Englishहिन्दीമലയാളംதமிழ்తెలుగు

ಭಾರತಕ್ಕೆ ಗರ್ವಭಂಗ, ಲಂಕಾಗೆ ಭರ್ಜರಿ ಜಯ

Posted by:
Updated: Tuesday, July 24, 2012, 21:13 [IST]
 

ಭಾರತಕ್ಕೆ ಗರ್ವಭಂಗ, ಲಂಕಾಗೆ ಭರ್ಜರಿ ಜಯ
 

ಹಂಬಂಟೋಟಾ, ಜು.24: ಲಂಕಾ ವೇಗಿಗಳ ಕರಾರುವಾಕ್ ದಾಳಿಗೆ ಸಿಲುಕಿದ ಟೀಂ ಇಂಡಿಯಾ ಮಂಗಳವಾರ (ಜು.24) ನಡೆದ ಎರಡನೇ ಏಕದಿನ ಪಂದ್ಯದಲ್ಲಿ ಹೀನಾಯ ಸೋಲು ಕಂಡಿದೆ. ಮಹೀಂದ್ರಾ ರಾಜಪಕ್ಷೆ ಕ್ರೀಡಾಂಗಣದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಟೀಂ ಇಂಡಿಯಾ ಲಂಕಾ ಬೌಲರ್ ತಿಸ್ಸಾರಾ ಪೆರೇರಾ ಮತ್ತು ಏಂಜೆಲೊ ಮ್ಯಾಥ್ಯೂಸ್ ದಾಳಿಗೆ ನಲುಗಿ ಕೇವಲ 138 ರನ್ ಗಳಿಗೆ ಆಲೌಟ್ ಆಗಿತ್ತು.

ಅಲ್ಪ ಮೊತ್ತ ಬೆನ್ನತ್ತಿದ ಲಂಕಾ ತಂಡ 1 ವಿಕೆಟ್ ಕಳೆದುಕೊಂಡು ಸುಲಭವಾಗಿ ಗುರಿ ತಲುಪಿತು. ಈ ಗೆಲುವಿನ ಮೂಲಕ ಐದು ಏಕದಿನ ಪಂದ್ಯಗಳ ಸರಣಿಯಲ್ಲಿ ಶ್ರೀಲಂಕಾ ಹಾಗೂ ಭಾರತ ತಂಡ ತಲಾ ಒಂದೊಂದು ಪಂದ್ಯ ಗೆದ್ದಿದೆ. [ಸ್ಕೋರ್ ಕಾರ್ಡ್ ನೋಡಿ]

ಗೆಲ್ಲಲು ಬೇಕಿದ್ದ 139 ರನ್ ಗಳನ್ನು ಬೆನ್ನು ಹತ್ತಿದ ಲಂಕಾ ಬ್ಯಾಟ್ಸ್ ಮನ್ ಗಳು ಉತ್ತಮ ಆರಂಭ ಪಡೆದರು. ಉಪುಲ್ ತರಂಗ 60 ಎಸೆತದಲ್ಲಿ 59 ರನ್ (8 ಬೌಂಡರಿ) ಹಾಗೂ ತಿಲಕರತ್ನೆ ದಿಲ್ಶನ್ 49 ಎಸೆತದಲ್ಲಿ 50 ರನ್ (5 ಬೌಂಡರಿ) ಗಳಿಸಿ ತಂಡವನ್ನು ಗೆಲುವಿನತ್ತ ಮುನ್ನಡೆಸಿದರು.

27ನೇ ಏಕದಿನ ಆರ್ಧ ಶತಕ ಗಳಿಸಿದ ತಿಲಕರತ್ನೆ ದಿಲ್ಶನ್ 20ನೇ ಓವರ್ ನಲ್ಲಿ ಅಶ್ವಿನ್ ಬೌಲಿಂಗ್ ನಲ್ಲಿ ಔಟಾಗಿ ಪೆವಿಲಿಯನ್ ಮರಳಿದರು. ನಂತರ ಬಂದ ಚಂಡಿಮಾಲ್ ಗೆಲುವಿನ ರನ್ ಬಾರಿಸಿದರು. ಇನ್ನೂ 181 ಎಸೆತಗಳು ಬಾಕಿ ಇರುವಂತೆಯೇ ಲಂಕಾ ತಂಡ ಪಂದ್ಯವನ್ನು ತನ್ನದಾಗಿಸಿಕೊಂಡಿತು.

