Englishहिन्दीമലയാളംதமிழ்తెలుగు

ವೆಂಕಟ ಸಾಯಿ ಲಕ್ಷ್ಮಣ್ ಟೆಸ್ಟ್ ಕ್ರಿಕೆಟ್ ಗೆ ಗುಡ್ ಬೈ

Posted by:
Updated: Saturday, August 18, 2012, 20:39 [IST]
 

ಹೈದರಾಬಾದ್, ಆ.17: ಭಾರತದ ಅಗ್ರಗಣ್ಯ ಟೆಸ್ಟ್ ಬ್ಯಾಟ್ಸ್ ಮನ್ ವೆಂಗಿಪುರಪ್ಪು ವೆಂಕಟ ಸಾಯಿ ಲಕ್ಷ್ಮಣ್ ಅವರು ಟೆಸ್ಟ್ ಕ್ರಿಕೆಟ್ ಗೆ ವಿದಾಯ ಹೇಳಿದ್ದಾರೆ. ಹೈದರಾಬಾದಿನ ರಾಜೀವ್ ಗಾಂಧಿ ಸ್ಟೇಡಿಯಂನಲ್ಲಿ ಶನಿವಾರ (ಆ.18) ನಡೆದ ಸುದ್ದಿಗೋಷ್ಠಿಯಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ ನಿಂದ ಈ ಕ್ಷಣದಿಂದಲೇ ನಿವೃತ್ತಿ ಹೊಂದುತ್ತಿರುವುದಾಗಿ ಘೋಷಿಸಿದರು.

ನ್ಯೂಜಿಲೆಂಡ್ ಟೆಸ್ಟ್ ಸರಣಿಗೆ ಆಯ್ಕೆಯಾಗಿದ್ದ ಲಕ್ಷ್ಮಣ್ ಅವರು ಅಧಿಕೃತವಾಗಿ ನಿವೃತ್ತಿ ಘೋಷಿಸಿರುವುದರಿಂದ ನ್ಯೂಜಿಲೆಂಡ್ ಸರಣಿಗೆ ಅಲಭ್ಯರಾಗಿದ್ದಾರೆ. ಯುವ ಆಟಗಾರರಿಗೆ ಅವಕಾಶ ನೀಡಲು ಈ ನಿರ್ಧಾರ ಕೈಗೊಂಡೆ ಎಂದಿದ್ದಾರೆ.

ಹೈದರಾಬಾದಿನ ಕ್ರಿಕೆಟ್ ಅಸೋಸಿಯೇಷನ್ಸ್ ಲಕ್ಷ್ಮಣ್ ಅವರನ್ನು ಆತ್ಮೀಯವಾಗಿ ಸನ್ಮಾನಿಸಿ ಬೀಳ್ಕೊಡುಗೆ ನೀಡಿದೆ. ರಾಜೀವ್ ಗಾಂಧಿ ಸ್ಟೇಡಿಯಂನ ಉತ್ತರ ತುದಿಯನ್ನು ವಿವಿಎಸ್ ಲಕ್ಷ್ಮಣ್ ಅವರ ಹೆಸರಿಗೆ ಅರ್ಪಿಸಲಾಗಿದೆ.

ಲಕ್ಷ್ಮಣ್ ಅವರು ಸಹಪಾಠಿ ದೀರ್ಘಕಾಲದ ಗೆಳೆಯ ರಾಹುಲ್ ದ್ರಾವಿಡ್ ಅನುಪಸ್ಥಿತಿ ನೋವು ಅನುಭವಿಸುತ್ತಿದ್ದರು. ನ್ಯೂಜಿಲೆಂಡ್ ಸರಣಿ ನಂತರ ವೃತ್ತಿಪರ ಕ್ರಿಕೆಟ್ ಗೆ ವಿದಾಯ ಹೇಳುವ ಸಾಧ್ಯತೆ ಬಗ್ಗೆ ಲಕ್ಷ್ಮಣ್ ಅವರು ದಿ ಹಿಂದೂ ಪತ್ರಿಕೆಗೆ ಮೊದಲಿಗೆ ಸುಳಿವು ನೀಡಿದ್ದರು. [ವೆರಿ ವೆರಿ ಸ್ಪೆಷಲ್ ಇನ್ನಿಂಗ್ಸ್ ಪಟ್ಟಿ] ಲಕ್ಷ್ಮಣ್ ಅವರು 134 ಟೆಸ್ಟ್ ಗಳಲ್ಲಿ 8,787 ರನ್ ಗಳನ್ನು ಬಾರಿಸಿದ್ದಾರೆ. 17 ಶತಕ ಹಾಗೂ 56 ಅರ್ಧ ಶತಕಗಳನ್ನು ಚೆಚ್ಚಿದ್ದಾರೆ.

86 ಏಕದಿನ ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಆಡಿದ್ದು 2,338 ರನ್ ಗಳನ್ನು ಸಂಪಾದಿಸಿದ್ದು 6 ಶತಕ ಹಾಗೂ 10 ಅರ್ಧಶತಕಗಳನ್ನು ಗಳಿಸಿದ್ದಾರೆ.

