Englishहिन्दीമലയാളംதமிழ்తెలుగు

ವಿನಯ್ ಸೇರಿ ಐಪಿಎಲ್ ಕ್ರಿಕೆಟರ್ಸ್ ಗೆ ಮಲ್ಯ ನಾಮ

Posted by:
Updated: Friday, July 20, 2012, 11:08 [IST]
 

ವಿನಯ್ ಸೇರಿ ಐಪಿಎಲ್ ಕ್ರಿಕೆಟರ್ಸ್ ಗೆ ಮಲ್ಯ ನಾಮ
 

ಬೆಂಗಳೂರು, ಜು.19: ಮದ್ಯದ ದೊರೆ ವಿಜಯ್ ಮಲ್ಯ ಅವರ ಬಳಿ ಕಿಂಗ್ ಫಿಷರ್ ಏರ್ ಲೈನ್ಸ್ ಸಿಬ್ಬಂದಿಗೆ ಮಾತ್ರವಲ್ಲ ಐಪಿಎಲ್ ಆಟಗಾರರಿಗೆ ಸಂಬಳ ನೀಡಲು ದುಡ್ಡಿಲ್ಲ. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಪ್ರಮುಖ ಆಟಗಾರರಿಗೆ ಸಂಭಾವನೆ ಚೆಕ್ ನೀಡದೆ ಮಲ್ಯ ಸತಾಯಿಸುತ್ತಿದ್ದಾರೆ.

ಆರ್ ಸಿಬಿ ತಂಡದ ಪ್ರಮುಖ ಆಟಗಾರರಾದ ನಾಯಕ ಡೇನಿಯಲ್ ವೆಟ್ಟೋರಿ, ಎಬಿ ಡಿವಿಲೆಯರ್ಸ್, ಮೆಕ್ ಡೊನಾಲ್ಡ್, ವೇಗಿ ವಿನಯ್ ಕುಮಾರ್ ಅವರಿಗೆ ಮಲ್ಯ ಇನ್ನೂ ಸಂಬಳ ನೀಡಿಲ್ಲ.

ಐದನೇ ಆವೃತ್ತಿಯ ಇಂಡಿಯನ್ ಪ್ರಿಮಿಯರ್ ಲೀಗ್ ನಲ್ಲಿ ಆಡಿದ ಸುಮಾರು 5 ದಕ್ಷಿಣ ಆಫ್ರಿಕಾ ಆಟಗಾರರು ಸೇರಿದಂತೆ ಇತರೆ ಅಂತಾರಾಷ್ಟ್ರೀಯ ಆಟಗಾರರಿಗೂ ಆರ್ ಸಿಬಿ ತಂಡದಿಂದ ದುಡ್ಡು ಸಿಕ್ಕಿಲ್ಲ. ಗುತ್ತಿಗೆ ಆಧಾರದ ಮೇಲೆ ಆಟಗಾರರನ್ನು ಖರೀದಿಸಿರುವ ಮಲ್ಯ ಅವರು ಈವರೆಗೂ ನಮ್ಮ ಆಟಗಾರರಿಗೆ ಬಿಡಿಗಾಸು ನೀಡಿಲ್ಲ ಎಂದು ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಮಂಡಳಿ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಟೋನಿ ಐರಿಷ್ ಅವರು ಮಲ್ಯರ ಮೇಲೆ ಕಿಡಿಕಾರಿದ್ದಾರೆ.

ನ್ಯೂಜಿಲೆಂಡ್, ದಕ್ಷಿಣ ಆಫ್ರಿಕಾ, ಶ್ರೀಲಂಕಾ ಮತ್ತು ಆಸ್ಟ್ರೇಲಿಯಾದ ವೃತ್ತಿಪರ ಕ್ರಿಕೆಟರ್ ಗಳಿಗೆ ಸಂಭಾವನೆ ಸಿಕ್ಕಿಲ್ಲ ಎಂದು ಫೆಡರೇಷನ್ ಆಫ್ ಇಂಟರ್ ನ್ಯಾಷನಲ್ ಕ್ರಿಕೆಟರ್ಸ್ ಅಸೋಸಿಯೇಷನ್ ಹೇಳಿದೆ.

ಆದರೆ, ಬೆಂಗಳೂರು ತಂಡವನ್ನು ಮಾತ್ರ ಬೈಯುವಂತಿಲ್ಲ.ಡೆಕ್ಕನ್ ಚಾರ್ಜರ್ಸ್ ಕೂಡಾ ಆಟಗಾರರಿಗೆ ಬಾಕಿ ಉಳಿಸಿಕೊಂಡಿದೆ. ಅದರಲ್ಲೂ ದಕ್ಷಿಣ ಆಫ್ರಿಕಾದ ಡೇಲ್ ಸ್ಟೇಯ್ನ್, ಜೆಪಿ ಡುಮನಿ, ಥೆರಾನ್ ಅವರು ಸಂಬಳ ಇನ್ನೂ ಎಣಿಸಿಲ್ಲ.