ಇದು ಭಾರತ ವಿರುದ್ಧ ಲಂಕಾ ತಂಡದ ಎರಡನೇ ಅತಿ ದೊಡ್ಡ ಜಯವಾಗಿದೆ. ಡಂಬುಲಾದಲ್ಲಿ 2010ರಲ್ಲಿ 209 ಎಸೆತ ಬಾಕಿ ಇರುವಂತೆ ಜಯ ಗಳಿಸಿತು.

ಒಟ್ಟಾರೆ ಈ ಪಂದ್ಯದಲ್ಲಿ 53.2 ಓವರ್ ಗಳು ಮಾತ್ರ ಎಸೆಯಲ್ಪಟ್ಟಿತು( 33.3 ಹಾಗೂ 19.5). ಮೂರನೇ ಏಕದಿನ ಪಂದ್ಯ ಶನಿವಾರ (ಜು.28) ಕೊಲೊಂಬೊದ ಪ್ರೇಮದಾಸ ಸ್ಟೇಡಿಯಂನಲ್ಲಿ ನಡೆಯಲಿದೆ. [ವೇಳಾಪಟ್ಟಿ ನೋಡಿ]

ಭಾರತದ ಇನ್ನಿಂಗ್ಸ್ : ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡುವ ನಿರ್ಧಾರ ತೆಗೆದುಕೊಂಡ ಭಾರತ ಆರಂಭಿಕ ಬ್ಯಾಟ್ಸ್ ಮನ್ ವೀರೇಂದ್ರ ಸೆಹ್ವಾಗ್(15 ರನ್) ಅವರನ್ನು 4ನೇ ಓವರ್ ನಲ್ಲೇ ಕಳೆದುಕೊಂಡಿತು. ಪೆರೇರಾ ತಮ್ಮ ಬೌಲಿಂಗ್ ನಲ್ಲೇ ಉತ್ತಮ ಕ್ಯಾಚ್ ತೆಗೆದುಕೊಂಡು ಸೆಹ್ವಾಗ್ ರನ್ನು ಪೆವಿಲಿಯನ್ ಗೆ ಅಟ್ಟಿದರು.

ನಂತರ ಭಾರತದ ಬ್ಯಾಟ್ಸ್ ಮನ್ ಗಳು ಕ್ರೀಸ್ ನಲ್ಲಿ ಇದ್ದ ಸಮಯಕ್ಕಿಂತ ಪೆವಿಲಿಯನ್ ಗೆ ಮರಳಲು ತೆಗೆದುಕೊಂಡ ಸಮಯವೇ ಅಧಿಕವಾಗಿತ್ತು. ಕಳೆದ ಪಂದ್ಯದ ಶತಕವೀರ ವಿರಾಟ್ ಕೊಹ್ಲಿ(1ರನ್) ಕೂಡಾ ಪೆರೇರಾ ಬಲಿಯಾದರು.

ಭರವಸೆಯ ಬ್ಯಾಟ್ಸ್ ಮನ್ ರೋಹಿತ್ ಶರ್ಮ ಮತ್ತೊಮ್ಮೆ ವೈಫಲ್ಯ ಕಂಡು ಶೂನ್ಯ ಸುತ್ತಿ ಪೆವಿಲಿಯನ್ ಗೆ ಮರಳಿದರು. ಏಂಜೆಲೊ ಮ್ಯಾಥ್ಯೂಸ್ ಗೆ ರೋಹಿತ್ ಕ್ಲೀನ್ ಬೋಲ್ಡ್ ಆದರು.