ಬಲಗೈ ಕಲಾತ್ಮಕ ಆಟಗಾರ ಲಕ್ಷ್ಮಣ್ ಅವರು 2001ರಲ್ಲಿ ಕೋಲ್ಕತ್ತಾದ ಈಡೆನ್ ಗಾರ್ಡನ್ ನಲ್ಲಿ ಅಸ್ಟ್ರೇಲಿಯಾ ವಿರುದ್ಧ 281 ರನ್ ಇನ್ನಿಂಗ್ ಅಭಿಮಾನಿಗಳ ಮನದಾಳದಲ್ಲಿ ಅಚ್ಚಳಿಯದೆ ಉಳಿದಿದೆ. 1996ರಲ್ಲಿ ಅಹಮದಾಬಾದಿನಲ್ಲಿ ದಕ್ಷಿಣ ಆಫ್ತಿಅಕ ವಿರುದ್ಧ ಟೆಸ್ಟ್ ಕ್ರಿಕೆಟ್ ಗೆ ಜೀವನ ಆರಂಭಿಸಿದ ಲಕ್ಷ್ಮಣ್ ಭಾರತ ಭರವಸೆ ಆಟಗಾರ ಎಂಬುದರಲ್ಲಿ ಎರಡು ಮಾತಿಲ್ಲ.

ಆಸ್ಟ್ರೇಲಿಯಾ ಪ್ರವಾಸದ ನಂತರ ಯಾವುದೇ ಅಂತಾರಾಷ್ಟ್ರೀಯ ಪಂದ್ಯವನ್ನಾಡದ ಲಕ್ಷ್ಮಣ್ ಅವರು ಆಸೀಸ್ ಪ್ರವಾಸದಲ್ಲಿ 8 ಇನ್ನಿಂಗ್ಸ್ ನಲ್ಲಿ ಒಂದೇ ಒಂದು ಅರ್ಧ ಸೆಂಚುರಿಯೊಂದಿಗೆ 155 ರನ್ ಮಾತ್ರ ಬಾರಿಸಿದ್ದರು. ಆಸೀಸ್ ವಿರುದ್ಧ ಭಾರತ 4-0 ಅಂತರದಲ್ಲಿ ಸೋಲು ಕಂಡಿತ್ತು. ರಾಹುಲ್ ದ್ರಾವಿಡ್ ನಿವೃತ್ತಿ ಘೋಷಿಸಿದ ನಂತರವೇ ಲಕ್ಷ್ಮಣ್ ಕೂಡಾ ನಿವೃತ್ತಿ ಹೊಂದುತ್ತಾರೆ ಎಂಬ ಸುದ್ದಿ ಹಬ್ಬಿತ್ತು.

ಅಂತಾರಾಷ್ಟ್ರೀಯ ಕ್ರಿಕೆಟ್ ಗೆ ಗುಡ್ ಬೈ ಹೇಳಿದ ಮೇಲೆ ರಾಹುಲ್ ದ್ರಾವಿಡ್  ಅವರು ಇಂಡಿಯನ್ ಪ್ರಿಮಿಯರ್ ಲೀಗ್ ನ ಟ್ವೆಂಟಿ 20 ಕ್ರಿಕೆಟ್ ನಲ್ಲಿ ಆಡಿ ಅದ್ಭುತ ಪ್ರದರ್ಶನ ನೀಡಿದ್ದರು. ಆದರೆ, ಲಕ್ಷ್ಮಣ್ ಐಪಿಎಲ್ 5 ರಲ್ಲಿ ಆಡುವ ಅವಕಾಶದಿಂದ ವಂಚಿತರಾಗಿದ್ದರು.

ಲಕ್ಷ್ಮಣ್ ಅವರ ನಿವೃತ್ತಿಯೊಂದಿಗೆ ಸಚಿನ್ ತೆಂಡೂಲ್ಕರ್, ಸೌರವ್ ಗಂಗೂಲಿ, ಲಕ್ಷ್ಮಣ್ ಹಾಗೂ ದ್ರಾವಿಡ್ 'fab four' ಅವರ ಸುವರ್ಣ ಯುಗ ಅಂತ್ಯಗೊಂಡಂತಾಗಿದೆ. ಸಚಿನ್ ತೆಂಡೂಲ್ಕರ್ ಹೊರತುಪಡಿಸಿದರೆ, ಟೆಸ್ಟ್ ಕ್ರಿಕೆಟ್ ನಲ್ಲಿ ಭಾರತದ ಭರವಸೆ ಆಟಗಾರರು ಒಬ್ಬೊಬ್ಬರಾಗಿ ವಿದಾಯ ಹೇಳಿದ್ದಾರೆ.

Story first published:  Saturday, August 18, 2012, 16:49 [IST]
English summary
VVS Laxman announced his retirement from international cricket here at his home ground, Rajiv Gandhi International Stadium on Saturday(Aug.18). Laxman, a veteran of 134 Tests, has decided to quit cricket with immediate effect.
ಅಭಿಪ್ರಾಯ ಬರೆಯಿರಿ