Englishहिन्दीമലയാളംதமிழ்తెలుగు

ಕಿವೀಸ್ ಸೋಲಿಸಿ ಫೈನಲ್ ಗೆ ಭಾರತ ಲಗ್ಗೆ

Posted by:
Updated: Thursday, August 23, 2012, 15:03 [IST]
 

ಕಿವೀಸ್ ಸೋಲಿಸಿ ಫೈನಲ್ ಗೆ ಭಾರತ ಲಗ್ಗೆ
 

ಟೌನ್ಸ್ ವಿಲ್ಲೆ, ಆ.23: ವಿಶ್ವಕಪ್ ಸೆಮಿ ಫೈನಲ್(19 ವರ್ಷ ವಯೋಮಿತಿಯೊಳಗಿನ) ನಲ್ಲಿ ಭಾರತ ತಂಡ ರೋಚಕ ಜಯ ದಾಖಲಿಸಿದೆ. ಗುರುವಾರ(ಆ.23) ನ್ಯೂಜಿಲೆಂಡ್ ವಿರುದ್ಧ ನಡೆದ ಉಪಾಂತ್ಯ ಪಂದ್ಯದಲ್ಲಿ ಭಾರತದ ಯುವಪಡೆ ಜಯ ದಾಖಲಿಸಿ ಫೈನಲ್ ಪ್ರವೇಶಿಸಿದೆ. ಭಾನುವಾರ ನಡೆಯಲಿರುವ ಅಂತಿಮ ಹಣಾಗಣಿಯಲ್ಲಿ ಬಲಿಷ್ಠ ಆಸ್ಟ್ರೇಲಿಯಾ ವಿರುದ್ಧ ಭಾರತ ತಂಡ ಸೆಣಸಲಿದೆ.

ಗೆಲ್ಲಲು ಬೇಕಿದ್ದ 210 ರನ್ ಚೇಸ್ ಮಾಡಿದ ನ್ಯೂಜಿಲೆಂಡ್ ತಂಡ 200 ರನ್ ಮಾತ್ರ ಗಳಿಸಿ ಸೋಲೊಪ್ಪಿಕೊಂಡಿದೆ. ಕೊನೆ ಓವರ್ ನಲ್ಲಿ ನ್ಯೂಜಿಲೆಂಡ್ ತಂಡಕ್ಕೆ ಗೆಲ್ಲಲು 18 ರನ್ ಬೇಕಿತ್ತು ಕ್ವಾಟರ್ ಫೈನಲ್ ಪಂದ್ಯದಲ್ಲಿ ಕೊನೆ ಓವರ್ ನಲ್ಲಿ 18 ರನ್ ಚೆಚ್ಚಿ ಸೆಮಿಫೈನಲ್ ಪ್ರವೇಶಿಸಿದ್ದ ಕಿವೀಸ್ ಆಟಗಾರರು ಮತ್ತೊಮ್ಮೆ ಅದೇ ಪ್ರದರ್ಶನ ನೀಡಲು ವಿಫಲರಾಗಿದ್ದು, ಭಾರತಕ್ಕೆ ವರದಾನವಾಯಿತು.

ಸಂದೀಪ್ ಶರ್ಮಾ, ರವಿಕಾಂತ್ ಸಿಂಗ್ ಮತ್ತು ಹರ್ಮಿತ್ ಸಿಂಗ್ ತಲಾ ಎರಡು ವಿಕೆಟ್ ಗಳಿಸಿ ಕಿವೀಸ್ ಬೆನ್ನೆಲುಬು ಮುರಿದರು. ಪಸ್ಸಿ ಹಾಗೂ ಅಪರಾಜಿತ್ ತಲಾ 1 ವಿಕೆಟ್ ಪಡೆದರು.

53 ರನ್(89 ಎಸೆತ) ಗಳಿಸಿದ ಫ್ಲೆಚರ್ ಮಧ್ಯಮ ಕ್ರಮಾಂಕದಲ್ಲಿ ಉತ್ತಮ ಪ್ರತಿರೋಧ ತೋರಿದರು. 48ನೇ ಓವರ್ ನಲ್ಲಿ ಫ್ಲೆಚರ್ ಅವರನ್ನು ಬೌಲ್ಡ್ ಮಾಡಿದ ಸಂದೀಪ್ ಶರ್ಮಾ ಭಾರತದ ಗೆಲುವಿನ ಆಸೆ ಹೆಚ್ಚಿಸಿದರು. ಆಗ ನ್ಯೂಜಿಲೆಂಡ್ ಗೆ ಗೆಲ್ಲಲು 16 ಎಸೆತಗಳಲ್ಲಿ 37 ರನ್ ಅವಶ್ಯಕತೆ ಇತ್ತು.

