Englishहिन्दीമലയാളംதமிழ்తెలుగు

ಪಾಕ್ ವಿರುದ್ಧ ಭಾರತಕ್ಕೆ ವಿರೋಚಿತ ಗೆಲುವು

Posted by:
Updated: Monday, August 20, 2012, 13:14 [IST]
 

ಪಾಕ್ ವಿರುದ್ಧ ಭಾರತಕ್ಕೆ ವಿರೋಚಿತ ಗೆಲುವು
 

ಟೌನ್ಸ್ ವಿಲ್ಲೆ(ಆಸ್ಟ್ರೇಲಿಯಾ), ಆ.20: ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ವಿರುದ್ಧ ನಡೆದ ವಿಶ್ವಕಪ್ ಕ್ವಾಟರ್ ಫೈನಲ್(19 ವರ್ಷ ವಯೋಮಿತಿಯೊಳಗಿನ) ನಲ್ಲಿ ಭಾರತ ತಂಡ 1 ವಿಕೆಟ್ ಗಳ ವಿರೋಚಿತ ಜಯ ದಾಖಲಿಸಿದೆ. ಸೋಮವಾರ(ಆ.20) ಇಲ್ಲಿ ನಡೆದ ರೋಚಕ ಪಂದ್ಯದಲ್ಲಿ 137 ರನ್ ಗಳ ಅಲ್ಪಮೊತ್ತವನ್ನು ಬೆನ್ನು ಹತ್ತಿದ ಭಾರತ ತಂಡ ಅಂತಿಮವಾಗಿ ಚಂಚಲವಾಗಿದ್ದ ವಿಜಯಲಕ್ಷ್ಮಿಯ ಕೈ ಹಿಡಿದಿದ್ದಾರೆ.

12 ಎಸೆತಗಳು ಬಾಕಿ ಇರುವಂತೆ ಗೆಲುವು ಸಾಧಿಸಿದ ಭಾರತ ತನ್ನ ಇನ್ನಿಂಗ್ಸ್ ನಲ್ಲಿ ಹಲವು ಆತಂಕದ ಕ್ಷಣಗಳನ್ನು ಎದುರಿಸಿತ್ತು. ಕೊನೆ ವಿಕೆಟ್ ಗೆ 10 ರನ್ ಗಳಿಸಬೇಕಾದ ಪರಿಸ್ಥಿತಿ ಎದುರಿಸಬೇಕಾಯಿತು. ಕೊನೆ ವಿಕೆಟ್ ಗೆ ಹರ್ಮಿತ್ ಸಿಂಗ್ ಹಾಗೂ ಸಂದೀಪ್ ಸಿಂಗ್ ತಾಳ್ಮೆಯ ಆಟ ಪ್ರದರ್ಶಿಸಿ 48ನೇ ಓವರ್ ನಲ್ಲಿ ಜಯ ದಾಖಲಿಸಿದರು.

ಆಕರ್ಷಕ ಅರ್ಧ ಶತಕ, 1 ವಿಕೆಟ್ ಹಾಗೂ 4 ಕ್ಯಾಚ್ ತೆಗೆದುಕೊಂಡು ಆಲ್ ರೌಂಡ್ ಆಟ ಪ್ರದರ್ಶಿಸಿದ ಭಾರತದ ಬಾಬಾ ಅಪರಾಜಿತ್ ಅವರಿಗೆ ಪಂದ್ಯಶ್ರೇಷ್ಠ ಪ್ರಶಸ್ತಿ ಲಭಿಸಿದೆ. ಗುರುವಾರ ನಡೆಯಲಿರುವ ಸೆಮಿಫೈನಲ್ ನಲ್ಲಿ ಭಾರತ ತಂಡ ನ್ಯೂಜಿಲೆಂಡ್ ತಂಡವನ್ನು ಎದುರಿಸಲಿದೆ.

ಭಾರತದ ದುರ್ಬಲ ರನ್ ಚೇಸ್ : 137 ರನ್ ಚೇಸ್ ಮಾಡಿದ ಭಾರತ ತಂಡ ಮೊದಲ 5 ಓವರ್ ಗಳಲ್ಲಿ 8 ರನ್ ಗಳಿಸಿ 3 ಪ್ರಮುಖ ವಿಕೆಟ್ ಗಳನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ನಾಯಕ ಉನ್ಮುಕ್ತ್ ಚಂದ್ ಶೂನ್ಯ ಸುತ್ತಿ ಪೆವಿಲಿಯನ್ ಗೆ ಮರಳಿದರು. ಪ್ರಶಾಂತ್ ಛೋಪ್ರಾ (4), ಹನುಮ ವಿಹಾರಿ (0) ಗಳಿಸಿದ್ದರು.

ನಂತರ ವಿಜಯ್ ಜೋಲ್ ಹಾಗೂ ಬಾಬಾ ಅಪರಾಜಿತ್ ಜವಾಬ್ದಾರಿಯುತ ಆಟವಾಗಿ 10 ಒವರ್ ಗಳಲ್ಲಿ ತಂಡದ ಮೊತ್ತ 24 ರನ್ ಗೆ ಏರಿಸಿದರು. ಈ ಜೋಡಿ 20 ಓವರ್ ಗಳ ತನಕ ಮುರಿಯದ ಜೊತೆಯಾಟ ಪ್ರದರ್ಶಿಸಿ ತಂಡದ ಮೊತ್ತ 54ಕ್ಕೆ ಏರಿಸಿತು.