ಕಿಂಗ್ ಫಿಷರ್ ಏರ್ ಲೈನ್ಸ್ ಆರ್ಥಿಕ ಬಿಕ್ಕಟ್ಟಿನಿಂದ ಬ್ಯಾಂಕ್ ಖಾತೆ ಮುಟ್ಟುಗೋಲು ಹಾಕಿರುವ ಕಾರಣ ಆರ್ ಸಿಬಿ ಆಟಗಾರರಿಗೆ ಸಂಬಳ ವಿಳಂಬವಾಗಿದೆ. ಆದರೆ, ತಪ್ಪದೆ ಎಲ್ಲಾ ಆಟಗಾರರಿಗೆ ಸಂಭಾವನೆ ತಲುಪಲಿದೆ ಎಂದು ಯುಬಿ ಸಮೂಹದ ಉಪ ನಿರ್ದೇಶಕ(ಕಾರ್ಪೊರೇಟ್ ಸಂವಹನ ವಿಭಾಗ) ಪ್ರಕಾಶ್ ಮಿರ್ ಪುರಿ ಅವರು ಭರವಸೆ ನೀಡಿದ್ದಾರೆ.

ಐಪಿಎಲ್ ಒಪ್ಪಂದದ ಪ್ರಕಾರ ಏಪ್ರಿಲ್ 1 ರೊಳಗೆ ಶೇ 15 ರಷ್ಟು ಸಂಭಾವನೆ ಸಿಗಲಿದೆ. ಮೇ 1 ರೊಳಗೆ ಶೇ 50 ರಷ್ಟು( ಐಪಿಎಲ್ ಜಾರಿ ಇರುವ ಸಮಯದಿಂದ ಮುಕ್ತಾಯದ ವರೆಗೂ) ಹಾಗೂ ಚಾಂಪಿಯನ್ಸ್ ಲೀಗ್ ಟಿ 20 ನಂತರ ಉಳಿದ ಶೇ 15 ರಷ್ಟು ಸಂಭಾವನೆಯನ್ನು ಡಿಸೆಂಬರ್ 1ರೊಳಗೆ ನೀಡಬೇಕು.

ಇತ್ತೀಚೆಗೆ ಯುಬಿ ಸಮೂಹವನ್ನು ಉಳಿಸಲು ಆರ್ ಸಿಬಿ ಷೇರುಗಳ ಮಾರಾಟ ಮಾಡಲು ವಿಜಯ್ ಮಲ್ಯ ಮುಂತಾಗಿದ್ದಾರೆ ಎಂಬ ಸುದ್ದಿ ಹಬ್ಬಿತ್ತು. ಯುನೈಟೆಡ್ ಬ್ರೂವರೀಸ್ ನ ಸಾಲ ತೀರಿಸಲು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ 1,5000 ಕೋಟಿ ರು ನಿಂದ 2,000 ಕೋಟಿ ಮೊತ್ತ ಷೇರುಗಳನ್ನು ಮಾರಾಟ ಮಾಡುವ ಸಾಧ್ಯತೆ ಹೆಚ್ಚಿದೆ ಎನ್ನಲಾಗಿತ್ತು.

ಸಾಲದ ಪ್ರಮಾಣ ತಗ್ಗಿಸಲು ಮೂಲ ಬಂಡವಾಳವಲ್ಲದ ಆಸ್ತಿಗಳನ್ನು ಮಾರಾಟ ಮಾಡಲು ನಿರ್ಧರಿಸಲಾಗಿದೆ. ಆರ್ ಸಿಬಿ ಷೇರುಗಳು, ಯುಬಿಎಲ್ ಷೇರುಗಳು ಇದರಲ್ಲಿ ಸೇರಿದೆ. ಆದರೆ, ಸದ್ಯಕ್ಕೆ ಒಳ್ಳೆ ಬೆಲೆ ಸಿಗುವ ತನಕ ಕಾಯಲಾಗುವುದು ಎಂದು ಯುನೈಟೆಡ್ ಸ್ಪಿರಿಟ್ಸ್ ಲಿ.ನ ಅಧ್ಯಕ್ಷ ಹಾಗೂ ವ್ಯವಸ್ಥಾಪಕ ನಿರ್ದೇಶಕ ಅಶೋಕ್ ಕೂಪರ್ ಹೇಳಿದ್ದರು.

Story first published:  Thursday, July 19, 2012, 18:17 [IST]
English summary
IPL franchise Royal Challengers Bangalore owner Vijay Mallya is having trouble paying salaries not just to his Kingfisher Airlines staff, but also to key players contracted to his IPL team RCB, Captain Daniel Vettori, Andrew McDonald, batsman AB DeVilliers and bowler R Vinay Kumar are yet to receive a remuneration cheque from Mallya.
ಅಭಿಪ್ರಾಯ ಬರೆಯಿರಿ