Englishहिन्दीമലയാളംதமிழ்తెలుగు

ಕಪಿಲ್ ದೇವ್ ಗೆ ಕ್ಷಮಾದಾನ ನೀಡಿದ ಬಿಸಿಸಿಐ

Posted by:
Updated: Thursday, July 26, 2012, 10:39 [IST]
 

ಕಪಿಲ್ ದೇವ್ ಗೆ ಕ್ಷಮಾದಾನ ನೀಡಿದ ಬಿಸಿಸಿಐ
 

ಬೆಂಗಳೂರು, ಜು.25: ಭಾರತ ತಂಡದ ಮಾಜಿ ನಾಯಕ ವಿಶ್ವಕಪ್ ಹೀರೋ ಕಪಿಲ್ ದೇವ್ ಅವರಿಗೆ ಬಿಸಿಸಿಐ ಬಾಗಿಲು ತೆರೆದುಕೊಂಡಿದೆ. ಇಂಡಿಯನ್ ಕ್ರಿಕೆಟ್ ಲೀಗ್ (ICL) ಜೊತೆ ಗುರುತಿಸಿಕೊಂಡು ಬಂಡಾಯವೆದ್ದಿದ್ದ ಕಪಿಲ್ ಅವರಿಗೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ ಕ್ಷಮಾದಾನ ನೀಡಿದೆ.

ಕಪಿಲ್ ದೇವ್ ಅವರು ಎಸ್ಸೆಲ್ ಸ್ಪೋಟ್ಸ್ ಪ್ರೈ ಲಿ ಸಮೂಹದ ಇಂಡಿಯನ್ ಕ್ರಿಕೆಟ್ ಲೀಗ್ ಗೆ ರಾಜೀನಾಮೆ ನೀಡಿ ಹೊರ ಬಂದಿರುವ ಬಗ್ಗೆ ಬಿಸಿಸಿಐಗೆ ಪತ್ರ ಬರೆದಿದ್ದಾರೆ. ಹೀಗಾಗಿ ಭಾರತದ ಮಾಜಿ ನಾಯಕ ಕಪಿಲ್ ಅವರಿಗೆ ಕ್ಷಮಾದಾನ ನೀಡಲು ನಿರ್ಧರಿಸಲಾಗಿದೆ ಎಂದು ಬಿಸಿಸಿಐ ಅಧ್ಯಕ್ಷ ಎನ್ ಶ್ರೀನಿವಾಸನ್ ಅವರು ಬುಧವಾರ (ಜು.25) ನಡೆದ ಸುದ್ದಿಗೋಷ್ಠಿಯಲ್ಲಿ ಘೋಷಿಸಿದರು.

ಬಿಸಿಸಿಐಗೆ ಸಂಪೂರ್ಣ ಬೆಂಬಲ ನೀಡುವ ಬಗ್ಗೆ ಕಪಿಲ್ ಅವರು ನೀಡಿದ ಪತ್ರದಲ್ಲಿ ಉಲ್ಲೇಖಿಸಲಾಗಿದೆ. ಮುಂಬರುವ ವರ್ಷಗಳಲ್ಲಿ ಕಪಿಲ್ ಅವರ ಸೇವೆಯನ್ನು ಬಳಸಿಕೊಂಡು ಫಲಪ್ರದವಾದ ಕ್ರಿಕೆಟ್ ಅಭಿವೃದ್ಧಿಗಾಗಿ ಶ್ರಮಿಸಲಾಗುವುದು ಎಂದು ಶ್ರೀನಿವಾಸನ್ ಹೇಳಿದರು.

1983ರ ವಿಶ್ವಕಪ್ ವಿಜೇತ ತಂಡದ ನಾಯಕರಾಗಿದ್ದ ಕಪಿಲ್ ದೇವ್ ಅವರಿಗೆ ಕ್ಷಮಾದಾನ ಸಿಕ್ಕಿರುವುದರಿಂದ ಮಾಜಿ ಕ್ರಿಕೆಟರ್ ಗಳಿಗೆ ಇಂಡಿಯನ್ ಪ್ರಿಮಿಯರ್ ಲೀಗ್(ಐಪಿಎಲ್) ಸಂದರ್ಭದಲ್ಲಿ ನೀಡಲಾದ ಸನ್ಮಾನ ಗೌರವ ಧನ ಪಡೆಯಲು ಅರ್ಹರಾಗುತ್ತಾರೆ.

ಬಿಸಿಸಿಐ ಆಯೋಜಿಸುವ ಇಂಡಿಯನ್ ಪ್ರಿಮಿಯರ್ ಲೀಗ್ ವಿರುದ್ಧ ಬಂಡಾಯವೆದ್ದು 2007 ರಿಂದ 2009ರ ಅವಧಿಯಲ್ಲಿ ಇಂಡಿಯನ್ ಕ್ರಿಕೆಟ್ ಲೀಗ್ ನಡೆಸಲಾಗಿತ್ತು. ಜೀ ಎಂಟರ್ ಟೈನ್ಮೆಂಟ್, ಎಸ್ಸೆಲ್ ಸ್ಪೋರ್ಟ್ಸ್ ಪ್ರೈ ಲಿ.ನ ಸತೀಶ್ ಚಂದ್ರ ಅವರ ಬಂಡವಾಳದ ಜೊತೆಗೆ ಕಪಿಲ್ ದೇವ್ ಕಿರಣ್ ಮೋರೆಯಂಥ ಮಾಜಿ ಕ್ರಿಕೆಟರ್ ಗಳು ಕೈ ಜೋಡಿಸಿದ್ದರು. ಆದರೆ, ಐಸಿಎಲ್ ಟ್ವೆಂಟಿ20 ಟೂರ್ನಿಗೆ ಬಿಸಿಸಿಐ ಹಾಗೂ ಐಸಿಸಿ ಯಾವುದೇ ಮಾನ್ಯತೆ ನೀಡಿರಲಿಲ್ಲ. ಹಾಗೂ ಐಸಿಎಲ್ ನಲ್ಲಿ ಗುರುತಿಸಿಕೊಂಡ ಆಟಗಾರರು, ಮಾಜಿ ಕ್ರಿಕೆಟರ್ ಗಳಿಗೆ ಬಿಸಿಸಿಐ ನಿಷೇಧ ಹೇರಿತ್ತು.

ಇತ್ತೀಚೆಗೆ ಮಾಜಿ ವಿಕೆಟ್ ಕೀಪರ್ ಕಿರಣ್ ಮೋರೆ ಅವರಿಗೆ ಕ್ಷಮಾದಾನ ನೀಡಿದ್ದ ಬಿಸಿಸಿಐ, ಈಗ 'ಹರ್ಯಾಣದ ಹರಿಕೇನ್' ಕಪಿಲ್ ದೇವ್ ಅವರನ್ನು ಬಿಸಿಸಿಐ ಕಚೇರಿ ಒಳಗೆ ಬಿಟ್ಟುಕೊಂಡಿದೆ.
(ದಟ್ಸ್ ಕ್ರಿಕೆಟ್)

Story first published:  Wednesday, July 25, 2012, 13:55 [IST]
English summary
Former India captain Kapil Dev has been granted amnesty by the Board of Control for Cricket in India (BCCI) after he resigned from the now defunct Indian Cricket League (ICL).
ಅಭಿಪ್ರಾಯ ಬರೆಯಿರಿ