ಆದರೆ, 36 ರನ್ ಗಳಿಸಿದ್ದ ವಿಜಯ್ ಅವರು ತಂಡದ ಮೊತ್ತ 75 ರನ್ ಆಗಿದ್ದಾಗ ಔಟಾದರು. ಈ ಸಂದರ್ಭದಲ್ಲಿ 25 ಓವರ್ ಗಳಲ್ಲಿ 62 ರನ್ ಬೇಕಿತ್ತು 5 ವಿಕೆಟ್ ಬಾಕಿ ಇತ್ತು. ಅಪರಾಜಿತ್ 28 ರನ್ ಗಳಿಸಿ ಭಾರತಕ್ಕೆ ಭರವಸೆ ಮೂಡಿಸಿದ್ದರು.

ಆದರೆ, 51 ರನ್ ಗಳಿಸಿದ್ದ ಅಪರಾಜಿತ್ ಅವರು 6ನೇ ವಿಕೆಟ್ ಆಗಿ ಪೆವಿಲಿಯನ್ ತಲುಪಿದರು. 124/6 ರನ್ ಗಳಿಸಿದ್ದ ಭಾರತ 13 ರನ್ ಗಳನ್ನು ಸುಲಭವಾಗಿ ಗಳಿಸುವ ನಿರೀಕ್ಷೆಯಿತ್ತು.
ಆದರೆ, ವಿಕೆಟ್ ಕೀಪರ್ ಸ್ಮಿತ್ ಪಟೇಲ್, ಕಮಲ್ ಪಸ್ಸಿ, ರವಿಕಾಂತ್ ವಿಕೆಟ್ ಕಳೆದು ಕೊಂಡು ಪಂದ್ಯ ಬಿಟ್ಟುಕೊಡುವ ಸ್ಥಿತಿಗೆ ಭಾರತ ತಲುಪಿ ಬಿಟ್ಟಿತು. ಕೊನೆ ವಿಕೆಟ್ ಗೆ 10 ರನ್ ಬೇಕಿತ್ತು.

48ನೇ ಓವರ್ ನಲ್ಲಿ ಹರ್ಮಿತ್ ಸಿಂಗ್ ವಿಜಯದ ರನ್ ಗಳಿಸುತ್ತಿದ್ದಂತೆ ಭಾರತದ ಪಾಳೆಯದಲ್ಲಿ ಹರ್ಷೋದ್ಗಾರ ಆರಂಭವಾಯಿತು.

ಪಾಕ್ ಇನ್ನಿಂಗ್ಸ್ : ಭಾರತದ ಯುವ ವೇಗಿಗಳಾದ ಸಂದೀಪ್ ಸಿಂಗ್ ಹಾಗೂ ರವಿಕಾಂತ್ ಸಿಂಗ್ ಅವರು 3 ವಿಕೆಟ್ ಗಳಿಸಿ ಬಲಿಷ್ಠ ಪಾಕಿಸ್ತಾನ ಪಡೆಯ ಬ್ಯಾಟಿಂಗ್ ಬೆನ್ನಲುಬು ಮುರಿದರು. ಮೊದಲ ಓವರ್ ನಲ್ಲೇ ಪಾಕಿಸ್ತಾನದ 2 ವಿಕೆಟ್ ಉದುರಿತ್ತು.

ಅದರೆ, ನಂತರ್ ಚೇತರಿಸಿಕೊಂಡ ಪಾಕಿಸ್ತಾನ ನಾಯಕ ಬಬ್ಬಾರ್ ಅಜಾಂ(50) ಹಾಗೂ ಉಮರ್ ವಾಹೀರ್ (27) ಬ್ಯಾಟಿಂಗ್ ನೆರವಿನಿಂದ ಪರಿಸ್ಥಿತಿ ಸುಧಾರಿಸಿತು. 3ನೇ ವಿಕೆಟ್ ಈ ಇಬ್ಬರು ಆಟಗಾರರು 53 ರನ್ ಕಲೆ ಹಾಕಿದರು. ನಂತರ ಎಹ್ಸಾನ್ ಅದಿಲ್ ಚಿನಕುರಳಿ ಆಟವಾಡಿ 35 ರನ್ ಗಳಿಸಿ ಪಾಕಿಸ್ತಾನದ ಮೊತ್ತ 100 ರನ್ ಗಡಿ ದಾಟುವಂತೆ ಮಾಡಿದರು. 45.1 ಓವರ್ ಗಳಲ್ಲಿ 137 ರನ್ ಗಳಿಗೆ ಪಾಕಿಸ್ತಾನ ಸರ್ವಪತನ ಕಂಡಿತು.

Story first published:  Monday, August 20, 2012, 12:48 [IST]
English summary
Under 19 World Cup: What a thrilling finish it was. India clinched a one-wicket win over Pakistan and entered the semi-finals of the ICC Under-19 Cricket World Cup here on Monday(Aug.20).
ಅಭಿಪ್ರಾಯ ಬರೆಯಿರಿ