ಇದಕ್ಕೂ ಮುನ್ನ 5ನೇ ವಿಕೆಟ್ ಗೆ ನ್ಯೂಜಿಲೆಂಡ್ 56 ರನ್ ಜೊತೆಯಾಟ ಕಂಡಿತ್ತು. ಅದರೆ, 6ನೇ ವಿಕೆಟ್ ಗೆ ಕೇವಲ 36 ರನ್ ಮಾತ್ರ ಸೇರಿಸಿ ಸೋಲಿನ ಹಾದಿ ಹಿಡಿಯಿತು. 18 ಓವರ್ ನಲ್ಲಿ 63 ರನ್ ಗೆ 4 ವಿಕೆಟ್ ಕಳೆದುಕೊಂಡ ನ್ಯೂಜಿಲೆಂಡ್ ಮತ್ತೆ ಚೇತರಿಸಿಕೊಳ್ಳಲಿಲ್ಲ. ಈ ಮೂಲಕ ಭಾರತ ನಾಲ್ಕನೇ ಬಾರಿಗೆ ಫೈನಲ್ ತಲುಪಿದ ಸಾಧನೆ ಮಾಡಿತು.

ಭಾರತದ ಇನ್ನಿಂಗ್ಸ್ : ಮೊದಲು ಬ್ಯಾಟಿಂಗ್ ಮಾಡುವ ಅವಕಾಶ ಪಡೆದ ಭಾರತ ತಂಡದ ಆರಂಭ ಉತ್ತಮವಾಗಿತ್ತು. ಪ್ರಶಾಂತ್ ಚೋಪ್ರಾ ಮತ್ತು ನಾಯಕ ಉನ್ಮಕ್ತ್ ಚಂದ್ ಮೊದಲ ವಿಕೆಟಿಗೆ 51 ರನ್ ಜತೆಯಾಟ ನಡೆಸಿದರು. 31 ರನ್ ಮಾಡಿದ ಚಾಂದ್ ನಿರ್ಗಮನದ ಬಳಿಕ ಬಂದ ಅಪರಾಜಿತ 44 ರನ್ ಮಾಡಿ ತಂಡಕ್ಕೆ ಮತ್ತೊಮ್ಮೆ ಆಧಾರವಾದರು.

ಉತ್ತಮ ಮೊತ್ತ ಕಲೆ ಹಾಕುವ ಕುರುಹು ತೋರಿದ್ದ ಭಾರತ, ಚೋಪ್ರಾ 52 ರನ್ ಮಾಡಿ ಪೆವಿಲಿಯನ್ ದಾರಿ ಹಿಡಿಯುತ್ತಿದ್ದಂತೆ ಹಳ್ಳ ಹಿಡಿಯಿತು. 210 ರನ್ ಮಾತ್ರ ಗಳಿಸಲು ಸಾಧ್ಯವಾಯಿತು.

ನ್ಯೂಜಿಲೆಂಡ್ ಪರ ಹಾರ್ನೆ 3 ಮತ್ತು ಕ್ವಿನ್ 2 ವಿಕೆಟ್ ಕಬಳಿಸಿ ಭಾರತದ ಬ್ಯಾಟಿಂಗ್ ಪಾಳಯಕ್ಕೆ ಆಘಾತ ನೀಡಿದರು.

U-19 ವಿಶ್ವಕಪ್ ನಲ್ಲಿ ಭಾರತ 2000,2006,2008 ಹಾಗೂ 2012ರಲ್ಲಿ ಫೈನಲ್ ಪ್ರವೇಶಿಸಿತ್ತು. 2000 ಹಾಗೂ 2008ರಲ್ಲಿ ಕ್ರಮವಾಗಿ ಶ್ರೀಲಂಕಾ ಹಾಗೂ ದಕ್ಷಿಣ ಆಫ್ರಿಕಾವನ್ನು ಸೋಲಿಸಿ ಚಾಂಪಿಯನ್ ಆಗಿ ಭಾರತದ ಯುವಪಡೆ ಮೆರೆದಿತ್ತು. 2006 ರಲ್ಲಿ ಫೈನಲ್ ನಲ್ಲಿ ಪಾಕಿಸ್ತಾನ ವಿರುದ್ಧ ಸೋಲುಂಡಿತ್ತು. 2012ರಲ್ಲಿ ಆಸ್ಟ್ರೇಲಿಯಾ ತಂಡವನ್ನು ಉನ್ಮುಕ್ತ್ ಚಂದ್ ತಂಡ ಸೋಲಿಸಬಲ್ಲದೇ ಕಾದು ನೋಡಬೇಕಿದೆ.

Story first published:  Thursday, August 23, 2012, 13:08 [IST]
English summary
India defeated New Zealand by 9 runs to make it to the final of the U-19 World Cup for the second time, after 2008 as they restricted their opponents to 200/9.
ಅಭಿಪ್ರಾಯ ಬರೆಯಿರಿ