ ಕ್ರಿಕೆಟ್ ಹುಚ್ಚು ಹೆಚ್ಚುತ್ತಿದೆ.
ಶನಿವಾರ ಸೆ.8ರಂದು ನಡೆಯಲಿರುವ ಪಂದ್ಯಕ್ಕೆ ಮಂಗಳವಾರ ಬೆಳಗ್ಗೆ 8 ಗಂಟೆಯಿಂದ ಟಿಕೆಟ್ ನೀಡಲು ಆರಂಭಿಸಲಾಗಿತ್ತು. ಮೊದಲ ಒಂದು ಗಂಟೆಯಲ್ಲಿ ಟಿಕೆಟ್ ಮಾರಾಟವಾದರು ಜನರು ಮಾತ್ರ ಸಂಜೆ ತನಕ ಕ್ಯೂ ನಲ್ಲಿ ನಿಂತು ಕಾಯುತ್ತಿದ್ದರು ಎಂದು ಆಂಧ್ರ ಕ್ರಿಕೆಟ್ ಅಸೋಸಿಯೇಷನ್ಸ್ ನ ನಿರ್ದೇಶಕ ಎಂಎಸ್ ಕೆ ಪ್ರಸಾದ್ ಹೇಳಿದ್ದಾರೆ.

ಕ್ಯಾನ್ಸರ್ ನಿಂದ ಚೇತರಿಸಿಕೊಂಡು ಮೈದಾನಕ್ಕೆ ಮರಳಿರುವ ಎಡಗೈ ಆಲ್ ರೌಂಡರ್ ಯುವರಾಜ್ ಸಿಂಗ್ ಆಟ ನೋಡಲು ಕ್ರೀಡಾಭಿಮಾನಿಗಳು ಉತ್ಸುಕರಾಗಿದ್ದಾರೆ. 300,600 ಹಾಗೂ 1000 ರು ಬೆಲೆಯ ಟಿಕೆಟ್ ಗಳು ಮೊದಲ ಗಂಟೆಯಲ್ಲೇ ಮಾರಾಟವಾಗಿದೆ ಎಂದು ಭಾರತದ ಮಾಜಿ ವಿಕೆಟ್ ಕೀಪರ್ ಪ್ರಸಾದ್ ಹೇಳಿದರು.

ಮಳೆಯ ಭೀತಿ:
ಬಂಗಾಳ ಕೊಲ್ಲಿಯ ವಾಯುಭಾರ ಕುಸಿತದಿಂದ ವಿಶಾಖಪಟ್ಟಣದಲ್ಲಿ ಈ ವಾರ ಭಾರಿ ಮಳೆ ಬೀಳುವ ಮುನ್ಸೂಚನೆ ಸಿಕ್ಕಿದೆ. ಮಳೆರಾಯ ಪಂದ್ಯಕ್ಕೆ ಆಡ್ಡಿ ಮಾಡದಿದ್ದರೆ ಸಾಕು ಎಂದು ಅಭಿಮಾನಿಗಳು ದೇವರ ಮೊರೆ ಹೊಕ್ಕಿದ್ದಾರೆ.

'ಮಳೆ ತೊಂದರೆಯನ್ನು ಎದುರಿಸಲು ನಾವು ಸಿದ್ದರಿದ್ದೇವೆ. ಸೂಪರ್ ಸಾಪ್ಪರ್ ಹಾಗೂ ಇನ್ನಿತರ ಸಲಕರಣೆಗಳನ್ನು ಬಳಸಿ ಎಷ್ಟೇ ಮಳೆ ಬಿದ್ದರೂ 2 ಗಂಟೆಯೊಳಗೆ ಆಡಲು ಅನುಕೂಲಕರ ವಾತವರಣ ಪುನರ್ ನಿರ್ಮಿಸುತ್ತೇವೆ' ಎಂದು ಎಂಎಸ್ ಕೆ ಪ್ರಸಾದ್ ಹೇಳಿದ್ದಾರೆ.

ಸೆ.8 ರಂದು ರಾತ್ರಿ 8 ಗಂಟೆಗೆ ಕಿವೀಸ್ ವಿರುದ್ಧ ವಿಶಾಖಪಟ್ಟಣಮ್ ನಲ್ಲಿ ಮೊದಲ ಪಂದ್ಯ ನಡೆಯಲಿದೆ. ಎರಡನೇ ಟಿ20 ಪಂದ್ಯ ಸೆ.11 ರಂದು ಚೆನ್ನೈನ ಚೆಪಾಕ್ ನಲ್ಲಿರುವ ಎಂಎ ಚಿದಂಬರಂ ಸ್ಟೇಡಿಯಂನಲ್ಲಿ ನಡೆಯಲಿದೆ.

Story first published:  Wednesday, September 5, 2012, 11:51 [IST]
English summary
After India's comprehensive 2-0 triumph over New Zealand in the Test series, the tickets for the first T20 have been sold within an hour after opening the sales on Tuesday(Sep.4).
ಅಭಿಪ್ರಾಯ ಬರೆಯಿರಿ