38 ರನ್ನಿಗೆ 3 ವಿಕೆಟ್ ಕಳೆದುಕೊಂಡು ದುಃಸ್ಥಿತಿಯಲ್ಲಿದ್ದ ತಂಡಕ್ಕೆ ಆಸರೆಯಾಗಬೇಕಿದ್ದ ರೈನಾ, ನಾಯಕ ಧೋನಿ ಕೂಡಾ ವಿಫಲರಾದರು. ರೈನಾ 1 ರನ್ ಗಳಿಸಿ ಪೆರೆರಾಗೆ ವಿಕೆಟ್ ಒಪ್ಪಿಸಿದರೆ, ನಾಯಕ ಧೋನಿ 11 ರನ್ ಕಲೆ ಹಾಕಿ ಕೆಲ ಕಾಲ ಕ್ರೀಸ್ ನಲ್ಲಿದ್ದರು. ಆಲ್ ರೌಂಡರ್ ಇರ್ಫಾನ್ ಪಠಾಣ್ 6 ರನ್ ಮಾತ್ರ ಗಳಿಸಿದರೆ, ಜಹೀರ್ 2, ಓಜಾ 5 ರನ್ ಹೊಡೆದರು.

ಏಕಾಂಗಿ ವೀರ : ಆರಂಭಿಕ ಆಟಗಾರನಾಗಿ ಕ್ರೀಸ್ ಗೆ ಇಳಿದ ಗೌತಮ್ ಗಂಭೀರ್ 34ನೇ ಓವರ್ ತನಕ ಏಕಾಂಗಿ ಹೋರಾಟ ನಡೆಸಿ 10ನೇ ಆಟಗಾರನಾಗಿ ಮಾಲಿಂಗ ಬೌಲಿಂಗ್ ನಲ್ಲಿ ಸಂಗಕ್ಕಾರಕ್ಕೆ ಕ್ಯಾಚಿತ್ತು ಔಟಾದರು. 96 ಎಸೆತ ಎದುರಿಸಿದ ಗೌತಮ್ 4 ಬೌಂಡರಿ ಇದ್ದ 65 ರನ್ ಗಳಿಸಿ ತಂಡದ ಮಾನ ತಕ್ಕಮಟ್ಟಿಗೆ ಉಳಿಸಲು ಯತ್ನಿಸಿದರು. ಗಂಭೀರ್ ಗೆ ಅಶ್ವಿನ್ ಕೊಂಚಕಾಲ ಸಾಥ್ ನೀಡಿದರು. ಅಶ್ವಿನ್ 15 ಓವರ್ ನಲ್ಲಿ 21 ರನ್ ಗಳಿಸಿದರು.

ಲಂಕಾ ಪರ ಉತ್ತಮ ಬೌಲಿಂಗ್ ಪ್ರದರ್ಶಿಸಿದ ಥಿಸ್ಸಾರ ಪೆರೆರಾ 8 ಓವರ್ ನಲ್ಲಿ ಕೇವಲ 19 ರನ್ನಿತ್ತು 3 ವಿಕೆಟ್ ಕಬಳಿಸಿ ಪಂದ್ಯಶ್ರೇಷ್ಠ ಎನಿಸಿದರು. ಪೆರೆರಾಗೆ ಉತ್ತಮ ಸಾಥ್ ನೀಡಿದ ಏಂಜೆಲೊ ಮ್ಯಾಥ್ಯೂಸ್ ಅದ್ಭುತ ಬೌಲಿಂಗ್ ಪ್ರದರ್ಶನ ನೀಡಿ 7 ಓವರ್ ನಲ್ಲಿ 14 ರನ್ ನೀಡಿ 3 ವಿಕೆಟ್ ಉರುಳಿಸಿದರು. ಮಾಲಿಂಗ 2 ವಿಕೆಟ್ ಪಡೆದರೆ, ಹೆರಾತ್ 1 ವಿಕೆಟ್ ಗಳಿಸಿದರು.

Story first published:  Tuesday, July 24, 2012, 20:00 [IST]
English summary
Sri Lanka crushed India by nine wickets to level the five-match One Day International series 1-1 here at the Mahinda Rajapaksa International Cricket Stadium on Tuesday(Jul.24).
ಅಭಿಪ್ರಾಯ ಬರೆಯಿರಿ